Վրաստանը չի մասնակցի Դավոսի տնտեսական ֆորումին և Մյունխենի անվտանգության համաժողովին
Վրաստանը չի մասնակցի Մյունխենի համաժողովին
2025 թվականին Վրաստանն իր անկախությունից ի վեր առաջին անգամ չի մասնակցի ո՛չ Դավոսի տնտեսական ֆորումին, ո՛չ էլ Մյունխենի անվտանգության համաժողովին։ Այս մասին bm.ge պարբերականին հայտնել են Վրաստանի կառավարությունից՝ չհստակեցնելով պատճառները։
Հաղորդագրության մեջ ասվում է, որ ոչ մի հրավեր չի ստացվել, սակայն «Վրացական երազանքի» իշխանությունները «միևնույնն է մասնակցելու մտադրություն չունեին»։
Դավոսի տնտեսական ֆորումը տեղի կունենա Շվեյցարիայում հունվարի 20-24-ը՝ 60 պետությունների ղեկավարների և 130 երկրների մասնակցությամբ։
Մյունխենի անվտանգության համաժողովը նախատեսված է փետրվարի 14-16-ը։ Այն առաջատար միջազգային ֆորում է, որին ամեն տարի մասնակցում են ավելի քան 450 պետությունների ղեկավարներ, նախարարներ, միջազգային կազմակերպությունների ղեկավարներ, առաջատար բիզնես կառույցների, լրատվամիջոցների և ՀԿ-ների ներկայացուցիչներ։ Համաժողովն ուղղված է երկրների միջև վստահության խորացմանը և հակամարտությունների խաղաղ կարգավորմանը։ Ֆորումի շրջանակներում կազմակերպվում են թափանցիկ և ոչ պաշտոնական երկխոսություններ անվտանգային հարցերի շուրջ։
Վրաստանի պաշտպանության նախկին նախարար Թինա Խիդաշելիի կարծիքով՝ միջազգային հանրությունը պարզապես երես է թեքել վրացական կառավարությունից՝ չճանաչելով նրա լեգիտիմությունը։ Կարծում է՝ հենց այդ պատճառով էլ Վրաստանի ներկայացուցիչներին պարզապես չեն հրավիրել ո՛չ Դավոս, ո՛չ էլ Մյունխեն։
Առայժմ չկա պաշտոնական հաստատում այն բանի, որ Վրաստանը հրավիրված չէ այս միջոցառումներին։
«Վրացական երազանք» կուսակցության կառավարությանն իսկապես չեն ընդունում թե՛ երկրի ներսում, թե՛ միջազգային մակարդակում։ Արդեն ավելի քան մեկուկես ամիս է, ինչ Վրաստանում շարունակվում են զանգվածային բողոքի ցույցերը։ Դրանք բռնկվեցին այն բանից հետո, երբ իշխանությունները հայտարարեցին եվրաինտեգրման ուղուց շեղվելու մասին։
Դեկտեմբերի 27-ին ԱՄՆ-ն ֆինանսական պատժամիջոցներ սահմանեց «Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլիի նկատմամբ՝ Ռուսաստանի դեմ հերթական պատժամիջոցների փաթեթի շրջանակներում։
Ավելի քան 110 վրացի պաշտոնյաների և նրանց ընտանիքների անդամների մուտքը ԱՄՆ սահմանափակվել է։
Վրաստանի հարյուրավոր քաղաքացիներ, ովքեր ունեն դիվանագիտական անձնագրեր, այլևս չեն կարող առանց վիզայի ճամփորդել դեպի Եվրամիության երկրներ։
Վեց մարդ գտնվում է «Մագնիտսկու ցուցակում», ինչը ենթադրում է խիստ ֆինանսական պատժամիջոցներ։
40-ից ավելի մարդ հայտնվել է Բալթյան երկրների պատժամիջոցների տակ, շուրջ 20-ը՝ Ուկրաինայի, 9-ը՝ Գերմանիայի, 5-ը՝ Մեծ Բրիտանիայի անհատական պատժամիջոցների տակ։
Բազմաթիվ վրացի պաշտոնյաներ գտնվում են միաժամանակ մի քանի պատժամիջոցների փաթեթների տակ։ Օրինակ՝ ներքին գործերի նախարար և փոխվարչապետ Վախթանգ Գոմելաուրին, ով ներառված է մի քանի երկրների պատժամիջոցների ցուցակներում, ինչպես նաև «Մագնիտսկու ցուցակում»։
