Azərbaycan Konstitusiya Məhkəməsi seçki nəticələrini təsdiqləyib - etirazların faydası olmadı
Azərbaycanın Konstitusiya Məhkəməsi fevralın 9-da baş tutan parlament seçkilərinin 121 dairə üzrə nəticələrini təsdiqləyib. Qalan 4 dairə üzrə təkrar seçkilər keçiriləcək, amma yenə də parlamentdəki yerlərin əksəriyyəti “Yeni Azərbaycan” iqtidar partiyasının payına düşür. Müxalifətin və müstəqil namizədlərin etirazları heç bir nəticə verməyib.
Bəzi yerli müşahidəçilərin və beynəlxalq təşkilatların rəyincə, parlament seçkiləri qeyri-demokratik, çox saylı pozuntu və saxtakarlıqlarla keçib.
“Namizədlərin sayının çox olmasına baxmayaraq, Azərbaycandakı seçkilərdə həqiqi rəqabət və seçim olmayıb”, – ATƏT hesab edir.
Müxalifətdən parlamentə “Respublikaçı Alternativ” partiyasının üzvü Erkin Qədirlidən başqa heç kim keçməyib.
Müxalif və müstəqil namizədlər seçki nəticələrini qəbul etməkdən imtina edib və bir neçə dəfə etiraz aksiyası keçiriblər, polis isə bu aksiyaları dağıdıb. Namizədlərin növbəti piketi bu gün Konstitusiya Məhkəməsinin binası qarşısında baş tutub.
“Ölkə daxilində biz öz seçicilərimizin hüquqlarını və səslərini səs oğrularından qoruya bilmədik” ,– bu haqda öz səhifəsində müstəqil namizədlərdən biri, keçmiş siyasi məhbus Bəxtiyar Hacıyev yazıb.
Daha əvvəl o bildirib ki, Azərbaycanda ədalətə nail ola bilməsə, Avropa İnsan Haqları Məhkəməsinə müraciət edəcək.
• Azərbaycanda parlament seçkiləri haqda hər şey bir dəqiqəlik videoda
• Azərbaycandakı seçkiləri AŞPA və ATƏT dəyərləndirib
