Հայաստանում ընդդիմությունը պայքարում է ընդդիմության դեմ։ Պայքարն ընթանում է ընտրություններին խորհրդարան անցած կուսակցությունների միջև

«Բարգավաճ Հայաստան» և «Լուսավոր Հայաստան» կուսակցությունների առաջնորդները, որոնք դեկտեմբերի 9-ին կայացած Ազգային ժողովի ընտրություններին խորհրդարան են անցել, փոխադարձ մեղադրանքներով են հանդես եկել։ Քաղաքական կուսակցությունների միջև իսկական լեզվակռիվ է բռնկվել:

Ինչի՞ց է ամեն ինչ սկսվել

Ամեն ինչ սկսվեց ընտրություններին մանակցող քաղաքական ուժերի առաջնորդների նախընտրական դեբատներից։ Այն ժամանակ «Լուսավոր Հայաստան» կուսակցության առաջնորդ Էդմոն Մարուքյանը «Բարգավաճ Հայաստան» կուսակցության առաջնորդ Գագիկ Ծառուկյանից հետաքրքրվեց, թե ինչու է նա՝ մեծահարուստ գործարարը, մասնակցում ընտրություններին։ Հարցն ակնհայտորեն դուր չեկավ Ծառուկյանին։

«Ես քաղաքականություն եմ մտել ոչ թե պաշտոն ստանալու համար, ինչպես ուրիշները։ Բոլորը գիտեն, թե ես ինչից եմ սկսել և ինչի եմ հասել։ Ես ամեն ինչ ունեմ և ամեն ինչի ինքս եմ հասել։ Ես տարբեր երկրներից ներդրողներ եմ բերում։ Ես ուզում եմ օգտակար լինել», — այն ժամանակ պատասխանել էր Ծառուկյանը։

Ի պատասխան Էդմոն Մարուքյանն, այնուամենայնիվ, կոչ էր արել Ծառուկյանին հեռանալ ակտիվ քաղաքականությունից և բիզնեսով զբաղվել։ ԼՀԿ առաջնորդն ակնարկել էր նաև, որ Ծառուկյանն ու նրա քաղաքական ուժը երկար տարիներ կեղծ ընդդիմության դեր են կատարել։

• Հայկական խորհրդարանում մեծամասնությունը հեղափոխության առաջնորդ Փաշինյանի դաշինքը կունենա

• Հայաստանում նոր իշխանություն է․ արդյո՞ք Ադրբեջանի հետ խաղաղության հեռանկարներ կան

• Հայաստանի նոր խորհրդարանի պահպանումը հարկատուների վրա ավելի թանկ կնստի

Շարունակություն՝ ընտրություններից հետո

Արտահերթ խորհրդարանական ընտրություններից հետո յոթերորդ գումարման Ազգային ժողով անցավ ոչ միայն հայկական հեղափոխության առաջնորդի «Իմ քայլը» դաշինքը, այլ նաև «Բարգավաճ Հայաստան» և «Լուսավոր Հայաստան» կուսակցությունները։

Դա առիթ դարձավ, որպեսզի լեզվակռիվն ու հեռակա մեղադրանքները շարունակվեն։ «Ծառուկյան» խմբակցության քարտուղար Վահե Էնֆիաջյանը մեղադրանքներ առաջ քաշեց Էդմոն Մարուքյանի հասցեին։ Նա հայտարարեց, որ Մարուքյանը 2012 թ-ի խորհրդարանական ընտրություններին իբր փաստաթղթեր է կեղծել ընտրություններին մասնակցելու հնարավորություն ունենալու համար։

Էնֆիաջյանը հայտարարեց նաև, որ քաղաքականությունում Էդմոն Մարուքյանը Հայաստանի նախկին նախագահ Սերժ Սարգսյանի փեսա Միքայել Մինասյանի «պրոյեկտն» է։

Էդմոն Մարուքյանն ու նրա կողմնակիցները հերթական անգամ հայտարարեցին, որ խոշոր գործարարները չպետք է քաղաքականությամբ զբաղվեն։ Մարուքյանի կարծիքով՝ քաղաքական նոր իրողություններում հին ռեժիմի քաղաքական կուսակցությունները տեղ չունեն։

«Լուսավոր Հայաստան» կուսակցության առաջնորդ Մարուքյանը համարում է, որ իր կուսակցությանը հալածում են և դրա պատճառը դեբատների ժամանակ տեղի ունեցած լեզվակռիվն է.

«Բոլորը հարցի հնարավորություն ունեին։ Ես իմ հարցը տվեցի Գագիկ Ծառուկյանին։ Քանի որ հին համակարգը փլվել է։ Հեղափոխությունն այդ համակարգի դեմ էր, որի ներկայացուցիչ է Ծառուկյանը»։

Մարուքյանն ընտրություններից հետո գործարար Ծառուկյանին կրկին մեղադրեց, որ նա կեղծ ընդդիմություն է եղել․

«Դուք ապակողմնորոշել եք բոլոր ընդդիմադիր ուժերին, բայց մեզ չեք կարող։ Սա ուրիշ աշխարհ է։ Ես դասական հարց եմ տվել, որը դուք ոչ մի կերպ չեք կարող մարսել։ Դրա փոխարեն անձնական բնույթի վիրավորանքներ են հնչում»։

Կուսակցությունների միջև վեճը չի ավարտվել և, ըստ ամենայնի, կշարունակվի Ազգային ժողովում։ Պատգամավորներն իրենց աշխատանքին կանցնեն Ամանորից հետո։