«Նպաստում ենք ՀՀ-ի պաշտպանության ապահովմանը». Ֆրանսիայի ԱԳ նախարարի այցը Երևան
Ֆրանսիայի ԱԳ նախարար Բարոյի այցը Երևան
Պաշտոնական այցով Հայաստանում էր Ֆրանսիայի արտգործնախարար Ժան-Նոել Բարոն։ Նա մասնակցել է մայրաքաղաքում անցկացվող «Երևանյան երկխոսություն» միջազգային համաժողովին, հանդիպումներ ունեցել վարչապետ Նիկոլ Փաշինյանի և արտգործնախարար Արարատ Միրզոյանի հետ: Երկու երկրների արտաքին քաղաքական գերատեսչությունների ղեկավարները նաև մամուլի ասուլիս են անցկացրել, անդրադարձել մի շարք թեմաների, այդ թվում՝ պաշտպանության ոլորտում երկկողմ համագործակցությանը:
«Հարկ է նշել մեր երկու երկրների համագործակցությունը պաշտպանության ոլորտում՝ լինի անձնակազմի վերապատրաստում, թե սպառազինության տրամադրում։ Այս ամենի նպատակն է Հայաստանին հնարավորություն տալ ապահովելու իր պաշտպանությունն ու ինքնիշխանությունը»,- հայտարարել է Ժան-Նոել Բարոն:
Բարոն և Միրզոյանը ստորագրել են հռչակագիր, որը նախատեսում է երկու երկրների արտաքին գերատեսչությունների միջև տարեկան քաղաքական խորհրդակցությունների անցկացում, համագործակցություն ապատեղեկատվության դեմ պայքարում և դիվանագետների վերապատրաստում:
- «Բաքուն վերաշարադրում է պատմությունն ու սպառնում ՀՀ-ին». «Արևմտյան Ադրբեջան» խոսույթի մասին
- ԵՄ դիտորդները Հայաստանում կմնան ևս 2 տարի․ ի՞նչ զարգացումների սպասել
- «Կփորձենք բալանսավորել հարաբերությունները Եվրամիության և ՌԴ հետ»․ Փաշինյան
- «Երևանը կարող է ստանալ ավելին»․ կարծիք ՀՀ-Ֆրանսիա ռազմական գործակցության մասին
Ի՞նչ են քննարկել Փաշինյանն ու Ժան-Նոել Բարոն
Հայկական կողմի փոխանցմամբ՝ ՀՀ վարչապետն ու Ֆրանսիայի արտգործնախարարը՝
- քննարկել են ենթակառուցվածքների զարգացմանը, ներդրումների ներգրավմանը, համատեղ նոր ծրագրերի իրականացմանը վերաբերող հարցեր,
- մտքեր են փոխանակել տարածաշրջանային գործընթացների, այդ թվում՝ Հայաստան-Ադրբեջան խաղաղության համաձայնագրի վերջին զարգացումների շուրջ:
Փաշինյանը կարևորել է այն հանգամանքը, որ երկկողմ փոխգործակցությունը տարբեր ոլորտներում ավելի է խորանում և ամրապնդվում: Ժան-Նոել Բարոն, իր հերթին, ընդգծել է Ֆրանսիայի անսասան աջակցությունը Հայաստանի զարգացման ու կարողությունների ամրապնդման գործում:
«Ֆրանսիայի ԱԳ նախարարը նշել է, որ իր երկիրը պատրաստ է էլ ավելի խորացնել և ընդլայնել հարաբերությունները Հայաստանի հետ, այդ թվում՝ քաղաքական, տնտեսական ոլորտներում»,- ասված է հաղորդագրությունում:
Ինչո՞ւ է Փարիզն աջակցում հայ-ադրբեջանական կարգավորմանը
Արտգործնախարար Բարոյի խոսքով՝ Ֆրանսիան աջակցում է Հայաստանի և Ադրբեջանի միջև դժվար բանակցություններին, որոնց արդյունքում արդեն իսկ համաձայնեցվել է երկու երկրների միջև խաղաղության համաձայնագրի տեքստը։
«Ցանկանում եմ ընդգծել վարչապետ Փաշինյանի համարձակությունը։ Ժամանակն է համաձայնագիրը ստորագրելու և վավերացնելու։ Այդ մասին են ասում Ֆրանսիան, ԱՄՆ-ն և ամբողջ Եվրոպան՝ աջակցելով Հայաստանի ինքնիշխանությանն ու տարածքային ամբողջականությանը»,- նկատել է նա:
Պանելային քննարկման ժամանակ ֆրանսիացի պաշտոնյան շեշտել է՝ Հարավային Կովկասը դիտարկում են որպես ԵՄ-ն Արևելքի հետ կապող հիմնական տարածաշրջան։ Հավելել է՝ Հայաստանի և Ադրբեջանի միջև խաղաղության հաստատումից կշահի նաև Եվրամիությունը.
«Ահա թե ինչու ենք մենք աջակցել Հայաստանի իշխանությունների ջանքերին խաղաղության պլան մշակելու ուղղությամբ։ Ահա թե ինչու ենք մենք աջակցել քաղաքական համաձայնությունն այդ խաղաղության պլանի շուրջ, որը տեղի ունեցավ շաբաթներ առաջ։ Եվ ահա թե ինչու ենք մենք երկու կողմերին կոչ անում ստորագրել և վավերացնել պայմանագիրը։ Այս տարածաշրջանում խաղաղության հիմքի վրա մենք կարող ենք կառուցել բարգավաճ ապագա, տարածաշրջանային ինտեգրում»։
«Կան ՀՀ-Ֆրանսիա հարաբերությունները ռազմավարական գնահատելու հիմքեր». Միրզոյան
«Առաջին հերթին քննարկել ենք Հայաստան-Ֆրանսիա հագեցած երկկողմ օրակարգը և համատեղ ձևավորած խճանկարը մեր հարաբերությունների, ինչը դրանք որպես ռազմավարական գնահատելու հիմք է տալիս։ Միաժամանակ գետնի վրա մեր գործընկերությունը տալիս է շատ կոնկրետ արդյունքներ»,- ֆրանսիացի գործընկերոջ հետ համատեղ ասուլիսի ժամանակ նկատել է ՀՀ արտգործնախարար Արարատ Միրզոյանը:
Կոնկրետ արդյունքների շարքում Միրզոյանը հիշատակել է Վեդիի ջրամբարի կառուցումը։ Նշել է, որ դա միակ ծրագիրը չէ, որով Ֆրանսիան նպաստում է Հայաստանի դիմակայունության ամրապնդմանն ու տնտեսական զարգացմանը։
Հայաստանի ԱԳ նախարարի գնահատմամբ՝ երկու երկրները համագործակցում են այնպիսի ոլորտներում, որոնք մի քանի տարի առաջ նույնիսկ չէին էլ կարող քննարկվել։
Թե որ ոլորտների մասին է խոսքը՝ պաշտոնյան չի հստակեցրել: Ամենայն հավանականությամբ, Միրզոյանը նկատի ունի պաշտպանության ոլորտը։ Վերջին տարիներին Փարիզը դարձել է Երևանի համար զենքի հիմնական մատակարարներից մեկը:
Արարատ Միրզոյանի խոսքով՝ ֆրանսիական կողմը հետաքրքրված է նաև ենթակառուցվածքների զարգացմամբ: Ասում է՝ առաջիկայում շատ շոշափելի և կոնկրետ նորություններ կլինեն:
Ֆրանսիան Սյունիքում հյուպատոսություն կբացի
Մամուլի ասուլիսի ժամանակ նման հայտարարություն է արել Ֆրանսիայի ԱԳ նախարար Ժան-Նոել Բարոն։
«Ապակենտրոնացված համագործակցության ոլորտում շուտով Սյունիքի մարզի Գորիս քաղաքում կկայանա հայ-ֆրանսիական ապակենտրոնացված քաղաքականության կոնֆերանսը, ինչը կարևոր համագործակցություն է մեր երկու երկրների միջև։ Սա նաև քաղաքական նշան է, որ միջոցառումը տեղի է ունենալու Սյունիքում՝ Գորիսում, որտեղ Ֆրանսիան կբացի նաև հյուպատոսություն»,- մանրամասնել է նա։
Ապակենտրոնացված համագործակցության զարգացումը բարձր է գնահատել նաև ՀՀ արտաքին գործերի նախարարը: Ըստ Արարատ Միրզոյանի՝ այն կնպաստի Հայաստանի համար ռազմավարական նշանակություն ունեցող շրջանների զարգացմանն ու դրանց դիմակայունության բարձրացմանը։
«Հայաստանը մենակ չէ իր ձգտումներում». ՀՀ-ի եվրաինտեգրման մասին
ՀՀ արտգործնախարար Արարատ Միրզոյանը նկատել է՝ առաջնային նշանակություն ունի Հայաստանի ու ԵՄ-ի միջև գործընկերության խորացման ուղղությամբ հայ-ֆրանսիական գործակցությունը։
«Իհարկե, ԵՄ-ի հետ երկխոսությունն ընթանում է մեր ֆրանսիացի գործընկերների շատ գործուն աջակցությամբ և խրախուսմամբ»,- շեշտել է նա:
Հայաստանի խորհրդարանն այս տարի ընդունեց Եվրամիությանն անդամակցելու գործընթաց սկսելու մասին օրինագիծ։ «Երևանյան երկխոսություն» համաժողովի շրջանակներում կազմակերպված քննարկման ժամանակ արտգործնախարար Արարատ Միրզոյանն ասել է՝ հայ հասարակությունը մեծ սպասելիքներ ունի այդ գործընթացից: Ուշադրություն է հրավիրել այն հանգամանքի վրա, որ գործընթացը երկկողմանի է.
«Մենք կարող ենք սպասելիքներ ունենալ, բայց, միգուցե, ԵՄ֊ն պատրաստ չէ դրան։ Ուստի հարկավոր է հասկանալ, թե որտեղ են մեր տեսլականները համընկնում։ Եվ, եթե համընկնում են, մենք ինչպես պետք է գործենք, ինչպես պետք է պլանավորենք մեր համատեղ ապագան»։
ՀՀ ԱԳ նախարարի խոսքով՝ եթե ՀՀ կառավարությունը կամ Եվրամիության գործընկերները չբավարարեն առկա սպասելիքները, շատ մեծ հիասթափություն կլինի:
Ասել է՝ «պահը կկորսվի, և ես դժվար եմ պատկերացնում, թե մենք երբ կկարողանանք վերսկսել գործընթացը»:
Ֆրանսիայի արտգործնախարարը վստահեցրել է՝ ԵՄ-ին անդամակցելու իր ձգտումներում Հայաստանը մենակ չէ, սակայն խոսքը բարդ գործընթացի մասին է.
«Ամենաբարդ մասը Եվրամիության ստանդարտներին համապատասխանելն է օրենքի գերակայության նկատմամբ հարգանքի, ժողովրդավարության, ազատության, մամուլի ազատության, անկախ դատական համակարգի տեսանկյունից»:
Ժան-Նոել Բարոյի փոխանցմամբ՝ Եվրամիության պատասխանատվության տիրույթում է աշխատել թեկնածու երկրների հետ, որպեսզի այդ երկրների հասարակությունների համար ընկալելի լինեն այն ջանքերը, որոնք պետք է գործադրվեն մինչև ԵՄ անդամակցության հասնելը: Կարծում է՝ այդ տրամադրվածությամբ է Եվրամիությունը Հայաստանին աջակցել Խաղաղության եվրոպական հիմնադրամի միջոցով և երկրի հետ սկսել երկխոսություն վիզաների ազատականացման շուրջ։
Հետևեք մեզ — Facebook | Youtube | Telegram
Ֆրանսիայի ԱԳ նախարար Բարոյի այցը Երևան
