Փաշինյանի հրաժարականի պահանջը հասավ Հանրային հեռուստատեսության եթեր
Բագրատ Գալստանյանը Հանրայինի եթերում
Հայաստանի վարչապետ Նիկոլ Փաշինյանի հրաժարականի պահանջով կեսգիշերն անց Հանրային հեռուստաընկերության եթերում էր «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։ Հանրապետության հրապարակում կազմակերպված հանրահավաքից հետո նա ուղիղ եթեր պահանջեց ուղերձ հղելու համար, հավաքի մասնակիցների հետ միասին քայլերթով շարժվեց դեպի Հանրային հեռուստատեսություն, որտեղ Ոստիկանության մեծ քանակի ուժեր էին արդեն տեղակայված։
Հեռուստաընկերության գործադիր տնօրեն Հովհաննես Մովսիսյանը դիմավորեց շարժման առաջնորդին և ցուցարարներին։ Նա առաջարկեց հանդես գալ ուղերձով, բայց նաև հարցազրույց տալ, պատասխանել մարդկանց հուզող հարցերին։ Տպավորություն էր ստեղծվում, որ առաջարկն արվում է պրովոկացիաներից խուսափելու համար։ Խորհրդակցություններից հետո Գալստանյանը համաձայնեց նշված ձևաչափին։
«Մեր նախանշած ծրագիրն է ժամ առաջ հեռացնել այս իշխանությանը»,- հերթական անգամ հայտարարեց Գալստանյանը։
Արքեպիսկոպոսն ուղերձով դիմեց ժողովրդին և հրավիրեց հերթական հանրահավաքին, որը նախատեսված է առաջիկա կիրակի օրը, որպեսզի կնքեն «ստի ու կեղծիքի կայսրության վերջը»։ Ասաց, որ շարունակելու են իրենց պայքարը, որը դարձել է «այս իշխանության վախերի և սարսափների արտահայտողը»։
«Նրանք կապված չեն մեր հայրենիքի, պետության հետ, ծառայում են թուրք-ադրբեջանական իշխանությանը, կատարում նրանց բոլոր հրահանգները։ Երջանիկ դեմքով գրկում է թշնամական պետության ղեկավարի [Թուրքիայի նախագահի] գիրքը, շատ հեզությամբ կատարում Հեյդար Ալիևի [նկատի ունի Իլհամ Ալիևին] կողմից եկած բոլոր հրահանգները»,- շեշտեց արքեպիսկոպոսը։
Հաղորդման վարող Պետրոս Ղազարյանի հարցերին Գալստանյանը կոնկրետ պատասխաններ չտվեց, ասաց, որ եկել է ոչ թե բովանդակային խոսակցություն ունենալու, այլ ուղերձի համար։ Մեկ-երկու անգամ էլ արձագանքեց՝ հայտարարելով, որ չի եկել «հարցաքննության»։
«Տավուշը հանուն հայրենիքի» շարժման մեկնարկը տրվեց մայիսի 4-ին Տավուշի մարզի Կիրանց գյուղից։ Մասնակիցները քայլերթով Երևան հասան մայիսի 9-ին։
Ի սկզբանե ասվում էր, որ շարժման նպատակը հայ-ադրբեջանական սահմանին իրականացվող «ապօրինի սահմանազատումը» դադարեցնելն է։ Սակայն Հանրապետության հրապարակում կազմակերպված առաջին հանրահավաքի ժամանակ շարժման առաջնորդ Բագրատ արքեպիսկոպոս Գալստանյանը հայտարարեց, որ իրենց պահանջը վարչապետի հրաժարականն է։
Տևական ժամանակ շարժման անդամներն անհնազանդության ակցիաներ, հանրահավաքներ էին իրականացնում։ Հունիսի 12-ին ԱԺ նիստին զուգահեռ բողոքի ակցիա իրականացրին խորհրդարանի հարակից փողոցներում։ Ազգային ժողովի շենքից վարչապետ Նիկոլ Փաշինյանի ելքն արգելափակելու մտադրությամբ ցուցարարներն անցան խորհրդարանի հարակից այգու ճաղավանդակների վրայով և սկսեցին առաջանալ: Ոստիկանությունը հատուկ միջոցներ կիրառեց։ Վնասվածքներ ստացան 101 քաղաքացիներ, այդ թվում՝ ոստիկաններ։ Դրանից հետո Գալստանյանը հայտարարեց, որ առաջիկա ամիսներին հարթակը չեն լքելու, սակայն պայքարի ակտիվ փուլը վերսկսվեց միայն ամիսներ անց՝ հոկտեմբերի 2-ին։
«Ժամանակն է արթնանալ, սթափվել»․ ուղերձ
Շարժման առաջնորդը հայտարարեց՝ ՀՀ այսօրվա իշխանությունը ամեն օր զիջումների է գնում, պետք է պայքարի միջոցով հեռացնել նրան և հավելեց՝ «այլընտրանք չունենք, քան հաղթանակը»։ Գալստանյանի դիտարկմամբ՝ սուտն ու կեղծիքը դարձել են կառավարության քաղաքականությունը, իսկ իշխանությունն ու նրա ղեկավարը սպառել են բոլոր հնարավորությունները՝ «դառնալով ապօրինի, շեղվելով կառավարության ընդունած ծրագրերից, որոնցով ընտրվել են»։
«Ժամանակն է արթանանալ, սթափվել։ Հանձնվել է Արցախը, մեր երկրի սահմանային գոտու գրեթե բոլոր մարզերից տարածքներ, հազարավոր զոհեր։ Դիմացը դեռ տարբեր պահանջներին ենթարկվելու տրամադրություն գոյություն ունի, կեղծ խաղաղության մուրացիկ պայմանագիր կնքելու ցանկություն և ձգտում, պարզապես «լավ ապրելու» պատրանքային մատուցում և առաջարկ՝ մոռանալու համար հայրենիքը, մեր իղձերն ու երազանքները, մեր նահատակներին»,- ուղիղ եթերում հայտարարել է Գալստանյանը։
Նրա բնորոշմամբ՝ «գտնվում ենք աղետի մեջ և կոչված ենք այդ աղետները կանխելուն»։
Առանձին ուղերձով դիմեց գործարարներին և ասաց․
«Շատերդ եք ծառայում ռեժիմին, բայց այսօր լռելու իրավունք չունեք, քանի որ հայրենիք եք զիջելու։ Շատերիդ համար հայրենիքը ձեր ունեցվածքն է, բայց դա երկար չի տևելու։ Տեսեք՝ ինչ տեղի ունեցավ Արցախում, այդ նույնը տեղի է ունենալու նաև ՀՀ-ում։ Հեռու չէ այդ օրը։
Մեր խաղաղություն մուրացող, ստախոս ղեկավարության այս ամբողջ քարոզչամեքենան միտված է նաև այս պետությունը զիջելուն՝ անկախ նրանից, թե ինչպիսի բառամթերքով կամ հռետորաբանությամբ դա կներկայացնեն մեզ»։
«Գալու ենք քո հետևից»․ կոչ Փաշինյանին
Ընդդիմադիր շարժման առաջնորդն իր խոսքն ուղղեց նաև վարչապետ Նիկոլ Փաշինյանին կամ իր բառերով ասած՝ «կառավարության դեռևս ղեկավարին»։
«Դու իշխանության ես եկել ստախոսությամբ, խաբեությամբ, իշխանազավթմամբ։ Տապալել ես ամբողջ սահմանադրական կարգը, ոչ միայն ձախողել, այլև ամբողջությամբ շեղվել ես այն խոստումներից, ծրագրերից, որոնցով ներկայացել ես հանրությանը։ Մեր պայքարը շարունակվելու է այնքան ժամանակ մինչև դու՝ որպես չարիք, ղեկավարում ես այս կառավարությունը։ Մենք՝ Հայկի ժառանգները, գալու ենք քո հետևից։ Այս չարիքի իշխանությունը վերջ է գտնելու»,- հայտարարեց Գալստանյանը։
Պատրաստվո՞ւմ է իշխանության գալուց հետո չեղարկել նոյեմբերի 9-ի փաստաթուղթը
Պետրոս Ղազարյանը Գալստանյանից հետաքրքրվեց՝ ինչպե՞ս է պատկերացնում 2020 թվականի նոյեմբերի 9-ին ստորագրված եռակողմ հայտարարության 9-րդ կետի (տարածաշրջանային հաղորդակցությունների բացման մասին) իրականացումն ու պատրաստվո՞ւմ է չեղարկել այդ փաստաթուղթն ապագայում, եթե իշխանության գա։
«Չի կարող աղետը բերել ինչ-որ մեկը, հետո ասել՝ դուք եկեք, լուծեք այդ աղետը։ Այդ թուղթը ստորագրողն այս նույն խաբեբա մարդն է, դրա պատասխանատվությունն էլ պետք է կրի»,- ի պատասխան նշեց արքեպիսկոպոսը։
Ընդդիմադիր շարժման առաջնորդը նոյեմբերի 9-ի հայտարարությունը որակեց որպես «ամոթի և խայտառակության փաստաթուղթ» և ընդգծել՝ «չեղարկելու ենք, թե չենք չեղարկելու, մեր իմանալիքն է»։
Հայտարարության 9-րդ կետի վերաբերյալ որևէ դիրքորոշում չհայտնեց։
«Ոչ մի բանակցություն գոյություն չունի ՀՀ և Ադրբեջանի միջև, կա միակողմանի թելադրանք»,- ընդգծեց նա։
«Ձեզ չի վերաբերում»․ Սրբազանը՝ Սերժ Սարգսյանի հետ քննարկած հարցերի մասին
«Տավուշը հանուն հայրենիքի» շարժման առաջնորդը չարձագանքեց այն հարցին, թե ինչ է քննարկել ՀՀ երրորդ նախագահ Սերժ Սարգսյանի հետ հանդիպման ժամանակ։
«Ձեզ չի վերաբերում, պետք լիներ՝ կհայտարարեի»,- նշեց նա։
Գալստանյանի փոխանցմամբ՝ բոլորի հետ էլ հանդիպել է, հանդիպում է ու շարունակելու է հանդիպել։
«Կոչված չեմ որևէ ծրագրի մասին այստեղ խոսելու»,- անդրադառնալով շարժման առաջիկա անելիքներին՝ նկատեց նա։
Շեշտեց՝ իրենց պայքարը մի բանի համար է՝ «հայրենիք և պատիվ, որից մեզ զրկել է այս իշխանությունը, այս չարիքը»։
Արքեպիսկոպոսն ուղիղ եթերում Հանրային հեռուստաընկերությանը մեղադրեց «ստի քարոզչության» մեջ։ Նշեց, որ հաղորդում են, թե «շարժումը ծրագիր չունի»։ Ծրագրից մանրամասներ, սակայն, չհամաձայնեց ներկայացնել։ Միայն վստահեցրեց՝ շարժումն ունի բովանդակություն, ծրագիր ու հավելեց՝ «մի տեղ կսխալվի, մի տեղ ճիշտ կլինի»։
Մեկնաբանություններ սոցցանցերից
«Քրիստոնեության, հավատքի, սուրբ եկեղեցուն էսքան ուժգին հարված չէր հասցրել ոչ մի աղանդավորական կազմակերպություն, ինչքան սա»։
«Նիկոլ Փաշինյանի հայրենասիրության գոնե 1%-ը եթե ունենայիր, կհավատայինք»։
«Ոչ մի հարցի չի պատասխանում իր ռադիկալ տերերի նման, բայց գալիս ա փրկելու»։
«Էս մարդը փաստորեն մենակ իշխանության գալ է ձգտում, թե ինչ է անելու հետո՝ ինքն էլ չգիտի»։
«Ամեն կիսամյակը մեկ էս ռուսական սերիալը նայելուց մի բանում ես համոզվում, որ ռուսական հատուկ ծառայությունների մոտ մի բան ա լավ ստացվում՝ տեռռորով իշխանություն զավթել»։
Հետևեք մեզ — Facebook | Youtube | Telegram
Բագրատ Գալստանյանը Հանրայինի եթերում
