«Իրանը ողջունում է «Խաղաղության խաչմերուկ» նախագիծը»․ ԱԳ նախարար
Իրանի ԱԳ նախարարը Երևանում
Իրանը ողջունում է Հայաստանի վարչապետի ներկայացրած «Խաղաղության խաչմերուկ» նախագիծը։ Երևանում այդ մասին հայտարարել է իսլամական հանրապետության արտգործնախարար Հոսեյն Ամիր Աբդոլլահիանը։
Նրա գլխավորած պատվիրակությունն այսօր է Հայաստան ժամանել։ ՀՀ արտգործնախարար Արարատ Միրզոյանի հետ առանձնազրույցից հետո գործընկերները հանդես են եկել համատեղ մամուլի ասուլիսով։
Քննարկվող թեմաների շարքում տարածաշրջանի հաղորդակցությունների բացումն առանձնացրել է նաև Հայաստանի ԱԳ նախարարը։ Վկայակոչելով նույն նախագիծը՝ Արարատ Միրզոյանն ուրախությամբ արձանագրել է, որ «տարածաշրջանի հաղորդակցության ուղիների լիարժեք շահագործման հարցում ՀՀ և Իրանի որդեգրած քաղաքականությունները, մոտեցումները լիովին համահունչ են»։
Արարատ Միրզոյանի և Հոսեյն Ամիր Աբդոլլահիանի համատեղ ասուլիսի կարևոր դրվագները
«ՀՀ-ն լրջորեն քայլեր է ձեռնարկում խաղաղության հասնելու համար»
Նման արձանագրում է արել իրանցի պաշտոնյան։ Անդրադառնալով Ադրբեջանի ԱԳ նախարար Բայրամովի հետ նախօրեին ունեցած հեռախոսազրույցին՝ ասել է՝ «նրանք ևս ողջունում են կայուն խաղաղության հասնելը»։
Եվս մեկ անգամ հայտարարել է՝ Իրանն աջակցում է Հայաստանի տարածքային ամբողջականությանն ու ինքնիշխանությանը։ Նաև նշել, որ «Իրանն ուզում է, որ խաղաղությունն ապահովվի տարածաշրջանաին երաշխավորների շնորհիվ»։
«Առանց արտաքին միջամտության, Իրանի, Թուրքիայի և ՌԴ միջոցով՝ 3+3 ֆորմատով կարող ենք իրատեսական առումով դիտարկել ՀՀ և Ադրբեջանի միջև կայուն խաղաղության հաստատումը»,- ասել է նա։
Իրանի արտգործնախարարը չի պատասխանել հարցին՝ արդյո՞ք երկիրը պատրաստ է ստանձնել խաղաղության պայմանագրի երաշխավորի դերը։ Չի անդրադարձել նաև «Զանգեզուրի միջանցքի» վերաբերյալ ադրբեջանական կողմի դիրքորոշման փոփոխության մասին հարցին։
«Խաղաղության գործընթացում ամենամեծ ներդրումներից մեկն Իրանինն է»
Հայաստանի արտաքին քաղաքական գերատեսչության ղեկավարի կարծիքն է։ Հիշեցրել է՝ Իրանը հստակ ուղերձներ է հղել, դիրքորոշում հայտնել ինչպես խաղաղության հաստատման, այնպես էլ Հայաստանի տարածքային ամբողջականության և սահմանների անձեռնմխելիության մասին։
«Սա թերևս լավագույնն է, որ այս պահին կարող է արվել խաղաղության գործընթացի համար»,- հայտարարել է Արարատ Միրզոյանը։
Միրզոյանի խոսքով՝ տարբեր դերակատարներ կարող են նաև հանդիպումներ նախաձեռնել, սակայն «վճռականորեն, հաստատակամ կերպով նշելով և ամրագրելով այն սկզբունքները, որոնց վրա պետք է հենված լինի այդ խաղաղությունը»։
Հայ-իրանական երկկողմ օրակարգի մասին
«Թեհրանի համաձայնությունը հայտնեցինք ՀՀ գլխավոր հյուպատոսությունը Թավրիզում հիմնելու հետ կապված»,- ամփոփելով հանդիպման արդյունքները՝ հայտարարել է Հոսեյն Ամիր Աբդոլլահիանը։
Նա հույս է հայտնել, որ 2024 թ․-ի առաջին շաբաթների ընթացքում Թավրիզում տեղի կունենա հյուպատոսության բացման պաշտոնական արարողությունը, որին ներկա կլինի նաև հայ գործընկեր Արարատ Միրզոյանը։
Երկկողմ հարաբերությունների զարգացումն ու վերջին տարիներին ձեռքբերված պայմանավորվածությունները «շատ դրական» է գնահատել։ Տեսնում է նաև հնարավորություն զարգացնելու համագործակցությունը երկու երկրների խորհրդարանների, ինչպես նաև պետական և մասնավոր հատվածների միջև։
Իրանի ԱԳ նախարարը կարևորել է Հյուսիս-հարավ տարանցիկ ուղու գործարկումն ու հայտարարել, որ իրանական կողմը պատրաստ է «հետևողական լինել դրա զարգացմանը»։
Հայաստանի արտգործնախարար Արարատ Միրզոյանի փոխանցմամբ՝ իրանցի գործընկերոջ հետ քննարկել են տնտեսական, էներգետիկ, տրանսպորտային, բարձր տեխնոլոգիաների և մյուս ոլորտներում երկկողմ փոխգործակցությունը։
«Վերահաստատել ենք երկկողմ առևտրաշրջանառության ծավալները սկզբում 1, հետո տարեկան 3 մլրդ դոլարի հասցնելու պատրաստակամությունը»,- ընդգծել է նա։
Միրզոյանի դիտարկմամբ՝ ընթացիկ տարվա կարևոր ձեռքբերում կարելի է համարել «Գազ՝ էլեկտրաէներգիայի դիմաց» ծրագրի երկարաձգման մասին պայմանագրի ստորագրումը։
«Լիահույս ենք, որ համատեղ քայլերի արդյունքում առաջիկայում շոշափելի առաջընթաց կտեսնենք և ավարտին կհասցվեն Իրան-ՀՀ էլեկտրահաղորդման երրորդ գծի շինարարական աշխատանքները»,- ասել է ՀՀ արտգործնախարարը։
Հետևեք մեզ — Facebook | Youtube | Telegram
Իրանի ԱԳ նախարարը Երևանում
