Ռուսաստանը ռազմական գործողություն է սկսել Ուկրաինայի դեմ, ռմբակոծվում է Կիևը: Թարմացվող

Մեծ Բրիտանիայի վարչապետ Ջոնսոն․ Բրիտանիան գումարների սահմանափակումներ է մտցնում, որոնք ռուսները կարող են պահել իրենց բրիտանական հաշիվների վրա։ Մեծ Բրիտանիան նաև սառեցնում է ռուսական ՎՏԲ բանկի բոլոր ակտիվներն ու պատժամիջոցներ սահմանում «Աէրոֆլոտի» դեմ։

G7 երկրների առաջնորդները հայտարարություն են տարածել, որում դատապարտել են Ռուսաստանի ներխուժումն Ուկրաինա և Կիևին հստակ աջակցություն հայտնել։ «Մենք դատապարտում ենք նախագահ Պուտինին եվրոպական անվտանգության հարցերի լուծմանն ուղղված դիվանագիտական գործընթացին մասնակցելուց հրաժարվելու համար՝ չնայած մեր բազմաթիվ առաջարկներին։ Վլադիմիր Պուտինն ընտրել է պատմության սխալ կողմը», — հայտարարությունն է մեջբերում CNN-ը։

«Ուկրաինայի վրա հարձակումները լայնամասշտաբ ռուսական ներխուժման սկզբնական փուլի մի մասն են, — պնդում է ԱՄՆ պաշտպանության նախարարությունում CNN-ի աղբյուրը։ — Նրանք սկսում են հարձակվել Կիևի վրա։ Մեր գնահատականն այն է, որ նրանք մտադիր են փաստացի գլխատել կառավարությունն ու այնտեղ սեփական կառավարում հաստատել»։

Հաստատվել է Չեռնոբիլի ատոմակայանի գրավումը։ «Դաժան մարտերից հետո Չեռնոբիլի հարթակի նկատմամբ վերահսկողությունը կորցրել ենք։ Կայանի օբյեկտների վիճակը հայտնի չէ։ Դա Եվրոպային ուղղված գլխավոր սպառնալիքներից մեկն է», — հայտարարել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը։ Ավելի վաղ նախագահ Զելենսկին հայտարարել էր, որ Չեռնոբիլի ատոմակայանի համար մարտերի մասին իրազեկել է Շվեդիայի վարչապետին։ «Դա նշանակում է պատերազմ հայտարարել ողջ Եվրոպային։ Եթե այսօր մեզ չօգնեք, վաղը պատերազմը կուղղվի ձեր դեմ», — հայտարարել է Զելենսկին։

«Խերսոնի շրջանի մի մասն անցել է Ռուսաստանի զինված ուժերի վերահսկողության տակ», — ասված է Խերսոնի համայնքապետարանի Facebook-յան էջում։ Նախագահ Զելենսկին ասել է, որ «ամենամեծ խնդիրն այժմ հարավում է, այնտեղ մարտեր են Խերսոնի մատույցներում»։

Նախագահ Զելենսկին ԵՄ-ին կոչ է արել անթռիչք գոտի ստեղծել Ուկրաինայի երկնքում։

Արժեթղթերի ռուսական շուկան այսօր ռեկորդային անկում է գրանցել իր ողջ պատմության մեջ։ Պուտինը հանդիպել է Կրեմլում ռուս գործարարների հետ և ասել, որ «Ռուսաստանը համաշխարհային տնտեսության մաս է կազմում։ Մենք չենք պատրաստվում վնաս տալ համակարգին, որի մի մասն ենք։ Մեր գործընկերները սա պետք է հասկանան»։

Ռուսաստանի պաշտպանության նախարարություն․ ռուսական զորքերը հաջողությամբ կատարել են օրվա խնդիրները։ Ոչնչացվել է Ուկրաինայի ռազմական ենթակառուցվածքի 83 ցամաքային օբյեկտ, կործանվել ուկրաինական երկու Սու-27, երկու Սու-24, մեկ ուղղաթիռ և չորս ТБ-2 անօդաչու թռչող սարք։

Ուկրաինայի նախագահ Զելենսկի․ «Ուկրաինան առաջարկում է վերադառնալ խաղաղության հուն։ Եթե մեզ հասկանում եք, գնացեք հրապարակներ և պահանջեք պատերազմի դադարեցում։ Ռուսաստանն արդեն վաստակել է պատմության մեջ ամենակոշտ պատժամիջոցները»։

Ռուսաստանի տասնյակ քաղաքներում բողոքի ակցիաներ են անցկացվում, հարյուրավոր ձերբակալվածներ կան։

Տեսանյութ․ Մոսկվայում հակապատերազմյան ակցիայի մասնակիցները վանկարկում են «Ոչ պատերազմին»

Ռուսաստանի դեսպանատան դիմաց ակցիան կազմակերպել էր Հայաստանի եվրոպական կուսակցությունը: Դրա ղեկավար Տիգրան Խզմալյանն ասել է, որ Ռուսաստանի ներխուժումը Ուկրաինա հակամարդկային գործողություն է և չի կարող արդարացվել.

«Մենք հիմա եկել ենք այստեղ` ցույց տալու համար և՛ Հայաստանին, և՛ Ուկրաինային, և՛ ողջ աշխարհին, որ մենք համերաշխ ենք, հասկանում ու գիտակցում ենք, որ մեր պայքարն ընդհանուր է, ազատությունը չի բաժանվում: Պուտինն ասում է, որ անբաժան է անվտանգությունը: Իրականում անբաժան է ազատությունը, անբաժան են մարդկային արժեքները, մենք պարզ այս ուղերձով ենք եկել»:

Ակցիային մասնակցել են այդ թվում Հայաստանում բնակվող ուկրաինացիներ։

«Ուզում ենք, որ Հայաստանը աջակցի մեզ այս դժվար պահին»,- ասել է նրանցից մեկը:

Ակցիան ավարտվել է Ուկրաինայի ու Հայաստանի հիմների կատարմամբ:

🔘 Չեխիայի վարչապետ Պետր Ֆիալան ինքնիշխան պետության դեմ Ռուսաստանի գործողություններն անվանել է չարդարացված ագրեսիա։ Կառավարությունը Անվտանգության խորհրդի արտահերթ նիստ է հրավիրում. «Պատերազմն ավելի մոտ է, քան մենք կարող ենք պատկերացնել։ Բառացիորեն։ Պատերազմն ավելի մոտ է, քան մենք կարող ենք խոստովանել։ Աջակցելով Ուկրաինային՝ մենք պաշտպանում ենք մեր երկիրը», — ասել է Չեխիայի ՆԳ նախարար Վիտ Ռակուսանը։ Չեխիայի նախագահ Միլոշ Զեմանը, որը համարվում է ռուսամետ, լռում է։

🔘 Հունգարիայի արտաքին գործերի նախարար Պետեր Սիարտոն ասել է, որ պատերազմը ամենավատ սցենարն է, սակայն ձեռնպահ է մնացել Ռուսաստանի գործողությունները ուղղակիորեն դատապարտելուց։ Հունգարիայի նախագահ Վիկտոր Օրբանն այսօր Բրյուսելում մասնակցելու է ԵՄ առաջնորդների գագաթնաժողովին։

🔘 Լեհաստանն ակտիվորեն աջակցում է Ուկրաինային։ Փախստականների համար կենտրոններ կստեղծվեն Լեհաստանի երկու շրջաններում՝ Ուկրաինայի հետ սահմանից ոչ հեռու։ Լեհաստանը պահանջել է նաև ակտիվացնել ՆԱՏՕ-ի կանոնադրության 4-րդ հոդվածը։ Համաձայն այս հոդվածի՝ անդամ պետություններից մեկին սպառնացող վտանգի դեպքում մյուսները պետք է շտապ խորհրդակցություններ անցկացնեն։

🔘 Լատվիան նույնպես կոչ է արել ՆԱՏՕ-ին արձագանքել։ Դրա առաջնորդները Ռուսաստանի գործողություններն անվանել են «ռազմական ագրեսիա Ուկրաինայի ինքնիշխանության, նրա ժողովրդի և ժողովրդավարության դեմ»։

🔘 Լիտվան և Մոլդովան արտակարգ դրություն են հայտարարել։

🔘 Մոլդովայի նախագահ Մայա Սանդուն ասել է, որ երկիրը պատրաստ է ընդունել տասնյակ հազարավոր մարդկանց Ուկրաինայից։ Մոլդովական լրատվամիջոցների փոխանցմամբ՝ Ուկրաինայի և Մոլդովայի սահմանին շատ մեքենաներ են կուտակվել։

🔘 Ըստ ռումինական լրատվամիջոցների՝ երկիրն արդեն սկսել է ընդունել ուկրաինացի փախստականներին։ Տեղական իշխանությունները հայտնել են, որ վերջին օրերին մոտ 300 մարդ է ժամանել։ Նախագահ Կլաուս Յոհաննեսն ավելի վաղ Ռուսաստանի գործողություններն անվանել էր «միջազգային իրավունքի, Ուկրաինայի ինքնիշխանության և ամբողջականության կոպիտ խախտում»:

🔘 Հարավային Կորեան հայտարարել է, որ միանալու է Ռուսաստանի դեմ պատժամիջոցներին։

«Ակնհայտ է, որ ռուս-ուկրաինական ճգնաժամը Հայաստանի վրա լրջորեն ազդեցություն է ունենալու և մի քանի ուղղություններով է դա լինելու։ Ամենաառաջին ազդեցությունը լինելու է տնտեսական առումով. Հայաստանի տնտեսությունը սերտորեն շաղկապված է Ռուսաստանի տնտեսության հետ։ Ռուսաստանը Հայաստանի թիվ 1 առեւտրային գործընկերն է, մեր առաջին արտահանման վայրը, հետեւաբար ռուսական տնտեսության թուլացումը եւ կաթվածահար լինելը միանշանակ ազդելու է Հայաստանի տնտեսության վրա:

Պատկերավոր ասած` եթե Ռուսաստանի տնտեսությունը թեթեւ մրսում է, Հայաստանի տնտեսությունը հիվանդանում է, քանի որ մեր երկրի տնտեսության կախվածությունը բավականին մեծ է Ռուսաստանի տնտեսությունից: Նվազելու են Ռուսաստանից Հայաստան ուղարկվող տրանսֆերտները, որովհետեւ ռուսական ռուբլին սրընթաց գահավիժում է, անկում է ապրում ամենօրյա ռեժիմով: Այնպես որ, Ռուսաստանի դեմ պատժամիջոցների հետեւանքները նաեւ Հայաստանն իր մաշկի վրա է զգալու։

Եթե Ռուսաստանը շատ թուլանա Արեւմուտքի հետ դիմակայության ընթացքում, չի բացառվում, որ Ադրբեջանն օգտվի ստեղծված իրավիճակից եւ Արցախում նոր սադրանքներ, ընդհուպ մինչեւ նոր պատերազմ հրահրի»:

🔘 Ուկրաինայի սահմանային ծառայություն. ռուսական զինտեխնիկան հատել է Ուկրաինայի սահմանը Չեռնիգովի, Սումիի, Լուգանսկի և Խարկովի մարզերում, ինչպես նաև Ղրիմից։

🔘 Լուգանսկի հրետանին գնդակոծում է Ուկրաինայի տարածքը, հայտնում է ՌԻԱ Նովոստի-ն։

🔘 Ուկրաինայի ՆԳՆ․ Օդեսայի շրջանի զորամասում վեց մարդ զոհվել է, յոթը՝ վիրավորվել, 19 մարդ անհետ կորել է։ Մարիուպոլում մեկ մարդ մահացել է, երկուսը՝ վիրավորվել։

🔘 Խարկովի մոտակայքում բնակելի շենք է ռմբակոծվել, զոհերի թիվը հայտնի չէ, դեպքի վայրից հայտնում է Reuters-ը։

🔘 Նախագահ Զելենսկին կոչ է արել խուճապի չմատնվել և դիմակայել ռուսական ագրեսիային։ Նա ասել է, որ բանակցում է արևմտյան առաջնորդների հետ՝ հակապուտինյան կոալիցիա ստեղծելու շուրջ։

🔘 Կիևի բնակիչները փորձում են լքել քաղաքը, սոցցանցերում տեսանյութ է հայտնվել 4 կմ երկարությամբ խցանումների մասին։

🔘 Ռուբլու աննախադեպ անկում. եվրոն արժե 99,99 ռուբլի՝ 2014 թվականի դեկտեմբերից ի վեր առաջին անգամ։ Դոլարը 89 ռուբլուց բարձր է։

ԽԱՐԿՈՎԻ ՄՈՏ ռմբակոծված տան լուսանկարը

Ուկրաինային ռուսական զորքերի հասցրած առավոտյան հարվածները, հրապարակել է @hueviykharkov-ը:

• ԱՄՆ նախագահ Ջո Բայդենն Ուկրաինայի նախագահ Վլադիմիր Զելենսկու հետ հեռախոսազրույցում հայտարարել է, որ ԱՄՆ-ն նոր շատ կոշտ պատժամիջոցներ կսահմանի Ռուսաստանի դեմ:
• Բայդեն. «Վաղը հանդիպելու եմ G7 առաջնորդների հետ, և ԱՄՆ-ն ու մեր դաշնակիցները կոշտ պատժամիջոցներ կսահմանեն Ռուսաստանի դեմ: Մենք շարունակելու ենք աջակցել և օգնել Ուկրաինային և ուկրաինացի ժողովրդին»:
• Ուկրաինայի Գլխավոր շտաբի հայտարարությունը. Ռուսաստանը հարվածներ է հասցրել վեց օդանավակայանների` Բորիսպոլ, Օզյորնի, Կուլբակին, Չուգուև, Կրամատորսկ, Չերնոբրովկա: Սահմանի երկայնքով հրետակոծություն է: Օդեսայում ռուսական դեսանտի հայտնվելու մասին լուրերն իրականությանը չեն համապատասխանում:
• Ռուսաստանի պաշտպանության նախարարության հայտարարությունը. «Ուկրաինական ռազմական ավիաբազաների ենթակառուցվածքը շարքից հանվել է ռմբակոծման հետևանքով: Ուկրաինական սահմանապահ ծառայությունը չի դիմադրում ռուսական ստորաբաժանումներին: Խոցված ռուսական ինքնաթիռի մասին լուրը չի համապատասխանում իրականությանը»:

Հայաստանի պաշտպանության նախարար Սուրեն Պապիկյանը Մոսկվա է մեկնել: Հայաստանի ՊՆ մամուլի ծառայությունը գրում է, որ «այցի ընթացքում պլանավորված են հանդիպումներ Ռուսաստանի պաշտպանության նախարար Սերգեյ Շոյգուի և այլ բարձրաստիճան պաշտոնյաների հետ»:

• Պուտինը «հատուկ ռազմական գործողություն է սկսել» Ուկրաինայում առավոտյան 6.30:
• Ռուս զինվորականները բալիստիկ հրթիռներով հրթիռակոծում են Կիևը, Լվովը, Օդեսան, Զապորոժիեն, Խարկովը, Ժիտոմիրը, Կրամատորսկը, Մարիուպոլն ու մյուս սահմանամերձ քաղաքները: Ուկրաինայի ՆԳՆ-ն մարդկանց կոչ է անում պատսպարվել ռմբապաստարաններում: Մեդիան հաղորդում է, որ թուրքական «Բայրաքթար» տեսակի ՀՕՊ-ը հաջողությամբ հետ է մղում հարվածները:
• Պուտինը սպառնում է ներխուժել ցանկացած երկիր, որը կմիջամտի իրավիճակին:
• Ուկրաինայի Անվտանգության խորհուրդը ռազմական դրություն է հայտարարել, հաստատվել է, որ Ռուսաստանը գրոհում է օդանավակայաններն ու մյուս ռազմական ենթակառուցվածքները:
• Ուկրաինան ամբողջությամբ փակել է երկինքն ինքնաթիռների համար: Քաղաքներից հնարավոր չէ դուրս գալ:
• Ռուսաստանը փակել է Ուկրաինայի հետ սահմանի օդային տարածքը:
• Ռուսաստանի ՊՆ-ն հայտարարում է, որ չի գրոհում քաղաքներն, այլ միայն ոչնչացնում է ռազմական օբյեկտները:
• Ուկրաինայի սահմանապահ ծառայությունը հաղորդել է, որ ռուսական տանկերը հատում են Ուկրաինայի հետ Բելառուսի սահմանը: CNN-ը կադրեր է հրապարակել:
• Ռազմական գործողությունների մեկնարկը քննարկվել է ՄԱԿ Անվտանգության խորհրդի նիստում, Ուկրաինայի ներկայացուցիչը Ռուսաստանին մեղադրել է պատերազմ սանձազերծելու համար, Ռուսաստանի ներկայացուցիչը հայտարարել է «արդարացված ռազմական գործողության մասին»: