ՀՀ-ն ու Լեհաստանը կհամագործակցեն ռազմատեխնիկական ոլորտում․ Փաշինյանի այցը
Նիկոլ Փաշինյանի այցը Լեհաստան
Լեհաստան կատարած պաշտոնական այցի շրջանակում Հայաստանի վարչապետ Նիկոլ Փաշինյանին ընդունել է վարչապետ Դոնալդ Տուսկը։ Կողմերի բնորոշմամբ՝ այցը նոր ազդակ կհաղորդի Երևանի և Վարշավայի հարաբերություններին։
Հանդիպումից հետո երկու երկրների ղեկավարները հանդես են եկել հայտարարություններով։ Դոնալդ Տուսկը բարձր է գնահատել խաղաղության հաստատման գործում Նիկոլ Փաշինյանի անձնական ջանքերն ու նրա քաղաքական տեսլականը։ Նշել է, որ դա հազվադեպ երևույթ է «այսօրվա բարդ պայմաններում, Ուկրաինայում ռուսական ագրեսիայի պայմաններում»։
Ճեպազրույցից առաջ ստորագրվել է ռազմատեխնիկական համագործակցության համաձայնագիր։ Այն ստորագրել են ՀՀ արտգործնախարար Արարատ Միրզոյանն ու Լեհաստանի ազգային պաշտպանության նախարար Վլադիսլավ Կոշինյակ Կամիշը։
«Հավատում ենք, որ անվտանգության ոլորտում համագործակցությունը բարենպաստ կլինի ոչ միայն Հայաստանի, այլև ողջ տարածաշրջանի համար»,- հայտարարել է Լեհաստանի վարչապետ Դոնալդ Տուսկը։
Նրա գնահատմամբ՝ Երևանն ու Վարշավան հստակ գիտեն, թե ինչ է պետք անել «միասին և կայուն լինելու», ինչպես նաև «իրենց երկրի և ժողովրդի անվտանգությունն ապահովելու համար»։
Ի՞նչ հարցեր են քննարկել Փաշինյանն ու Տուսկը, ճեպազրույցի մանրամասներն ու ռազմատեխնիկական գործակցության համաձայնագիրը
- «Չի բացառվում, որ ապագայում Իրանը կարող է զենք վաճառել ՀՀ-ին»․ կարծիք Երևանից
- «Խաղաղությունն ամրանում է»․ հայ և ադրբեջանցի փորձագետների 3-րդ համաժողովի արդյունքները
- «Հայաստանը փրկվեց ռուս-թուրքական աքցանից»․ կարծիք Ջեյ Դի Վենսի այցի մասին
Փաշինյան-Տուսկ առանձնազրույցը
Հայաստանի վարչապետի աշխատակազմի փոխանցմամբ՝ երկու երկրների ղեկավարները քննարկել են՝
- համատեղ ծրագրերի իրականացմանը վերաբերող հարցեր,
- Հայաստանի և Ադրբեջանի միջև խաղաղության հաստատման գործընթացը,
- TRIPP նախաձեռնության իրականացման ընթացքը,
- Հայաստան–ԵՄ փոխգործակցության հետագա զարգացմանը վերաբերող թեմաներ։
Նշվում է, որ Դոնալդ Տուսկն ընդգծել է Լեհաստանի շահագրգրռությունը Հայաստանի հետ փոխգործակցության ամրապնդման և խորացման հարցում, այդ թվում՝ որպես Եվրոպական միության անդամ պետություն․
«Լեհաստանի վարչապետը կարևորել է Հայաստանի հետ համագործակցության ընդլայնումը՝ հատկապես տնտեսության, ենթակառուցվածքների, անվտանգության, կրթության, գիտության և այլ ոլորտներում»։
Հայաստանի վարչապետը, իր հերթին, կարևորել է տնտեսական համագործակցության խթանումը։ Նիկոլ Փաշինյանն ընդգծել է Լեհաստանի դերը Հայաստան–ԵՄ համագործակցության խորացման գործընթացում, ինչպես նաև հույս հայտնել, որ ՀՀ ինստիտուցիոնալ բարեփոխումների իրականացման գործում Վարշավայի ցուցաբերած աջակցությունը կլինի շարունակական։
«Շատ գովելի է, որ ՀՀ-ն բռնել է եվրոպական ուղի»․ Տուսկ
Ճեպազրույցում Լեհաստանի վարչապետը խորհրդանշական է համարել այն, որ Փաշինյանի հետ հանդիպումը կազմակերպվել է փետրվարի 26-ին։ 1992 թ․-ի հենց այս օրն են երկու երկրները հաստատել դիվանագիտական հարաբերություններ։
Դոնալդ Տուսկն անդրադարձել է «Հայաստանի՝ ԵՄ-ին անդամակցելու գործընթաց սկսելու մասին» ՀՀ ԱԺ ընդունած օրենքին։ Շեշտել է՝ շատ գովելի է, որ Հայաստանը բռնել է եվրոպական ուղի։ Նրա կարծիքով՝ Եվրամիությունում հակված են ընդունելու այն բոլոր երկրներին, որոնք «կրում են նույն արժեքները»․
«Շատ զգուշությամբ, բայց հստակորեն բաց ենք ԵՄ ընդլայնման համար՝ այն բոլոր երկրների համար, որոնք ընտրում են ժողովրդավարությունը, անկախությունն ու խաղաղությունը»։
Տուսկի խոսքով՝ Վարշավան մշտապես է քաջալերել այն երկրներին, որոնք ընտրում են իրենց անկախությունը։ Խոսելով խաղաղության մասին՝ արձանագրել է, որ այն բարդ ճանապարհ է, պահանջում է մեծ աշխատանք, միևնույն ժամանակ՝ չափազանց կարևոր է։
«Հայաստանը ԵՄ ստանդարտներին համապատասխան երկիր դարձնելն առաջնային խնդիր է»․ Փաշինյան
ՀՀ վարչապետն ընդգծել է՝ խորհրդանի ընդունած օրինագծի վերաբերյալ Դոնալդ Տուսկի քաջալերող խոսքերը թույլ են տալիս ավելի վստահ շարունակել ժողովրդավարական բարեփոխումների ճանապարհը, որում «մեր առաջնային խնդիրը ՀՀ-ն եվրոպական և ԵՄ ստանդարտներին համապատասխան երկիր դարձնելն է»։
Փաշինյանի բնորոշմամբ՝ ժողովրդավարական բարեփոխումները բարդ են, իրենց հետ բերում են «մարտահրավերներ, կասկածներ, մեղադրանքներ», մանավանդ այսօր։
«Այսօրվա աշխարհում փորձ է արվում ստեղծել տպավորություն, թե ժողովրդավարական երկիր լինել նշանակում է լինել թույլ, ի վիճակի չլինել ապահովել և պաշտպանել սեփական անվտանգությունը։ Լեհաստանը շատ վառ օրինակ է, թե ինչպես կարող է ժողովրդավարությունը զուգակցվել ուժեղ անվտանգային համակարգի, ուժեղ տնտեսության հետ»,- հայտարարել է նա։
Բարձր է գնահատել, հատկապես Լեհաստանի աջակցությունը ՀՀ ժողովրդավարական բարեփոխումներին և տարածաշրջանում ընթացող խաղաղության գործընթացին։ Փաշինյանի խոսքով՝ այդ գործընթացում Երևանի համար օրինակ է եղել հենց Եվրոպան, այդ թվում՝ Լեհաստանը․
«Խաղաղության գործընթացում հենց Եվրոպայի շատ բարդ, դաժան պատմության օրինակն է, որ մեզ բերել է այն համոզման, որ խաղաղությունն իսկապես ամենակարևորն է»։
Արձանագրել է՝ կարող են լինել փաստարկներ ընդդեմ խաղաղության, բայց շատ կարևոր է կարողանալ հենվել այն փաստարկների վրա, որոնք ի ցույց են դնում «խաղաղության, ժողովրդավարության և ազատության անայլընտրանք լինելը»։
Ի՞նչ է հայտնի ստորագրված համաձայնագրի մասին
Հայաստանի կառավարությունը Լեհաստանի հետ ստորագրվելիք ռազմատեխնիկական համագործակցության համաձայնագրին հավանություն էր տվել դեռևս նախորդ շաբաթ կայացած նիստի ընթացքում։
Ստորագրումից հետո փաստաթուղթը պետք է քննարկվի և վավերացվի Ազգային ժողովի կողմից։
Նոր համաձայնագիրը գալիս է փոխարինելու դեռևս 2005 թ․-ին վավերացված պաշտպանության բնագավառում համագործակցության մասին համաձայնագրին։
«Նոր համաձայնագիրը նպատակ ունի սահմանել ռազմատեխնիկական ոլորտում համագործակցության հիմնական սկզբունքներն ու ընթացակարգերը՝ հիմնված հավասարության, փոխադարձ հարգանքի և փոխշահավետության վրա»,- ասված է նախագծի հիմնավորման մեջ։
Շեշտվում է, որ Հայաստանը մեծապես կարևորում է Լեհաստանի հետ փոխվստահության վրա հիմնված բարձր մակարդակի հարաբերությունների խորացումը՝ նպատակ ունենալով պաշտպանական ոլորտում արձանագրել «շոշափելի արդյունքներ» և ընդլայնել համագործակցության ուղղություններ։ Այլ մանրամասներ ներկա պահին հայտնի չեն։
Հետևեք մեզ — Facebook | Youtube
Նիկոլ Փաշինյանի այցը Լեհաստան
