POLITICO. Վրաստանը կարող է հայտնվել Հյուսիսային Կորեա դառնալու ճանապարհին
POLITICO-ն Վրաստանում ընդդիմության արգելքի մասին
Ամերիկյան հեղինակավոր POLITICO պարբերականը հրապարակել է հոդված, որում նշում է, որ ընդդիմադիր կուսակցությունների գործունությունն արգելելու մտադրությամբ Վրաստանի կառավարությունը երկիրը դնում է «Հյուսիսային Կորեա դառնալու ճանապարհի վրա», իսկ վրացական ժողովրդի՝ Եվրամիությանն անդամակցելու հավակնությունները հայտնվում են նոր սպառնալիքի տակ։
Համաձայն իշխող «Վրացական երազանք» կուսակցության քաղաքական խորհրդի հայտարարության, որը հետագայում կրկնել է կուսակցության հիմնադիր Բիձինա Իվանիշվիլին, իշխող թիմին խորհրդարանում սահմանադրական մեծամասնություն է անհրաժեշտ՝ նախաձեռնելու համար իրավական գործընթաց, «որի արդյունքում «Միացյալ ազգային շարժումը» (հիմնական ընդդիմադիր կուսակցությունը, որը հիմնադրել է Միխեիլ Սաակաշվիլին- JAMnews) և նրա բոլոր արբանյակ ու իրավահաջորդ կուսակցությունները կհայտարարվեն հակասահմանադրական»։
Վրաստանի վարչապետ Իրակլի Կոբախիձեն նույնիսկ հնչեցրել է կոնկրետ ցուցակ, որում «Միացյալ ազգային շարժում»-ից բացի ևս չորս կուսակցություններ կան։
«Սա կոչնչացնի ողջ ընդդիմությունը, որում «Վրացական երազանքը» սպառնալիք է տեսնում։ Զուգահեռ կարելի է անցկացնել միայն Ալեքսանդր Լուկաշենկոյի հետ Բելառուսում և Հյուսիսային Կորեայի հետ։ Սա կլինի վրացական ժողովրդավարության ավարտը», — ասում է Քաղաքական հետազոտությունների եվրոպական կենտրոնի ներկայացուցիչ Թինաթին Ախվլեդիանին։
Ըստ POLITICO-ի՝ «ընդդիմության արգելքը» խաչ կքաշի Վրաստանի՝ Եվրամիությանն անդամակցելու ձգտման վրա, որն առանց այդ էլ սառեցված է։
Իրակլի Կոբախիձեն պնդում է, որ իշխող «Վրացական երազանք» կուսակցության ծրագրերը չեն արգելափակում երկրի ճանապարհը դեպի Եվրամիություն։ POLITICO-ն մեկնաբանության համար դիմել է Եվրահանձնաժողով, սակայն դեռևս պատասխան չի ստացել։
Պարբերականն արձագանքել է նաև Կոբախիձեի պնդմանը, թե, իբր, նմանատիպ միջոցներ են ձեռնարկվել Ուկրաինայում և Մոլդովայում, սակայն դա չի դարձել սպառնալիք նրանց և Արևմուտքի միջև կառուցված կամուրջների համար։
«Մասնավորապես՝ Ուկրաինա Ռուսաստանի լայնածավալ ներխուժումից հետո այս երկրներում արգելվել են ռուսամետ խմբակցությունները՝ այդ քաղաքական ուժերի հեղաշրջման ծրագրերի մասին նախազգուշացումների ֆոնին։ Երկու երկրներն էլ պահպանել են ուժեղ, դինամիկ բազմակուսակցական համակարգ», — ասում է POLITICO-ն։
Պարբերականը շեշտում է, որ Վրաստանի՝ Եվրամիությանն անդամակցելու գործընթացն արդեն իսկ կասեցվել է մարդու իրավունքների պաշտպանության իրավիճակի վատթարացման պատճառով։ Կրեմլի կողմը թեքվելու պատճառով ԱՄՆ-ն իր հերթին դադարեցրել է վրացական կառավարության ֆինանսավորումը։
