«Թքել է քաղաքացու վրա»․ ԱԺ խոսնակին վիրավորել է «դավաճան» բնորոշումը
Ալեն Սիմոնյանը թքել է քաղաքացու վրա
«Հայաստանի խորհրդարանի խոսնակն իրեն դավաճան անվանելու համար հայհոյել և թքել է քաղաքացու վրա»։ Հայկական լրատվամիջոցները ողողված են նմանօրինակ վերնագրերով։
Միջադեպի մանրամասները հրապարակել են ԱԺ ընդդիմադիր պատգամավորները։ Կատարվածին անդրադարձել է տուժած քաղաքացին՝ նշելով, որ «բնորոշել է ԱԺ խոսնակին այնպես, ինչպես պետք էր»։ ԱԺ նախագահ Ալեն Սիմոնյանը ևս մեկնաբանել է տեղի ունեցածը, շեշտել է, որ դա վիրավորանք հնչեցնելու առաջին դեպքը չի եղել ու հավելել՝ «լկտիությունն անպատասխան չի մնալու»։
ԱԺ նախագահի մասնակցությամբ աղմկահարույց միջադեպի մանրամասները, կարծիքներ
«Երբ նորից հանդիպեմ, տալու եմ բնորոշումը, որին արժանի են»
Դեպքի վայրից՝ Կասկադից տեսանյութ է հրապարակել տուժած քաղաքացին՝ Կարեն Մկրտչյանը։ Նա պատմել է, որ երբ ԱԺ նախագահն իջել է մեքենայից, նա մոտեցել է և հնչեցրել «դավաճան» բառը։ Ասում է՝ «իր բնորոշումը տվեցի»։
«Ինձ բռնել էին երկու-երեք հոգով և Ազգային ժողովի նախագահն ինձ մոտեցավ և թքեց իմ երեսին, իր հայրենակցի երեսին։ Այսքան դեգրադացված, զգետնված է մեր հայրենիքի պատիվը, մեր իշխանություններն այնքան լկտիացած են, և դա ուղղակի արդյունք է ժողովրդի վախկոտության»,- հայտարարել է նա։
Կարեն Մկրտչյանը հայրենադարձ է, Կանադայի քաղաքացի, ՀՅԴ բյուրոյի անդամ Մկրտիչ Մկրտչյանի որդին է։ Մամուլում լուրեր էին շրջանառվում, թե նա 2018 թ․-ի թավշյա հեղափոխությունից հետո հավակնել է ստանձնել պաշտոն, որը չստանալու համար էլ փորձում է «վրեժխնդիր լինել»։ MediaHUB-ի հետ զրույցում Մկրտչյանը հերքել է այդ լուրերն ու նշել, որ կառավարությունում եղել է ներդրումային ծրագրեր քննարկելու, ոչ թե աշխատանք խնդրելու նպատակով։ Սակայն հաստատել է՝ ստացել է առաջարկ, որը մերժել է։
Նա պատմել է, որ իր երեսին թքելուց առաջ Սիմոնյանն ասել է՝ «դավաճանը մամադ է»։ Իսկ ԱԺ նախագահի հեռանալուց հետո իրեն ոստիկանություն են ուղեկցել, նույնականացրել ու որոշ ժամանակ անց բաց թողել։ Արարքն անընդունելի է համարում և իրավականորեն պատժելի։ Դեռ իրավաբանների հետ քննարկում է իր հետագա քայլերը։
Մկրտչյանի փոխանցմամբ՝ չի վախենալու, եթե նորից հանդիպի, տալու է «բնորոշումը, որին արժանի են»։ Շեշտում է՝ միջադեպից հետո ամոթ էր զգում ոչ թե իր, այլ այն բանի համար, որ «հայրենիքի բարձրագույն իշխանավորներից մեկն իրեն թույլ է տվել փողոցային լակոտի նման վարվել ուրիշ քաղաքացու հետ, ամոթ ազգի համար, որ հանդուրժել է նման որակի ղեկավարություն»։
«Առաջին անգամ չէ, որ վիրավորանք է հնչեցնում»
Այս մասին տեղեկացրել է ԱԺ նախագահ Ալեն Սիմոնյանը։ Նրա խոսքով՝ առաջին դեպքը տեղի է ունեցել մեկ ամիս առաջ, ինքը պարզապես արհամարհել է։
«Երկրորդ անգամ, բնական է, իր խոսքի ազատությանը և վիրավորանքին հակադրեցի իմ կարծիքը իր մասին, իմ ազատությունը»,- իր ֆեյսբուքյան էջում գրել է խորհրդարանի խոսնակը։
Շեշտել է՝ անկախ զբաղեցրած դիրքից առիթ չի տվել մտածելու, թե ասելիքն ասելու համար իրեն պաշտոն կամ անվտանգություն է պետք։ Հերքել է շրջանառվող լուրերը, թե 30-40 անվտանգության աշխատակից ունի․
«Բայց մի բան «ականջներիդ օղ արեք», որ ձեր լկտիությունն անպատասխան չի մնալու․ ՀՀ օրինական իշխանությանը վիրավորելուն լինելու է օրինական պատասխան»։
«Խիստ անընդունելի է»
Տեղի ունեցածն այսպես է բնորոշել խորհրդարանի Մարդու իրավունքների հանձնաժողովի նախագահը։ Թագուհի Թովմասյանը նշել է, որ Երևանի կենտրոնում տեղի է ունեցել «նսեմացման հրապարակային քայլ»։
«Պետական պաշտոնյան պետք է ցուցաբերի ծայրաստիճան զսպվածություն. ուղղակի պարտավոր է՝ բոլոր իրավիճակներում»,- գրել է նա։
Միջադեպին անդրադարձել են նաև ընդդիմադիր պատգամավորներ Հայկ Մամիջանյանն ու Ասպրամ Կրպեյանը։ Մամիջանյանը շեշտել էր, որ քաղաքացի Կարեն Մկրտչյանը «գոռացել է այն, ինչ գոռում են բոլորը ՔՊ-ականներին տեսնելիս», ի պատասխան Սիմոնյանը հայհոյանք է հնչեցրել և թքել նրա երեսին։
«Այս ամենի նպատակը շատ պարզ է՝ փորձել իրենց վրայից մաքրել էդ խարանը, որ իրենց դեմքին դա ասող չլինի»,- նշել էր նա։
Պատգամավոր Ասպրամ Կրպեյանը հիշեցրել էր՝ երբ իշխանության էին գալիս, ասում էին՝ հպարտ քաղաքացիներ, իսկ հիմա ունենք «կոյուղային ժողովրդավարության բաստիոն»։ Նրա դիտարկմամբ՝ քաղաքացին իր կարծիքն է արտահայտել, իսկ Սիմոնյանը փորձել է նրան զրկել խոսքի ազատության իրավունքից։
Կարծիքներ
Նինա Կարապետյանց, իրավապաշտպան, «Հելսինկյան ասոցիացիա» ՀԿ ղեկավար
«Եթե նախկինում թիկնապահներն էին բռնության ենթարկում, այսօր Ալեն Սիմոնյանը դա անում է ամենանվաստացուցիչ, ամենաստոր ձևով։ Տեղի ունեցածն առհասարակ ոչ մի սահմանի մեջ չի տեղավորվում։
Մի կողմից իրենք իրենց ներկայացնում են որպես ժողովրդավարության, առաջադիմական գաղափարների կրող, մյուս կողմից հանդես են գալիս քրեական ենթամշակույթի տրամաբանության մեջ»։
«Իրավաբանականի առաջին կուրսի ուսանողը կարող է փաստել, որ հասարակական վայրում ուրիշի դեմքին թքելը խուլիգանության դասագրքային օրինակ է, բայց ոստիկանություն է տարվել ոչ թե Ալեն Սիմոնյանը այլ այդ երիտասարդը: Բան չկա ասելու»։
«Լկտիություն և լպիրշություն․ սրանք ամենագրական և մեղմ բառերն են, որոնք նկարագրում են Ալեն Սիմոնյանի վարքը և իր անձի բովանդակությունը։
Իրավական տեսանկյունից Ալեն Սիմոնյանը պետք է ենթարկվի պատասխանատվության՝ խուլիգանություն կատարելու դեպքի առիթով։ Եվս մեկ անգամ ֆիքսենք, որ չկա այլևս օրենք և օրինականություն սրանց նմանների համար»։
Հետևեք մեզ — Facebook | Youtube | Telegram
Ալեն Սիմոնյանը թքել է քաղաքացու վրա
