Meta-ն ջնջել է ՌԴ-ում ստեղծված հարյուրավոր քարոզչական հաշիվներ

Meta-ն ջնջել է ՌԴ-ում ստեղծված կեղծ հաշիվներ

Meta ընկերությունը ջնջել է 76 կեղծ օգտահաշիվ և 30 ֆեյսբուքյան, ինչպես նաև 11 ինստագրամյան էջեր, որոնք ռուսական ծագում ունեին և խախտում էին այս սոցիալական ցանցերի քաղաքականությունը: Այս մասին նշվում է ընկերության զեկույցում: Meta-ի փոխանցմամբ՝ այս կեղծ հաշիվների ցանցի թիրախները Հայաստանը, Վրաստանն ու Ադրբեջանն էին:

• Վրաստանում ցանցը տարածում էր «օտարերկրյա գործակալների մասին» օրենքի դեմ բողոքի ցույցերը քննադատող բովանդակություն՝ ցուցադրելով աջակցություն իշխող «Վրացական երազանք» կուսակցությանը:
• Ադրբեջանում գրառումները քննադատում էին Արևմուտքը:
• Հայաստանում ցանցը առաջ էր մղում ռուսամետ նարատիվներ և քննադատում էր Հայաստանի վարչապետին:

• Ֆեյսբուքյան մեծ զտումներ Վրաստանում
• Եվրամիությունը Ռուսաստանին մեղադրում է կորոնավիրուսի համավարակի հետ կապված ապատեղեկատվական մասշտաբային արշավի համար

Զեկույցի համաձայն՝ խոսքը տեղեկատվական ցանցի մասին է, որը նպատակ ուներ ազդեցություն գործել կոնկրետ երկրների վրա: Ցանցում ներառված են այնպիսի ֆեյք կայքեր, ինչպիսիք են, օրինակ՝ Georgia Today-ը՝ (sakartvelo-today.org) Վրաստանում, Yerli.Media-ն՝ (yerlimedia.org) Ադրբեջանում և Lurer Media-ն՝ (lurermedia.org) Հայաստանում:

Այս բոլոր կայքերը կապված են Մոսկվայում գրանցված IMA Digital մարքեթինգային ընկերության հետ:

Ըստ Meta-ի տվյալների՝ այս լրատվական կայքերը ներկայացված են նաև տարբեր հարթակներում, ներառյալ YouTube-ը, Telegram-ը և TikTok-ը՝ ավելի լեգիտիմ և ուշադրության արժանի թվալու համար:

Եվ չնայած Facebook-ում և Instagram-ում նրանց հաշիվների փակմանը, այս կայքերը շարունակում են գործել և հրապարակել «թեժ լուրեր» վրացերենով, հայերենով, ադրբեջաներենով և ռուսերենով:

Facebook-ում և Instagram-ում այս ցանցի հետևում կանգնած մարդիկ օգտագործել են կեղծ օգտահաշիվներ, ղեկավարվող էջեր և հրապարակել հաղորդագրություններ՝ օգտատերերին դեպի իրենց վեբկայքեր տանելու համար:

Meta հարթակներում իրենց բովանդակությունն առաջ մղելու համար նրանք տեղադրել են գովազդներ՝ ընդհանուր 77 000 դոլար արժողությամբ:

Կեղծ հաշիվների մասին տեղեկատվությունը տրամադրել է Արդար ընտրությունների և ժողովրդավարության միջազգային ընկերակցությունը (ISFED), ինչից հետո դրանք հայտնաբերվել են Meta-ի ավտոմատացված համակարգերի կողմից և արգելափակվել մինչև հետաքննության ավարտը:

Զեկույցում հիշատակվում է նաև 43 օգտահաշիվների և 85 էջերի մասին, որոնք ևս Meta-ն ջնջել է Ուկրաինայի և Մոլդովայի քաղաքացիների դեմ համակարգված արշավներ իրականացնելու համար: Օրինակ՝ այդ էջերը քննադատում էին Ուկրաինայի կառավարությանը երկիրը պաշտպանելու անկարողության, զինվորական մոբիլիզացիայի ցածր մակարդակի և նախագահական ընտրությունները հետաձգելու համար, իսկ Մոլդովայում հրապարակում էին տեղեկատվություն ռուսամետ քաղաքական գործիչների մասին:

Սա առաջին դեպքը չէ, երբ Meta-ն արգելափակում է կեղծ հաշիվներ և էջեր, որոնք կապված են Վրաստանի կառավարության կամ իշխող կուսակցության հետ կամ զբաղվում են նրանց «փիարով»:

2023 թվականին Meta-ն արգելափակել է 80 օգտահաշիվ, 26 էջ և 9 խումբ Facebook-ում, ինչպես նաև 2 հաշիվ Instagram-ում։ Դրանք կապված են եղել Վրաստանի կառավարության Ռազմավարական հաղորդակցությունների վարչության հետ:

2020 թվականին ջնջել էին 511 էջ, 101 անձնական հաշիվ, 122 խումբ Facebook-ում և 56 հաշիվ Instagram-ում, որոնք կապված էին «Վրացական երազանքի» և ընդդիմադիր «Միացյալ ազգային շարժում» կուսակցության հետ:

Հետևեք մեզ — Facebook | Youtube | Telegram