Եվրոպական դատարանն Ադրբեջանին տուգանել է ևս 118 հազար եվրոյով
Մարդու իրավունքների եվրոպական դատարանը հրապարակել է Ադրբեջանին վերաբերող իր հերթական վճիռները։ Դատարանը հայցերի մեծ մասը հիմնավորված է համարել և Ադրբեջանի կառավարությանը պարտավորեցրել է հայցվորներին ավելի քան 118 հազար եվրո փոխհատուցում վճարել։
- Եվրոպական դատարանն Ադրբեջանին տուգանել է ևս յոթ հայցով
- Վրաց-աբխազական հակամարտություն․ լուծում չի նշմարվում, ինչպես նաև բանակցություններ
- Եվրամիությունն ու ԱՄՆ-ն պատժամիջոցներ են սահմանել ռուս պաշտոնյաների դեմ Նավալնու կալանքի համար
«Մեդիայի մոնիթորինգի ինստիտուտն» ընդդեմ Ադրբեջանի
Ադրբեջանցի լրագրող Մեհման Ալիևն, ինչպես նաև Սամիր Իսմայիլովն ու Էմին Հուսեյնովը հայց են ներկայացրել Ադրբեջանի կառավարության դեմ՝ հայտարարելով, որ երկրի արդարադատության նախարարությունը ոտնահարել է 2009 թ-ին հիմնադրված «Մեդիայի մոնիթորինգի ինստիտուտի» գրանցման իրավունքը։
Նախարարությունից մերժում ստանալուց հետո հայցվորները դիմել են երկրի բոլոր դատական ատյաններ, սակայն դատավորները նախարարության որոշումն ուժի մեջ են թողել։
Այս գործով Եվրադատարանը վճռել է, որ խախտվել է հայցվորների՝ միավորվելու իրավունքը։ 12 հայցվորներից յուրաքանչյուրին պետք է 4500 եվրո փոխհատուցում տրամադրվի, իսկ իրավաբանական ծախսերի համար՝ 6000 եվրո։
Այլ կերպ ասած՝ այս գործով Ադրբեջանի կառավարությունը տուգանվել է 60 հազար եվրոյով։
Միավորվելու իրավունքի ևս մեկ խախտում
«Էլչին Աբդուլաևն ու մյուսներն ընդդեմ Ադրբեջանի» գործում դատարանը նույնպես խախտված է համարել հայցվորների միավորվելու իրավունքը։
Վճռի համաձայն՝ Ադրբեջանի կառավարությունը հայցվորներին կվճարի ընդհանուր առմամբ 28 հազար 60 եվրո։
Այս գործի հայցվորներ Աբդուլաևն ու Նուրմամեդովը հայտարարել են, որ իրենք հիմնել են «ՄԻԱՎ-ՁԻԱՀ և տուբերկուլյոզով հիվանդների վերկանգնման և պաշտպանության կենտրոն», սակայն արդարադատության նախարարությունը հրաժարվել է իրենց գրանցել։ Այնուհետև տեղական դատարանների բոլոր ատյաններն ուժի մեջ են թողել նախարարության որոշումը։
Լապշինին 30 հազար եվրո կվճարվի
Բավարարվել է բլոգեր Ալեքսանդր Լապշինի հայցն ընդդեմ Ադրբեջանի։ Մարդու իրավունքների եվրոպական դատարանը վճռել է, որ հայցվորի նկատմամբ խախտվել է (սուբստանտիվ և ընթացակարգային խախտումներ) Եվրոպական կոնվենցիայի 2-րդ հոդվածը (ապրելու իրավունք)։
Ադրբեջանի կառավարությունը Լապշինին 30 հազար եվրո փոխհատուցում կվճարի։
Իսրայելի, Ռուսաստանի և Ուկրաինայի քաղաքացի Ալեքսանդր Լապշինը ձերբակալվել է՝ առանց Ադրբեջանի իշխանության թույլտվության Արցախ այցելելու համար։ Այնուհետև նա ազատազրկվել է և որոշ ժամանակ անց ազատ արձակվել։
