«ՌԴ-ն չի ուզում թույլ տալ, որ Հայաստանը դուրս գա ՀԱՊԿ ուղեծրից»․ կարծիք Երևանից
«ՀԱՊԿ դռները բաց են ՀՀ համար»
«Բարեկամ երկրի և տարածաշրջանի ապագա անվտանգության շահերից ելնելով՝ ակնկալում ենք, որ ՀԱՊԿ շրջանակներում Հայաստանի հետ մեր գործընկերությունը լիովին կվերականգնվի»,- հայտարարել է ՌԴ ԱԳՆ պաշտոնական ներկայացուցիչ Մարիա Զախարովան և հավելել, որ այս փուլում «Երևանի վերադարձի համար դռները բաց են»։
Մինչ այս նույնաբովանդակ հայտարարությամբ էր հանդես եկել Ռուսաստանի նախագահի օգնական Յուրի Ուշակովը։ Նա ասել էր, թե կասկածի տակ չեն դնում «սեփական կուրսը որոշելու հայ գործընկերների իրավունքը», բայց նաև հիշեցրել, որ Երևանը դե յուրե շարունակում է մնալ ՀԱՊԿ անդամ՝ դրանից բխող բոլոր իրավունքներով և պարտավորություններով»։
Այս հայտարարությունները հաջորդեցին այն տեղեկությանը, որ Հայաստանի վարչապետ Նիկոլ Փաշինյանը չի մասնակցելու նոյեմբերի 28-ին Աստանայում կայանալիք ՀԱՊԿ գագաթնաժողովին։ Վարչապետի խոսնակը վերահաստատել էր՝ ՀԱՊԿ աշխատանքներին մասնակցությունը սառեցնելու հետ կապված ՀՀ դիրքորոշումը փոփոխության չի ենթարկվել:
Քաղաքագետ Արա Պողոսյանի դիտարկմամբ՝ Մոսկվայից հնչող հայտարարությունները վկայում են այն մասին, որ ՀԱՊԿ ռազմական դաշինքում ճգնաժամ է։
«Այժմ ՌԴ-ն խնդիր ունի վերականգնելու կազմակերպության հեղինակությունը և թույլ չտալու, որ Հայաստանը դուրս գա ՀԱՊԿ ուղեծրից և ՌԴ ազդեցության գոտուց»,- ընդգծել է նա։
Մոսկվայից պնդում են՝ ԱՄՆ-ն «Հայաստանը ենթարկեցնելու» նպատակ ունի
ՌԴ Արտաքին հետախուզության ծառայությունը հայտարարել է․
«ԱՄՆ-ը չի հրաժարվում ժողովրդավարացում պարտադրելու ծրագրերից՝ հետապնդելով Հայաստանին լիովին ենթարկեցնելու նպատակ։ Նման պրակտիկան այլ երկրներում և տարածաշրջաններում ցույց է տվել, որ դա կործանարար է։ Օրինակները բազմաթիվ են Մերձավոր Արևելքում, Լատինական Ամերիկայում և Աֆրիկայում: Ամենաուշագրավը Ուկրաինայի ներկայիս վիճակն է»։
Հետախուզական ծառայության փոխանցմամբ՝ ԱՄՆ Պետքարտուղարությունը սկսել է մտածել՝ ինչպես թույլ չտալ, որ «Հայաստանը չհեռանա ժողովրդավարական ճանապարհից»։ Ըստ հաղորդագրության՝ կան նաև տեղեկություններ, որ Պետքարտուղարությունը կասկածում է Արևմուտքի հետ մերձեցման ուղղությամբ Հայաստանի կուրսի անշրջելիությանը։
«Վաշինգտոնը ելնում է նրանից, որ հայերը, որոնք «փող հաշվել գիտեն», ժամանակի ընթացքում անխուսափելիորեն կհասկանան այն անուղղելի վնասը, որը սպառնում է իրենց ավանդական տարածաշրջանային կապերի խզումից»,- նշում է ծառայությունը։
Բացի այդ, խոսվում է այն մասին, որ Վաշինգտոնը սկսել է առաջ մղել ՀՀ արևմտամետ կուսակցություններին՝ 2026 թ․-ին կայանալիք խորհրդարանական ընտրությունների արդյունքում նրանց ԱԺ-ում տեսնելու ակնկալիքով։
Մեկնաբանություն
Քաղաքագետ Արա Պողոսյանը Ռուսաստանից հնչող հայտարարությունների տողատակերում Երևանին Մոսկվայի ազդեցության տակ պահելու միտումներ է տեսնում։ Հանրային ռադիոյի եթերում Պողոսյանը մտահոգիչ է որակել Արևմուտքի «քայքայիչ գործունեության» մասին ՌԴ Արտաքին հետախուզական ծառայության հայտարարությունը։
Շեշտել է՝ փաստորեն Դաշնությունն այլևս չունի այնպիսի ինստիտուտներ, որոնց հայտարարությունները կամ պարզաբանումները Հայաստանում, ՌԴ-ում և աշխարհում լուրջ կընկալվեին․
«Այժմ ձևավորված ռուս-ամերիկյան սառը պատերազմի մթնոլորտը մեզ առիթ է տալիս ենթադրելու, որ սա հիմնված է քարոզչական այն թեզի վրա, որը պետք է որպես ռուսական փափուկ ուժ կիրառվի նաև Հայաստանի հանրության հոգեբանության վրա»:
Պողոսյանի կարծիքով՝ ՌԴ-ն դուրս է մղվում Հարավային Կովկասից և այստեղ տեղի ունեցող գործընթացներից, որոնց շրջանում ամենակարևորը հայ-ադրբեջանական հարաբերությունների կարգավորումն է։
Ասում է՝ նմանատիպ քարոզչական հնարքներով Մոսկվան փորձում է դիրքավորվել տարածաշրջանում։ Այնինչ պետք էր դիրքերն ամրապնդել՝ ժամանակին արձագանքելով և քայլեր ձեռնարկելով ՀԱՊԿ անդամ Հայաստանի ինքնիշխան տարածքի վրա Ադրբեջանի հարձակումների ժամանակ։
«Ռուսաստանի անգործությունը որոշակի վակուում առաջացրեց տարածաշրջանում։ Իսկ այդ ընթացքում Հայաստանին օգնության հասան Հնդկաստանն ու Ֆրանսիան»,- պարզաբանում է նա։
Քաղաքագետի խոսքով՝ Մոսկվայից հնչող հայտարարությունները լիովին տրամաբանական են, քանի որ իրավական առումով ՀՀ-ն դեռևս հանդիսանում է կազմակերպության մաս։ Եվ եթե դուրս գա ՀԱՊԿ-ից, դա կունենա ինչպես քաղաքական, այնպես էլ բարոյական հետևանքներ։
«Առաջին հերթին հարված կլինի կազմակերպությանը, որը գործում է ՌԴ հովանու ներքո։ Եվ կարծես թե հենց Ռուսաստանն է այս կազմակերպության անդամների հովանավորն ու անվտանգության երաշխավորը: Ու հիմա ՌԴ-ն իր սեփական քաղաքականության արդյունքում բախվել է մի իրավիճակի, երբ ի վիճակի չի եղել իրացնել իր անդամներից մեկի անվտանգության ապահովման գործառույթը»,- մանրամասնել է նա և հավելել, որ ռուսական կողմը փորձում է վերականգնել ՀԱՊԿ ռազմական դաշինքի հեղինակությունը։
Հետևեք մեզ — Facebook | Youtube | Telegram
«ՀԱՊԿ դռները բաց են ՀՀ համար»
