Հայաստանում կասեցվել է հազարից ավելի ընկերությունների աշխատանքը պարետատան սահմանած կանոնների խախտման պատճառով

Հայաստանում մայիսի 29–ին կասեցվել է 1156 ընկերությունների աշխատանքն արտակարգ դրության ժամանակահատվածում պարետատան սահմանած աշխատանքային նորմերի խախտման համար։

Արտակարգ դրության ռեժիմը երկարաձգվել է մինչև հունիսի 13–ը, երկրում կորոնավիրուսով վարակվածների օրական ռեկորդային աճ է գրանցվում։ Մայիսի 29–ի դրությամբ վարակվածների թիվն ավելացել է 460–ով, ընդհանուր թիվը 8 676 է։ Մահացել է ևս 10 մարդ, համաճարակի մեկնարկից ի վեր՝ 120 մարդ։

Կառավարությունը հայտարարել է, որ իր խնդիրը կարանտինի ռեժիմին չվերադառնալն է, սակայն այդպիսի հնարավորություն չի բացառվում։ 

Ինչպես հայտարարել է վարչապետը, ամեն ինչ կախված է լինելու ինտենսիվ թերապիայի կարիք ունեցող անձանց թվից։ Բուժհաստատություններում նոր տեղեր են ստեղծվում ծայրահեղ վիճակում գտնվող հիվանդներին ինտենսիվ թերապիա տրամադրելու համար։ 

Վարակի դեմ պայքարն այժմ ընթանում է նոր վարքականոնների և աշխատանքային նորմերի պահպանման նկատմամբ վերահսկողության վերահսկման տեսքով, որոնք պարետատան կողմից սահմանվել են երկրի բոլոր բնակիչների և վերագործարկված բիզնեսի համար։ 

Առաջին անգամ խախտում կատարած ընկերությունների գործունեությունը կասցեվում է 24 ժամով։ Սակայն երկրորդ անգամ աշխատանքը դադարեցվում է ավելի երկար ժամանակով։

• Ինչպե՞ս են տարեցները տանում մեկուսացումը
• Կարծիք․ Հայաստանին մեկ շաբաթից աղետ է սպառնում վարակվածների թվի կտրուկ աճի պատճառով

Ի՞նչ ընկերություններ են փակվել և ինչո՞ւ

Ողջ Հայաստանի տարածքում 45 սրճարան և ռեստորան է փակվել աշխատանքային նոր նորմերի խախտման պատճառով։ 

Որոշ խախտողներ սոցցանցերի իրենց էջերում հաղորդում են, որ չեն աշխատելու առաջիկա 24 ժամում։ 

Հիմնական խախտումը, որը գրանցվել է առողջապահության և աշխատանքի տեսչական մարմնի կողմից, աշխատակիցների մոտ դիմակների բացակայությունն է։

Բացի այդ, պարետատունը պահանջում է չափել մարդկանց ջերմությունն, ապահովել սոցիալական հեռավորություն սեղանների միջև, առանձին փակ աղբամաններ տեղադրել դիմակների և ձեռնոցների համար։

«Պարետի պահանջների կատարումը պարտադիր է։ Խախտումներ կատարած ընկերությունների նկատմամբ պատասխանատվության խիստ միջոցներ և տուգանքներ կկիրառվեն։ Կրկնակի խախտման դեպքում օբյեկտի գործունեության սահմանափակման ժամկետը կերկարաձգվի», — ասված է կառավարության հաղորդագրությունում։ 

Ընդհանուր առմամբ, մայիսի 29–ի դրությամբ ավելի քան 17 հազար ստուգում է իրականացվել։

Ոստիկանության ռեյդերը

Երևանի փողոցներում նույնպես անսպասելի ստուգումներ են անցկացվում․ ոստիկանությունը կանգնեցնում է պաշտպանիչ դիմակ չունեցողներին։

Միայն մայիսի 28–ին կազմվել է խախտման 863 ակտ, հաղորդել է ոստիկանապետ Արման Սարգսյանը։

Հատուկ անցակետեր են տեղադրված ճանապարհներին, որոնք ստուգում են մեքենաները։

Այժմ Հայաստանում ուղևորները պետք է դիմակ կրեն ոչ միայն հանրային տրանսպորտում, այլև անձնական ավտոմեքենաներում, եթե վարորդից բացի մեքենայում էլի մարդ կա։

Այս պահանջը շատերի մոտ է վրդովմունք առաջացրել։ Սոցցանցերում ամենաակտիվ քննարկումը վերաբերում էր նրան, որ դիմակներ պետք է կրել անգամ այն ժամանակ, եթե երկրորդ ուղևորն ընտանիքի անդամ է։

Այս կանոնի անհրաժեշտությունը բացատրվում է նրանով, որ ոստիկանության համար դժվար է հասկանալը, թե ով է մեքենայի մեջ, եթե այն չի կանգնեցրել մեքենան։ Այդ պատճառով էլ մեքենայում դիմակ կրելու կանոնը տարածվում է նաև ընտանիքի անդամների վրա։

Ոստիկանապետը հիշեցրել է, որ դիմակ կրելը պարտադիր է նաև կանգառներում։ Իսկ տրանսպորտ նստելիս անպայման պետք է ախտահանել ձեռքերը։

Ինչ վերաբերում է տաքսիներին, ապա դրանցում դիմակ կրելը նույնպես պարտադիր պայման է։ Վարորդի կողքը նստելն արգելված է․ միայն հետևի նստարանին կարելի է։

Ոստիկանապետը հայտարարել է, որ վերահսկողությունը շարունակվելու է․

«Մենք ստուգումներ ենք անցկացնում ոչ թե մարդկանց տուգանելու, այլ համընդհանուր անվտանգությայն կանոնները պահպանելու համար»։

Դիմակի բացակայության համար 10 հազար դրամ ($20) տուգանք է նախատեսվում։

«Օրական տասնյակ մահ ունենալը նորմալ չէ»

Կորոնավիրուսով վարակվածների թվի ամենօրյա ռեկորդային աճի հետ կապված իրավիճակը մեկնաբանել է Հայաստանի նախագահ Արմեն Սարգսյանը․

«Ինձ պարտավորված եմ զգում․․․ ևս մեկ անգամ դիմել մեր բոլոր հայրենակիցներին՝ կոչ անելով պահպանել սոցիալական հեռավորության բոլոր կանոները։ Չեմ ուզում` մեր հայրենակիցներից որևէ մեկը մտածի, որ եթե օրական 10 կամ ավելի քիչ մարդիկ են մահանում, կարելի է սա համարել սովորական կյանք։ Սա հսկայական դժբախտություն է»: