Bişkekdə baş vermiş təyyarə qəzasında 32 nəfər həlak olub

İlkin məlumata görə, Turkish Airlines aviaşirkəti tərəfindən icarəyə götürülmüş Boeing-747-400 yük təyyarəsinin Qırğızıstanın paytaxtı Bişkekdə qəzaya uğraması nəticəsində 32 nəfərə yaxın insan həlak olub. Təyyarə Manasa aeroportunun uçuş zolağından 1,5-2 km aralıda yerləşən Daça-Suu bağ qəsəbəsindəki evlərin üstünə düşüb. Həlak olanların çoxu qəsəbə sakinləridir.

“İnterfaks”a Qırğızıstan FHN-dən verilən məlumata əsasən qəza nəticəsində 32 nəfər həlak olub, onlardan onu kişi, doqquzu qadın, on üçü uşaqdır.

Məlum olub ki, Boeing-in pilotu qəzadan sonra sağ qalıb, amma aldığı xəsarətlər o qədər ağır olub ki, xəstəxanaya çatdırılmadan, yoldaca keçinib.

Qırğızıstan mülki aviasiya agentliyi qəzaya uğramış təyyarənin Türkiyədə qeydiyyatdan keçmiş ACT Airlines karqo-operatoruna məxsus olduğunu dəqiqləşdirib. Təyyarə Turkish Airlines şirkəti tərəfindən icarəyə götürülüb.

Nəqliyyat və yollar naziri Jamşitbek Kalilov bildirib ki, ilkin versiyaya görə, qəzaya uğramış Boeing Manas aeroportunun enmə zolağına enə bilməyib. Manas aeroportundakı mənbə öz növbəsində “İnterfaks”a bildirib ki, görmə imkanını azaldan güclü duman təyyarənin enişinə mane olmuş ola bilər.