Վրաստանը տնտեսությունը կանգնեցնելու պլաններ չունի

Չնանյած կորոնավիրուսով վարակման դեպքերի աճին՝ կառավարությունը մտադիր չէ բիզնեսի համար խիստ սահմանափակումներ մտցնել։ «Վրաստանը տնտեսությունը կանգնեցնելու պլաններ չունի, բավական է, որ ողջ երկրում չի գործում հանրային տրանսպորտը (2021 թ․ մայիսի 3-12-ը), ինչը նպաստել է բնակչության տեղաշարժի նվազմանը»,- մայիսի 6-ին հայտարարել է էկոնոմիկայի նախարար Նաթիա Տուրնավան։

2020 թ-ին այլ մոտեցում էր կիրառվում․ կորոնավիրուսով վարակման դեպքերի աճի պարագայում փակվում էին բիզնեսի բոլոր տեսակները։ Այժմ համաճարակային իրավիճակը կառավարվում է առանց այդ ծայրահեղ միջոցների, ինչն, ըստ Տուրնավայի, ճիշտ մոտեցում է։

Վրաստանում կորոնավիրուսի երրորդ ալիքը սկսվել է 2021 թ-ի ապրիլի կեսերին, և համաճարակաբանները դրա գագաթնակետին են սպասում մայիսի կեսերին։

Տեղաշարժը սահմանափակելու համար կառավարությունը Զատկի երկարատև արձակուրդ է հայտարարել՝ մինչև մայիսի 13-ը։ Այդ ողջ ընթացքում չի աշխատելու հանրային տրանսպորտը, շարունակվում է պարետային ժամի կիրառումը՝ ժամը 21.00-ից մինչև 05.00-ն։ Շաբաթ և կիրակի օրերին սրճարաններն ու ռեստորանները նախկինի պես կարող են աշխատել միայն բացօթյա տարածքներում։

Ավելի վաղ կառավարությունը չեղարկել էր սահմանափակումների մեծ մասը, որոնք սահմանվել էին 2020 թ-ին կորոնավիրուսի համավարակի պատճառով։ Դա դեռևս չի օգնել տնտեսությանը․ 2020 թ-ի աշնանը ՀՆԱ-ն նվազել է 6,2 տոկոսով։

• Վրաստանում չի աշխատում աշխատունակ տարիքի յուրաքանչյուր երկրորդ քաղաքացի

Վրաստանը փակ էր անցյալ տարվա մարտին կորոնավիրուսի համավարակի պատճառով։ Սակայն դրանից առաջ՝ 2019 թ-ին, Վրաստան էր այցելել ավելի քան ինը միլիոն օտարերկրյա հյուր, և զբոսաշրջությունը Վրաստանի տնտեսությանը բերել էր 3,2 մլրդ դոլար։

Ազգային վիճակագրական վարչության տվյալներով՝ Վրաստանի տնտեսությունը 2020 թ-ին կրճատվել է 6,1 տոկոսով, ինչը ռեկորդային անկում է վերջին 26 տարում։