Հայաստանում այլևս չեն մեկուսացնի երկիր մուտք գործող քաղաքացիներին և հյուրերին

Հայաստանում այլևս չեն մեկուսացնի այլ երկրներից մուտք գործող բոլոր անձանց։ Մինչև այս պահը մարդկանց պետության հաշվին տեղավորում էին բարձր դասի, հաճախ՝ հինգաստղանի հյուրանոցներում, ապահովում երեքանգամյա սննդով։

Այժմ յուրաքանչյուրն ինքն է որոշելու, թե որտեղ է անցկացնելու իր երկշաբաթյա կարանտինը։

Սահմանը հատելուց անմիջապես հետո հենց օդանավակայանից մարդկանց կուղեկցեն տուն՝ բնակության հասցեով, կամ էլ ցանկացած այլ վայր, ուր նրանք կորոշեն։

 Հայաստանում որոշել են նաև այլևս չմեկուսացնել կորոնավիրուսով վարակված անախտանիշ անձանց։ Տնային պայմաններում վարակվածների առողջությանը հետևելու են քաղաքային պոլիկլինիկաների, գյուղական ամբուլատորիաների և առողջության կենտրոնների բժիշկները։

Այդ որոշումը պայմանավորված է երկրում վարակվածների ընդհանուր թվի և, համապատասխանաբար, ծանր հիվանդների թվի աճի հետ։

Կառավարությունը հյուրանոցներում մարդկանց մեկուսացման վրա ծախսել է մոտ 1,5 մլն դոլար։

Իսկ ինքնամեկուսացման ռեժիմի խախտման համար նախատեսվում է 700 հազար դրամ (1,5 հազար դոլար) տուգանք, հնարավոր է նաև մինչև 3 ամիս կամ մինչև չորս տարի ազատազրկման կիրառում։ Ամեն ինչ կախված է խախտման ծանրությունից և դրա առաջացրած հետևանքներից։

Մայիսի 22–ին Հայաստանում գրանցվել է վարակման 322 նոր դեպք։ Ընդհանուր առմամբ 5 606 վարակված կա։ Ապաքինվել է 2 874 մարդ, շարունակում է բուժվել 2952 մարդ։ 74 հիվանդի կյանք փրկել չի հաջողվել։ 

Բոլոր մանրամասները․ ինչպե՞ս էր նախկինում և ինչպես է հետագայում իրականացվելու ինքնամեկուսացման ռեժիմը։

• Հայաստանում կորոնավիրուսով վարակման կտրուկ աճ է գրանցվել, միաժամանակ գործարկվել է հանրային տրանսպորտը, բացվում են մանկապարտեզները
• Քաղաքական գործիչները՝ կորոնավիրուսի մասին։ Ինչո՞ւ է Հայաստանը վարակվածների թվով առաջատարը տարածաշրջանում

Ինչպե՞ս էր նախկինում

Հայաստանի կառավարությունը պայմանավորվածություն ունի հյուրանոցների և հյուրատների հետ այն մարդկանց տեղավորման վերաբերյալ, որոնք շփվել են վարակվածների կամ այլ երկրներից ժամանածների հետ։ 

Էկոնոմիկայի նախարարության գլխավոր քարտուղար Արմեն Խաչատրյանը պատմել է, որ ընդհանուր ներգրավվել է 45 հյուրանոցային օբյեկտ։ Դրանցից միայն 9–ն են իրենց ծառայություններն անհատույց տրամադրել՝ որպես բարեգործություն։ Մնացած 36–ին կառավարությունը վճարել է։

Ըստ մայիսի 14–ի տվյալների՝ քաղաքացիների մեկուսացումը կառավարության համար արժեցել է 620 մլն 797 հազար դրամ, իսկ սնունդը՝ 125 մլն 997 հազար դրամ։

Հյուրանոցներում քաղաքացիների մեկուսացման թեման հաճախ է քննարկվել Ֆեյսբուքի հայկական տիրույթում։ Դեռևս կարանտինի սկզբնական շրջանում սոցցանցերում տեսանյութ էր հրապարակվել, որտեղ երևում է, թե ինչպես են կերակրում մեկուսացված անձանց Հայաստանի ամենաթանկ հյուրանոցներից մեկում՝ Golden Palace–ում։ 

Այնուհետև մեկուսացվածները նույնպես սոցցանցերում արտահայտվում էին, որ գոհ են պայմաններից և իրենց նկատմամբ սպասարկող անձնակազմի և բուժաշխատողների վերաբերմունքից։ Գրում էին, որ իրենց երեքանգամյա սնունդ են տալիս՝ հաշվի առնելով նախասիրությունները։

Ինչպես է լինելու հիմա 

Փոխվարչապետ, պարետ Տիգրան Ավինյանի որոշմամբ՝ արտասահմանից Հայաստան ժամանողներին կիրազեկեն երկշաբաթյա ինքնամեկուսացման մասին։

Նրանք այն կարող են անցկացնել իրենց համար հարմար վայրում, գլխավոր պայմանը այլոց հետ չշփվելն է։

Մեկուսացվածներին հետևելու են բուժաշխատողներ, ոստիկանության և ԱԻՆ աշխատակիցներ։

Կարանտինի պահպանման վերահսկողությանը կօգնի հատուկ ծրագիրը, որը որոշում է մարդկանց գտնվելու վայրը բջջային հեռախոսի հավելվածի միջոցով։

Բոլոր ինքնամեկուսացվածները ժամանակ առ ժամանակ հաղորդագրություն կստանան իրենց հեռախոսներին։ Ի պատասխան նրանք պետք է լուսանկարվեն և իրենց նկարն ուղարկեն՝ հաստատելով, որ ինքնամեկուսացման ռեժիմը չեն խախտել։