Պատերազմ Ուկրաինայում, օր իններորդ։ Թարմացվող

Այսօր Թբիլիսիում առնվազն 10000 մարդ է հավաքվել խորհրդարանի դիմաց՝ աջակցելու Ուկրաինային և կառավարությունից պահանջելու Ռուսաստանը դատապարտել որպես ագրեսոր։ Կիևից ներկաներին ողջունել է Ուկրաինայի նախագահ Վլադիմիր Զելենսկին։

Ուկրաինան և Ռուսաստանը՝ լուսադեմին Զապորոժիեի ատոմակայանում բռնկված հրդեհի մասին, որն արագ մարվել է

 ՄԱԳԱՏԵ․ Զապորոժիեի ԱԷԿ-ի անվտանգության համակարգերը չեն տուժել, ճառագայթման արտանետում չկա։

 Ուկրաինական Էներգոատոմի մամուլի ծառայություն. Զապորոժիեի ատոմակայանի վրա ռուս զինվորականների հարձակման ժամանակ երեք ուկրաինացի զինվոր է զոհվել։

Ուկրաինայի նախագահ Զելենսկի. «Մենք մի գիշեր ապրեցինք, որը կարող էր վերջ տալ Ուկրաինայի և Եվրոպայի պատմությանը։ Ռուսական զորքերը հարձակվել են Զապորոժիեի ատոմակայանի վրա», — ասել է Ուկրաինայի նախագահը։ Նա կրկին պահանջել է, որ Արևմուտքը նոր պատժամիջոցներ սահմանի Ռուսաստանի դեմ եւ փակի Ուկրաինայի երկինքը։

Ռուսաստանի Դաշնության պաշտպանության նախարարություն. «Գիշերը Զապորոժիեի ԱԷԿ-ին հարող տարածքում Կիևի ռեժիմը «հրեշավոր սադրանք իրականացնելու փորձ է արել»։ Ենթադրվում է, որ ռուսական պարեկը հսկում էր կայանի հարակից տարածքը, և այդ ժամանակ դրա վրա «հզոր կրակ է բացվել էլեկտրակայանից դուրս գտնվող ուսումնական համալիրի մի քանի հարկերի պատուհաններից»։ «Ուկրաինացի դիվերսանտների կրակակետերը ճնշվել են հրետանային զինատեսակներից պատասխան կրակով։ Դուրս գալով շենքից՝ ուկրաինական դիվերսիոն խումբը հրդեհել է շենքը», — պնդում է ՌԴ ՊՆ-ն։

Աջակցություն Ուկրաինային

ՄԱԿ-ի Մարդու իրավունքների խորհուրդը որոշել է անհապաղ ստեղծել միջազգային հանձնաժողով՝ հետաքննելու «Ուկրաինայի դեմ Ռուսաստանի ագրեսիան»։ Դեմ են եղել միայն Ռուսաստանն ու Էրիթրեան, 13 երկրներ ձեռնպահ են մնացել։

Ֆրանսիան հայտարարել է Ուկրաինային հինգերորդ սերնդի նորագույն հակատանկային հրթիռային համակարգ փոխանցելու պատրաստակամության մասին։

 ՆԱՏՕ-ն Ուկրաինայի հակամարտության կողմ չէ և չի փնտրում Ռուսաստանի հետ պատերազմ, բայց կավելացնի իր ներկայությունը Ռուսաստանի Դաշնության սահմաններին, ասել է ՆԱՏՕ-ի գլխավոր քարտուղար Յենս Ստոլտենբերգը։

Պուտին. «Մենք վատ մտադրություններ չունենք մեր հարևանների նկատմամբ».

«Նրանց նաև խորհուրդ կտամ չսրել իրավիճակը, որևէ սահմանափակում չկիրառել, մենք բոլոր պարտավորությունները կատարում ենք և կշարունակենք կատարել։ Իրավիճակը սրելու կամ մեր հարաբերությունները վատացնելու անհրաժեշտություն չենք տեսնում։ Մեր բոլոր գործողությունները, եթե դրանք ծագում են, միշտ առաջանում են բացառապես Ռուսաստանի Դաշնության դեմ ուղղված որոշ ոչ բարեկամական գործողություններին ի պատասխան։ Կարծում եմ, որ բոլորը պետք է մտածեն, թե ինչպես կարգավորել հարաբերությունները և նորմալ համագործակցել»,-  Ռուսաստանի նախագահի նոր ելույթը։

Ուկրաինայի ներքին գործերի նախարարություն. «Կամ փակեք Ուկրաինայի երկինքը, կամ տվեք մեզ ժամանակակից հակաօդային պաշտպանության համակարգեր»

Ուկրաինայի ՆԳՆ խորհրդական Գերաշչենկոն․ «Այն իրավիճակում, երբ Ռուսաստանը ցեղասպանություն է իրականացնում Ուկրաինայի բնակիչների նկատմամբ՝ անկախ ազգությունից, իսկ Արևմուտքը պատրաստ չէ ոչ թռիչքային գոտի ստեղծել երկրի տարածքի վրա՝ վախենալով ագրեսոր պետության հետ պատերազմից, այլընտրանքային տարբերակ է հնարավոր է։ Տվեք մեզ հակաօդային պաշտպանության ժամանակակից համակարգեր, որոնք կարող են խոցել բոլոր տեսակի ինքնաթիռները և թևավոր հրթիռները: Տեղափոխեք դրանք ռազմական տրանսպորտային ինքնաթիռներով Լեհաստանի, Ռումինիայի, Սլովակիայի, Հունգարիայի ռազմական օդանավակայաններ: Հետո ձեր հակաօդային պաշտպանության համակարգերի պաշտպանությամբ ուղեկցեք դրանք մինչև Ուկրաինայի սահման և հանձնեք Ուկրաինայի զինված ուժերին»։

Ռուսաստանում

Ռուսաստանում արգելափակվել են նաև Voice of America, BBC, Deutsche Welle, Meduza, Radio Liberty կայքերը։ Բացատրությունն այն է, որ «նրանք կեղծիքներ են տարածում ամբողջ Ուկրաինայում»։

The Village կայքը փակել է իր ռուսական գրասենյակը՝ ասելով, որ «խմբագրությունն ապահով է և աշխատում է Վարշավայից»։

Ռուսական Znak. com անկախ պարբերականը հայտարարել է աշխատանքի դադարեցման մասին՝ «Ռուսաստանում ԶԼՄ-ների աշխատանքի համար վերջերս ի հայտ եկած մեծ թվով սահմանափակումների պատճառով»։

S7 Airlines-ը մարտի 5-ից փակում է բոլոր միջազգային չվերթները։ S7-ի ուղևորները կկարողանան տուն վերադառնալ գործընկեր ընկերությունների աջակցությամբ։

Եվրոպայում արգելափակված է կրեմլամետ Russia Today-ի հեռագրային ալիքը։

ՏԵՍԱՆՅՈՒԹ. Թել Ավիվի օդանավակայանում ռուսական ինքնաթիռներին ազդանշան են տալիս Ուկրաինայի դրոշով.

Ուկրաինայի իշխանությունները ՄԱԳԱՏԷ-ին տղեկացրել են, որ Զապորոժիեի ատոմակայանում բռնկված հրդեհը չի ազդել «հիմնական» սարքավորումների վրա, հայտնում է ՄԱԿ-ի Twitter-ը։ Կազմակերպության տվյալներով՝ ճառագայթման մակարդակի փոփոխության մասին հաղորդումներ չեն եղել։ Ուկրաինայի արտակարգ իրավիճակների պետական ​​ծառայությունը Facebook-ում գրում է, որ հրդեհը տարածվել է ուսումնական շենքում և արդեն մարվել է։ Ուկրաինայի արտակարգ իրավիճակների պետական ​​ծառայությունից հայտնում են, որ զոհեր և վիրավորներ չկան։ Ատոմակայանի ռադիացիոն ֆոնը չի տարբերվում հարևան բնակավայրերի տվյալներից։

 Ուկրաինայի էներգետիկայի նախարար Հերման Գալուշչենկոն ասել է, որ մարդկության պատմության մեջ ամենամեծ տեխնածին աղետի վտանգ կա։ Նախագահ Զելենսկին կոչ է արել համաշխարհային առաջնորդներին կանգնեցնել Ռուսաստանին «մինչ այն դառնա միջուկային աղետ»։

Ուկրաինայում մարտերի մասին

 Ուկրաինայի պաշտպանության նախարարությունը հայտնել է, որ Կիևի մերձակայքում գտնվող Գոստոմել ավիաբազայի մոտ 20 ռուսական ռազմական մեքենա է ոչնչացրել։ Այս փաստը հաստատել են ՆԱՏՕ-ի ռազմական փորձագետները, հայտնում է CNN-ը։ Մեքենաների վրա նկատվել է V նշանը, ինչը վկայում է, որ դրանք Բելառուսից ժամանած ռուսական զորքերի մասն են։ Տանկերի 40 կիլոմետրանոց շարասյունը, որը հայտնաբերվել էր մի քանի օր առաջ արբանյակային պատկերներով և շարժվում էր դեպի Կիև, մոտ էր Գոստոմել ավիաբազային։ Հայտարարվում էր, որ Գոստոմելի օդանավակայանը ռուսական զորքերի կողմից գրավվել է պատերազմի առաջին օրը՝ փետրվարի 24-ին։

Սևերոդոնեցկի ռմբակոծումը անցած գիշերվա ընթացքում.

Մեկնաբանություններ․ ԱՄՆ պետքարտուղարի տեղակալ, ԱՄՆ սենատոր, ՌԴ պաշտպանության նախկին նախարար

ԱՄՆ պետքարտուղարի քաղաքական հարցերով տեղակալ Վիկտորյա Նուլանդ. «Արևմուտքի նոր պատժամիջոցները Մոսկվայի նկատմամբ կչեղարկվեն, եթե Ռուսաստանը դադարեցնի պատերազմն Ուկրաինայում, եթե Ռուսաստանը դադարեցնի այս պատերազմը և օգնի վերականգնել Ուկրաինան, վերականգնի խաղաղությունը և ճանաչի նրա ինքնիշխանությունն ու տարածքային ամբողջականությունը, ինչպես նաև նրա գոյության իրավունքը»:

Ռուսաստանի նախկին արտգործնախարար Անդրեյ Կոզիրևը CNN-ին տված հարցազրույցում. «Սա բարբարոսական արարք է։ Նրանք, այսպես ասած, գահավիժում են ու իրենց հանգիստ են զգում թե՛ տանը, թե՛ դրսում։ Եվ դա, այսպես ասած, մեծացրեց նրանց ախորժակը, բայց, ցավոք, ոչ Ռուսաստանի կառուցման համար: Հիմա այս եղբայրասպան պատերազմով կործանում են բոլոր եղբայրական ժողովուրդների ապագան։ Սակայն նախագահ Պուտինի և արտգործնախարար Լավրովի դեմ պատժամիջոցները գրեթե ոչինչ չանել է նշաննակում: Որովհետև չեմ կարծում, թե նրանց անուններով որևէ տեղ ունեցվածք գրանցված է։ Դուք չեք կարողանա գտնել նրանց ունեցվածքը, նրանց ամեն ինչն այլ մարդկանց անունով է»:

Կոզիրևը Խորհրդային Միության փլուզումից հետո Բորիս Ելցինի օրոք Ռուսաստանի առաջին արտգործնախարարն էր։ Իր Twitter-ում նա բոլոր ռուս դիվանագետներին կոչ է արել հրաժարական տալ իրենց պաշտոններից՝ ի նշան բողոքի՝ Ուկրաինայում շարունակվող ռուսական ներխուժման դեմ։

ԱՄՆ սենատոր Լինդսի Գրեհեմը Fox-ի ուղիղ եթերում կոչ է արել  վերացնել Պուտինին։ «Ռուսաստանում ինչ-որ մեկը պետք է պատասխանատվություն ստանձնի և դուրս հանի այս տղային խաղից: Դուք մեծ ծառայություն կմատուցեք ձեր երկրին և աշխարհին: Հուսով եմ, որ ռուսական բանակում կգտնվի ավելի հաջողակ գնդապետ Շտաուֆենբերգ [նկատի ունի գերմանացի սպային, որին չհաջողվեց սպանել Ադոլֆ Հիտլերին 1944 թվականին]»:

Ռուսաստանում

Ռուսաստանում արգելափակվել է հայտնի Մեդուզա անկախ պարբերականը։ Մինչ այս արգելափակվել էին հայտնի անկախ լրատվամիջոցները՝ «Դոժդ» հեռուստաալիքը և «Էխո Մոսկվի»-ն, նրանց ստիպված դադարեցրել են աշխատանքը։

Ռուսաստանում, այնուամենայնիվ, նվազեցրել են արտարժույթի գնման գործառնությունների միջնորդավճարը՝ սկզբնական 30 տոկոսից մինչև 12 տոկոս։

Օգնություն Ուկրաինային

ԱՄՆ-ում երկրում գտնվող ուկրաինացիներին թույլ են տվել մնալ նույնիսկ վիզայի ժամկետի ավարտից հետո։ Միգրացիոն քաղաքականության ինստիտուտի ենթադրությամբ, ակնկալվում է, որ մոտ 30,000 ուկրաինացի կօգտվի այս հնարավորությունից:

 Airbnb-ն դադարեցնում է իր աշխատանքը Ռուսաստանում և Բելառուսում։

ՏԵՍԱՆՅՈՒԹ. Ուկրաինական ծագմամբ ամերիկացի դերասանուհի Միլա Կունիսը տեսանյութ է ձայնագրել՝ ի պաշտպանություն Ուկրաինայի, իր ամուսնու՝ Էշթոն Քաթչերի հետ. «Այսօր ես ավելի հպարտ եմ, քան երբևէ, որ ուկրաինացի եմ»: Նրանք 3 միլիոն դոլար են նվիրաբերել Ուկրաինային մարդասիրական աջակցության համար

ՏԵՍԱՆՅՈՒԹ. Ուկրաինայի տարբեր քաղաքներում տեղի բնակիչները բռնում են կողոպտիչներին և որպես հանրային պատիժ կապում փողոցում գտնվող սյուներին։ Այս տեսանյութը Խարկովից է. «Այո, ես ուզում էի դուրս բերել դեղատունը, թմրամիջոցները»

Վրաստանի նախագահը CNN-ին տված հարցազրույցում ուկրաինական ճգնաժամի մասին. «Կարծես թե Պուտինը պարզապես ձգտում է գրավել Ուկրաինայի մի քանի շրջաններ։ Հիմա կարծես նա ոչնչացնում է ողջ երկիրը։ Ինչ-որ իմաստով սա զանգվածային ոչնչացման պատերազմ է։ Պուտինը չէր ծրագրել, որ Ուկրաինան այդքան դիմադրի։ Զանգվածային հարձակման ծրագիր ուներ, հոգեբանորեն հաշվարկված, ռազմական ուժեր կիրառվեցին բոլոր կողմերից։ Բայց դա չստացվեց: Իհարկե, ռազմական առումով նա ունի գերազանցություն, որը վաղ թե ուշ կարող է աշխատել։ Բայց ուկրաինացի ժողովրդի և ղեկավարության վճռականությունն ու դիմադրությունն իսկապես հիացմունքի են արժանի»:

Հրդեհ Զապորոժիեի ԱԷԿ-ում

Զապորոժիեի ԱԷԿ-ը հրդեհվել է ռուսական զորքերի գիշերային գնդակոծությունից հետո։ Առավոտյան ժամը 6-ին հրդեհը մարվել է, երբ հրշեջներին թույլ են տվել մտնել կայան: Սա Եվրոպայի ամենամեծ ատոմակայանն է, այն արտադրում է Ուկրաինայի սպառած ողջ էլեկտրաէներգիայի 23%-ը։ Էներգոդարի քաղաքապետ Դմիտրի Օրլովը հայտնում է, որ Զապորոժիեի ատոմակայանում վիրավորներ կան։

Ուկրաինայի նախագահ Զելենսկի. «Ուկրաինայի տարածքում կա 15 միջուկային էներգաբլոկ։ Եթե ​​բոլորը պայթեն, սա ամբողջ Եվրոպայի տարհանումն է նշանակելու, ամեն ինչի վերջը, Եվրոպայի վերջը»։

 Ատոմային էներգիայի միջազգային գործակալությունը (ՄԱԳԱՏԷ) Twitter-ում Ուկրաինայի իշխանություններին հղումով հայտնել է, որ հիմնական ստորաբաժանումները դեռևս չեն տուժել հրդեհից։

ԱՄՆ-ն ակտիվացրել է միջուկային միջադեպերի արձագանքման թիմը և վերահսկում է իրավիճակը պաշտպանության նախարարության, ԱՄՆ միջուկային կարգավորման հանձնաժողովի և Սպիտակ տան հետ միասին: «Առայժմ ճառագայթման մակարդակը նորմալ է։ Կայանի ռեակտորները պաշտպանված են ամուր պաշտպանիչ կառույցներով»,- թվիթերում գրել է ԱՄՆ էներգետիկայի նախարար Ջենիֆեր Գրանհոլմը։

«Ատոմակայանում կարող է միջուկային աղետ տեղի ունենալ, եթե էլեկտրաէներգիան կամ ջուրն անջատվեն։ Եթե ​​ռուս զինվորականները ցանկանում են անջատել կայանը, նրանք պետք է գրավեն հաստատությունը, այլ ոչ թե ֆիզիկապես հարձակվեն դրա վրա՝ վտանգներից ելնելով», — CNN-ին ասել է ազգային անվտանգության վերլուծաբան Ջո Ցիրինցիոնը:

 Մեծ Բրիտանիայի վարչապետը հայտարարել է, որ առաջիկա ժամերին կհրավիրի ՄԱԿ-ի Անվտանգության խորհրդի արտակարգ նիստ։

Իրավիճակը պատերազմի իններորդ օրվա առավոտյան

Ուկրաինայի առանցքային քաղաքները հրթիռակոծության տակ են։

Նախնական տվյալներով՝ օրեր տևած մարտերից ու գնդակոծություններից հետո ռուսական զորքերը գրավել են Խերսոնը։

 Մարիուպոլն արդեն երկու օր գտնվում է շրջափակման և շարունակական գնդակոծության տակ։ Մարիուպոլի փոխքաղաքապետ Սերգեյ Օռլովը հայտարարել է, որ քաղաքը «շրջափակված է» ռուսական զորքերով և ռազմական և հումանիտար օգնության խիստ կարիք ունի:

Ուկրաինայի մեծությամբ երկրորդ քաղաքում՝ Խարկովում, վերջին 24 ժամում 34 խաղաղ բնակիչ է զոհվել։ Չորրորդ օրն է՝ մարտեր են, հրթիռակոծություններն ակտիվացել են։ Խարկովի քաղաքապետ Իգոր Տերեխովն ասել է, որ ռուս զինվորականները «միտումնավոր փորձում են ոչնչացնել ուկրաինացի ժողովրդին»՝ հարձակվելով քաղաքացիական օբյեկտների վրա. «Իրավիճակը չափազանց բարդ է։ Ինքնաթիռները անընդհատ թռչում են, հրթիռներ արձակում, նռնակներ գցում, հարվածում բնակելի շենքերին»։

Ռուսական զորքերը շարժվում են դեպի Օդեսա։

 Պենտագոնի խոսնակ Ջոն Քիրբին բարձր է գնահատել ուկրաինական բանակի դիմադրության մակարդակը։ «Նրանք պայքարում են փողոցներում և իրենց քաղաքներից դուրս, ոչ միայն խիզախորեն և հերոսաբար, նրանք օգտագործում են շատ ստեղծագործ մոտեցում», — CNN-ին ասել է Քիրբին:

Ռուսաստանի դեմ պատժամիջոցներ

 ԱՄՆ նախագահ Ջո Բայդենը հայտարարել է ռուս օլիգարխների դեմ լրացուցիչ պատժամիջոցների մասին։ Նոր ցուցակում ներառված են Պուտինի մերձավոր շրջապատից ութ հոգի և նրանց ընտանիքի անդամներ։ Նրանք կկտրվեն ԱՄՆ ֆինանսական համակարգից, ԱՄՆ-ում նրանց ակտիվները կսառեցվեն, իսկ ունեցվածքը կօտարվի։

ԱՄՆ-ը հայտարարել է ռուսական 42 ընկերությունների նկատմամբ «լիարժեք արգելափակման պատժամիջոցների մասին»։ Հիմնականում դրանք ինքնաթիռների և ռազմական տեխնիկայի արտադրությամբ զբաղվող ձեռնարկություններ են։

Հաագայի միջազգային տրիբունալի (ICC) մի խումբ քննիչներ մեկնել են Ուկրաինա։ Նրանք հետաքննություն կանցկացնեն Ռուսաստանի դեմ միջազգային խմբակային հայցի վերաբերյալ, որը մեղադրանք կառաջադրի հնարավոր ռազմական հանցագործությունների համար։

Եվրամիությունը ժամանակավոր պաշտպանություն կտրամադրի բոլոր փախստականներին, որոնք փախչում են Ուկրաինայի հակամարտությունից, հայտարարել է դաշինքի ներքին գործերի հանձնակատար Իլվա Յոհանսոնը։

 Գերմանիան պետք է անհապաղ սառեցնի ռուս օլիգարխների ակտիվները՝ որպես Ուկրաինա ներխուժելու համար Մոսկվայի դեմ պատժամիջոցների մաս, հինգշաբթի կոչ է արել Գերմանիայի էկոնոմիկայի նախարար Ռոբերտ Հաբեկը։

Մարտի 3-ի Ուկրաինայում պատերազմի ութերորդ օրվա մասին տեղեկատվությունը՝ այստեղ

Մարտի 2-ի Ուկրաինայում պատերազմի յոթերորդ օրվա մասին տեղեկատվությունը՝ այստեղ

Մարտի 1-ի Ուկրաինայում պատերազմի վեցերորդ օրվա մասին տեղեկատվությունը՝ այստեղ

Փետրվարի 28-ի Ուկրաինայում պատերազմի հիհգերորդ օրվա մասին տեղեկատվությունը՝ այստեղ

Փետրվարի 27-ի Ուկրաինայում պատերազմի չորրորդ օրվա մասին տեղեկատվությունը՝ այստեղ

Փետրվարի 26-ի Ուկրաինայում պատերազմի երրորդ օրվա մասին տեղեկատվությունը՝ այստեղ

Փետրվարի 25-ի Ուկրաինայում պատերազմի երկրորդ օրվա մասին տեղեկատվությունը՝ այստեղ

Փետրվարի 24-ի Ուկրաինայում պատերազմի առաջին օրվա մասին տեղեկատվությունը՝ այստեղ