Լրագրող Ուլվիա Ալին ձերբակալվել է. «Այժմ ավելի քան 20 լրագրող բանտում է, և ես նրանցից մեկն եմ»
«Meydan TV»-ի գործով ևս մեկ լրագրող է ձերբակալվել
Լրագրող Ուլվիա Ալին (Գուլիևան) ձերբակալվել է Բաքվի գլխավոր ոստիկանության աշխատակիցների կողմից մայիսի 7-ի գիշերը՝ «Meydan TV» հեռուստաալիքի գործի շրջանակներում։ Նրա բնակարանը խուզարկվել է։ Մեր խմբագրությանը ուղղված նամակում լրագրողը գրում է. «Մեր ձայնը միշտ կխախտի լռությունը այն քաղաքական կամքին հակառակ, որը ցանկանում է լռեցնել Ադրբեջանը»։
Ուլվիա Ալին դարձավ Meydan TV-ի գործով կալանավորված 11-րդ լրագրողը։
«Ընտանիքի անդամներն ու ընկերները՝ տուն վերադառնալով, բնակարանը գտան խառնված ու թափթփած վիճակում։ Դաշնամուրը կոտրված էր։ Պահարանի ներսում գտնվող որոշ դարակներ և նույնպես կոտրված էին։ Գրապահարանի վրա գտնվող բոլոր գրքերը գցված էին հատակին», — JAMnews-ին ասաց Ուլվիա Ալիի ընկերուհին, ֆեմինիստ-ակտիվիստ Գյուլնարա Մեհդիևան։
Նրա խոսքով՝ լրագրողը ձերբակալության ժամանակ ենթարկվել է բռնության։
2024 թվականի դեկտեմբերի 6-ին ձերբակալվել են Meydan TV-ի աշխատակիցներ Ռամին Դեկոն (Ջաբրայիլզադե), Այնուր Գանբարովան (Էլգունեշ), Այսել Ումուդովան, Այթաջ Ախմեդովան (Թափդիգ), Խայալա Աղաևան և Նաթիգ Ջավադլին։ Նրանց մեղադրանք է առաջադրվել Քրեական օրենսգրքի 206.3.2 հոդվածով (մաքսանենգություն, որը կատարվել է մի խումբ անձանց կողմից նախնական պայմանավորվածությամբ)։ Նրանց դեմ հարուցված քրեական գործը Բաքվում անվանում են «Մեյդան TV-ի գործ»։
Լրագրող Ուլվիա Գուլիևան նամակ է ուղարկել մեր խմբագրություն, որում հայտնել է ձերբակալության հավանականության մասին։ Հրապարակում ենք նրա նամակը առանց փոփոխությունների և կրճատումների․
«Եթե դուք կարդում եք այս նամակը, դա նշանակում է, որ ես զրպարտվել և անօրինական կերպով ձերբակալվել եմ իմ լրագրողական գործունեության համար։ Ինչպես իմ մյուս լրագրող գործընկերները, ես որևէ հանցագործություն չեմ կատարել՝ ես երկիր չեմ բերել այն, ինչ նրանք անվանում են «անօրինական ֆինանսավորում», չեմ կատարեկ և որևէ այլ անորինական գործողություն։ Ես նաև չեմ ունենցել գործնական կապեր Meydan TV-ի հետ։ Եվ նույնիսկ եթե ես նման կապեր ունենայի, Meydan TV-ի հետ համագործակցությունը հանցագործություն չէ։ Պետք է նաև նշեմ, որ ես երկար ժամանակ համագործակցել եմ «Ամերիկայի ձայնի» հետ։
Դուք բոլորդ գիտեք, որ ադրբեջանական պետությունը չի հանդուրժում անկախ լրատվամիջոցների գոյությունը։ Այս անհանդուրժողականության արդյունքում ավելի քան 20 լրագրող այժմ բանտում է, և ես նրանցից մեկն եմ։ 2016 թվականից ի վեր իմ լրագրողական աշխատանքում ես միշտ փորձել եմ հավատարիմ մնալ մասնագիտական էթիկային և արել եմ ամեն ինչ՝ ուշադրություն հրավիրելու անարդարության ենթարկված յուրաքանչյուր մարդու խնդիրների վրա՝ անկախ նրա կրոնից, ազգային պատկանելիությունից, քաղաքական հայացքներից, սեռական կողմնորոշումից կամ սոցիալական կարգավիճակից։ Հիմա, ինչպես բանտերում բանտարկված իմ ընկերները, ես կշարունակեմ այս գործունեությունը։
Մեր ձայնը միշտ կխախտի լռությունը այն քաղաքական կամքին հակառակ, որը ցանկանում է լռեցնել Ադրբեջանը։ Սա կարող է լինել ազատության մեջ գրվող իմ վերջին գրառումը։ Բայց ես հավատում եմ, որ արդարության ձայնը չի կարող լռեցվել։
Լրագրությունը հանցագործություն չէ։ Մեր հանցագործությունը մեր հավատն է արդարությանը»։
Նախապատմություն
2025 թվականի հունվարի 16-ին Ուլվիա Ալին հարցաքննվել է Բաքվի քաղաքային ոստիկանության բաժանմունքում՝ «Մեյդան TV-ի գործի» շրջանակում։ Եվ այնժամանակ նրան արգելվել է լքել երկիրը։
Լրագրողը՝ չհամաձայնելով այս որոշման հետ, վերաքննիչ դատարան բողոք է ներկայացրել։ Այդ բողոքի լսումը նշանակված է հենց այսօր։
Meydan TV-ի աշխատակիցների հետ միասին նույն օրը՝ 2024 թվականի դեկտեմբերի 6-ին, ձերբակալվել է հասարակական գործիչ Ուլվի Թահիրովը։ Meydan TV-ն հայտարարում է, որ Ուլվի Թահիրովը որևէ կապ չունի խմբագրության հետ։
2025 թվականի փետրվարի 5-ին, Meydan TV-ի քրեական գործի շրջանակներում, ձերբակալվել են նաև argument.az կայքի գլխավոր խմբագիրը և Meydan TV-ի հետ համագործակցող լրագրող Շամշադ Աղաևը (Աղա), փետրվարի 20-ին՝ լրագրող Նուրլան Լիբրեն (Գահրամանլի), իսկ փետրվարի 28-ին՝ լրագրող Ֆաթիմա Մովլամլին։
Ձերբակալված լրագրողների տներում խուզարկություններ են անցկացվել, առգրավվել են հեռախոսներ, համակարգիչներ և այլ անձնական իրեր։
Ձերբակալված լրագրողները հերքել են բոլոր մեղադրանքները։ Meydan TV-ն պնդում է, որ իր աշխատակիցները պատժվում են իշխանություններին քննադատելու համար։
Ներկայումս նմանատիպ մեղադրանքներով բանտում են գտնվում մոտ 30 լրագրող և հասարակական ակտիվիստ։ Նրանք իրենց մեղավոր չեն ճանաչում։ Իրենց ձերբակալությունը բոլորը համարում են հետապնդում և կապում են այն իրենց մասնագիտական գործունեության հետ։
Ադրբեջանի իշխանությունները հայտարարում են, որ երկրում քաղաքական դրդապատճառներով ձերբակալություններ չկան։
Հետևեք մեզ — Facebook | Youtube | Telegram
«Meydan TV»-ի գործով ևս մեկ լրագրող է ձերբակալվել
