«Ելնելով վաղվա Հայաստանի կարիքներից». Երևանում անցկացվել է տեխնոլոգիական գագաթնաժողով
Orion Summit տեխնոլոգիական գագաթնաժողովը Հայաստանում
Հայաստանը ՏՏ ոլորտում հաջողելու համար մեծ ներուժ ունի: Սա Orion Summit տեխնոլոգիական գագաթնաժողովի ոչ միայն կազմակերպիչների, այլև տարբեր երկրներից եկած մասնակիցների տեսակետն է:
Հունիսի 22-ին Երևանում մեկնարկած գագաթնաժողովին մասնակցում են տեխնոլոգիաների, ֆինանսների, բիզնեսի և այլ ոլորտներում միջազգային ճանաչում ունեցող ընկերությունների ներկայացուցիչներ, այդ թվում՝ հիմնադիրներ:
Գագաթնաժողովի մանրամասները, Հայաստանի հեռանկարները և ոչ միայն։
Orion Summit-ն անցկացվում է առաջին անգամ: Տեխնոլոգիական գագաթնաժողովի նպատակը հայկական ստարտափներին աջակցելն է, նրանց համաշխարհային ընկերությունների տեսադաշտում հայտնվելու հնարավորություն տալը:
Գագաթնաժողովի ընթացքում քննարկվել են տեխնոլոգիական աշխարհի ամենաարդիական թեմաները: Այդ շարքում հատուկ ուշադրության են արժանացել ապագա հայկական Unicorn ընկերությունների ստեղծման հնարավորությունները։ Խոսքը գնում է ստեղծման պահից 10 տարվա ընթացքում 1 միլիարդ դոլարի արժեքը հատած մասնավոր ստարտափ ընկերությունների մասին։ Քննարկվել է նաև «արագ աճող հայկական շուկայի կառուցումը» թեման, «Թվային Ջուղա ցանցի» մեկնարկը:
Digital Julfa Network (Թվային Ջուղա ցանց) նախաձեռնությունն, ըստ կազմակերպիչների, պետք է համախմբի հայկական տեխնոլոգիական, առևտրային ու մշակութային ներուժը, նպաստի աշխարհում Հայաստանի և հայ ժողովրդի դիրքավորմանը:
«Նոր Ջուղայի հայ վաճառականների 300-ամյա հզոր ցանցն առևտրային կարևոր ուղղություն էր Հնդկական օվկիանոսից մինչև Միջերկրական ծով: Այժմ, որպես նորարարության համաշխարհային մակարդակի էվոլյուցիա, մենք ստեղծում ենք Digital Julfa ցանցը, որը կհամախմբի տեխնոլոգիական, ֆինանսական, գործարար, իրավական ու մշակութային հայկական ներուժը»,- ասել է «Orion Worldwide Innovations»-ի հիմնադիր տնօրեն Էմմա Առաքելյանը։
Քննարկումների ընթացքում ելույթ են ունեցել հայաստանյան, ինչպես նաև համաշխարհային առաջատար (Adobe, SADA, Embodied, cognaize, Scylla, Grand Thornton, Startup Lithuania) ընկերությունների ներկայացուցիչներ:
Որպես հայկական ստարտափների արագ զարգացման կարևոր խթան՝ քննարկվել է նաև «միաձուլումների և ձեռքբերումների» (mergers and acquisitions — M&A) հնարավորությունը։
Գագաթնաժողովի կազմակերպիչների ու գործընկերների նպատակն է M&A-ի միջոցով հասնել համաշխարհային ազդեցության, նպաստել Հայաստանի ՀՆԱ-ի աճին, ստեղծել հաջողության մոդել զարգացող մյուս շուկաների համար:
Հայկական ստարտափ էկոհամակարգում գրանցված են շուրջ 2500 ընկերություններ: Գագաթնաժողովի մասնակիցները կարծում են, որ միաձուլման կամ խոշորացման պարագայում դրանք առավել մրցունակ կարող են լինել միջազգային շուկայում:
«Միասին լուծումներ գտնելու հարթակ»
ՀՀ բարձր տեխնոլոգիական արդյունաբերության նախարարի տեղակալի խոսքով՝ Orion Summit-ը այն նախաձեռնություններից մեկն է, որոնց իրականացումը նպաստում է Հայաստանում տեխնոլոգիական ոլորտի զարգացմանը:
«Արմենպրես»-ի հետ զրույցում Դավիթ Սահակյանն ընդգծել է, որ գագաթնաժողովը հարթակ է ինչպես ոլորտում առկա խնդիրները հասկանալու և միասին լուծումներ գտնելու, այնպես էլ նախարարության ծրագրերի մասին տեղեկացնելու համար:
Կիբերանվտանգություն, ինժեներություն, բլոկչեյն, արհեստական բանականություն, տեխնոլոգիական ձեռներեցություն. սրանք այն թեմաներն են, որոնց վերաբերյալ գերատեսչությունը դասընթացներ է կազմակերպել:
«Մենք Հայաստանը դիրքավորում ենք ոչ թե այսօրվա կարիքներից ելնելով, այլ՝ ապագա կարիքներից»,- ընդգծել է Սահակյանը։
Ի՞նչ է Orion-ը
Orion Worldwide Innovations ընկերությունը հիմնադրվել է 2017 թ.-ին ԱՄՆ-ում։ Ընկերությունը գրասենյակներ ունի Նյու Յորքում և Երևանում, համագործակցում է աշխարհի տարբեր երկրներում գործող կառույցների, այդ թվում՝ ներդրողների ցանցերի հետ: Այն զբաղվում է ստարտափների աճով և զարգացմամբ, առաջարկում տարբեր ծառայություններ:
2023 թ.-ին Orion-ի գագաթնաժողովը կկազմակերպվի Նյու Յորքում, այնուհետև՝ Ֆրանկֆուրտում:
Orion Summit տեխնոլոգիական գագաթնաժողովը Հայաստանում
