Ադրբեջանի փոխանցած որոշ հայ զինվորականների մարմիններ մասնատված են եղել, հայտարարել է Երևանը, հետաքննություն է սկսվել։
Ղարաբաղյան հակամարտության գոտում ադրբեջանական բանակի վերահսկողության տակ անցած գյուղերից մեկի մզկիթում վանդալիզմի կադրեր են հրապարակվել, Բաքուն դրա համար մեղադրել է հայկական կողմին։
• «Վերջին օրերին ադրբեջանական դիվերսիոն խմբերն ապարդյուն փորձում են ներխուժել Շուշի։ Նրանց բոլորի մոտ Ադրբեջանի դրոշ է եղել»․ Հայաստանի պաշտպանության նախարարության ներկայացուցիչ Արծրուն Հովհաննիսյան։
• Բերձոր-Շուշի ճանապարհի որոշ հատվածներ դեռևս փակ են քաղաքացիական բնակչության համար, այնտեղ դիվերսանտների հայտնաբերման գործողություն է ընթանում։ Հայկական կողմից նվազագույնը մեկ զոհ և մեկ վիրավոր կա։
• Հայաստանի պաշտպանության նախարարությունը հերքել է այն տեղեկությունը, թե մի քանի տասնյակ լրագրողներ չեն կարողանում լքել Արցախը, հաղորդվում է, որ բոլորը հանգիստ կարող են Հայաստան վերադառնալ, ճանապարհներին վտանգ չկա։
• Ադրբեջանցի զինվորականները շարունակել են հրետակոծել Ստեփանակերտի բնակելի թաղամասերն, այդ թվում՝ կասետային զինամթերքով։ Երեք խաղաղ բնակիչ է զոհվել։
• 29 հայ զինծառայողներից ոմանց մարմինները, որոնք Ադրբեջանը փոխանցել է հայկական կողմին, մասնատված են եղել, հայտարարել է Հայաստանի Քննչական կոմիտեի քրեագիտական վարչության պետ Ռաֆայել Վարդանյանը։ Խոսքը 29 հայ զինծառայողների մարմինների մասին է, որոնք փոխանցվել են հոկտեմբերի 29-ին, Ռուսաստանի և Կարմիր խաչի միջազգային կոմիտեի աջակցությամբ։
Սպասվում են դատաբժշկական փորձաքննության արդյունքները, որը կպատասխանի այն հարցին, թե արդյոք հայ զինծառայողները կտտանքների են ենթարկվել և խոշտանգվել կյանքի օրոք։
Տեղեկություններ Բաքվից
• Վաշինգտոնում Ադրբեջանի դեսպանատունը կոչ է արել ԱՄՆ-ում բնակվող ադրբեջանցիներին զգուշանալ հայկական սփյուռքի ներկայացուցիչների սադրանքներից։
• Ադրբեջանի նախագահի օգնական Հիքմեթ Հաջիևը կադրեր է ցուցադրել, որոնք արվել են Կուբաթլուի շրջանի Մամար գյուղի մզկիթում։
«Մզկիթն ամբողջությամբ ավերված է։ Վանդալիզմին զուգահեռ՝ XVIII դարի կրոնական-մշակութային հուշարձանը պղծման նպատակով Հայաստանի կողմից վերածվել է խոզանոցի գյուղի օկուպացիայի ժամանակ», — ասված է նրա թվիթերյան գրառման մեջ։
• Արցախում 2014 թ-ին կալանավորված և Շուշիի բանտում պահվող ադրբեջանցիներ Դիլհամ Ասկերովն ու Շահբազ Գուլիևը Հայաստան են տեղափոխվել․ ԱՊԱ գործակալության հետ զրույցում հաստատել է Ադրբեջանում Կարմիր խաչի միջազգային կոմիտեի ներկայացուցիչը։
• Հայ զինվորականները հրետակոծում են Ադրբեջանի Տերտերի շրջանի Գազյան, Ղայնաղ, Ղափանլի և Գուսանլի գյուղերը, հաղորդել է Ադրբեջանի պաշտպանության նախարարությունը։
Հայաստանի, Ադրբեջանի և երրորդ երկրների ներկայացուցիչների հայտարարությունները
• Ադրբեջանի վարչապետ Ալի Ասադովն ԱՊՀ կառավարությունների ղեկավարների խորհրդի առցանց նիստին պատմել է ՀԱՊԿ-ը ղարաբաղյան հակամարտության մեջ ներգրավելու Երևանի փորձերի մասին։ ՀԱՊԿ-ը՝ Հավաքական անվտանգության պայմանագրի կազակերպությունը, ստեղծվել է Ռուսաստանի առաջնորդությամբ, դրան Հայաստանինց բացի անդամակցում են նաև Բելառուսը, Ղրղզստանը, Ղազախստանը, Ուզբեկստանն ու Տաջիկստանը։
• «Ադրբեջանը շարունակում է ագրեսիան Լեռնային Ղարաբաղի նկատմամբ Թուրքիայի անմիջական ռազմաքաղաքական աջակցությամբ և Լիբիայից ու Սիրիայից ահաբեկիչների ներգրավմամբ […]։ Կիրառվում են կտտանքներ, ցուցադրական գնդակահարություններ, գերիների գլխատում, սպանվածների մարմինների պղծում։ Ադրբեջանը դառնում է ահաբեկիչների և նրանց գաղափարախոսության ներթափանցման պլացդարմ ԱՊՀ-ում», — հայտարարել է Հայաստանի փոխվարչապետ Մհեր Գրիգորյանն ԱՊՀ կառավարությունների ղեկավարների խորհրդի առցանց նիստին։
• Ֆրանսիայի արտգործնախարար Ժան-Իվ լը Դրիանը Թուրքիային մեղադրել է, որ նա «ագրեսիվ քաղաքականություն է վարում Եվրոպայի անմիջական հարևանությամբ, մասնավորապես՝ Լիբիայում, Արևելյան Միջերկրականում, Լեռնային Ղարաբաղում և հյուսիսային Իրաքում»։
Նախարարը հայտարարել է, որ թուրքական ղեկավարության գործողությունների վերաբերյալ «լիակատար համերաշխություն կա Եվրամիությունում»։
Հայկական ու ադրբեջանական բանակները սեպտեմբերի 27-ից դաժան մարտեր են վարում ղարաբաղյան հակամարտության գոտում՝ զրահատեխնիկայի, հրետանու և դրոնների կիրառմամբ։ Արդեն մի քանի հազար զինվորական և խաղաղ բնակիչ է զոհվել երկու կողմից։ Այս ընթացքում երեք անգամ՝ հոկտեմբերի 10-ին, 18-ին և 26-ին հրադադարի պայմանագիր է կնքվել, սակայն ամեն անգամ այն միանգամից խախտվել է։ Կողմերը միմյանց են մեղադրում հրադադարը չպահպանելու մեջ։
