«Վրացական երազանքը» երբեք այնքան խոցելի չի եղել, որքան այսօր». կարծիք Թբիլիսիից
Վրացի քաղաքագետը՝ ներքաղաքական զարգացումների մասին
Քաղաքագետ Գիա Նոդիան, գնահատելով Վրաստանում տեղի ունեցող վերջին իրադարձությունները, եզրակացնում է, որ իշխող «Վրացական երազանք» կուսակցությունը երբեք այնքան խոցելի չի եղել, որքան այսօր: Նրա խոսքով՝ նույնիսկ այն քաղաքացիները, «ովքեր 12 տարի չէին համարձակվում որևէ բան անել, սկսում են բարձրաձայնել»:
Գիա Նոդիա
«Այս իրադարձությունները ցույց տվեցին, թե որքան անկանխատեսելի է առհասարակ քաղաքականությունը, և մասնավորապես՝ վրացական քաղաքականությունը:
Ընդամենը մեկ ամիս առաջ՝ [խորհրդարանական] ընտրություններից հետո, գերիշխող էին պարտվողական տրամադրությունները և խորը հիասթափությունը:
Ինքս էլ հույս չունեի, որ Իվանիշվիլիի ռեժիմը մոտ ապագայում որևէ սպառնալիքի կբախվի: Այո, ես մտածում էի, որ դժվար կլինի մեզ իջեցնել Բելառուսի մակարդակին, բայց վստահ չէի:
Կառավարությունում նույնպես կարծում էին, որ սպառնալիք չկա, և [վարչապետ] Իրակլի Կոբախիձեի հայտնի հայտարարության տեսքով [Եվրամիություն մուտք գործելու գործընթացի կասեցման մասին] մեծ սխալ թույլ տվեցին։
Եվ ժողովրդի մոտ անմիջապես հայտնվեցին մարտական տրամադրությունն ու հաղթանակի հույսը: Եվ ոչ պակաս կարևոր է՝ պետական համակարգում սկսեցին առաջանալ փոքրիկ ճաքեր:
Նույնիսկ այն մարդիկ, ովքեր 12 տարի չէին համարձակվում որևէ բան անել, սկսեցին բարձրաձայնել: Հաճախ՝ ոչ միանշանակ, ոչ բավարար հստակ, բայց միտումը, այնուամենայնիվ, լավն է:
«Վրացական երազանքի» կառավարությունը երբեք այնքան խոցելի չի եղել, որքան այսօր: Առաջին անգամ թունելի վերջում լույս է երևում։
Ինձ երբեք չի գրավել հեղափոխական ռոմանտիկան: Ես հուսով էի, որ «վարդերի հեղափոխությունը» կդառնա նման իրադարձություններից վերջինը մեր պատմության մեջ:
Բայց այժմ Իվանիշվիլին ինքն է ստեղծել հեղափոխական իրավիճակ: Ուրեմն մեզ ի՞նչ է մնում անել: Մենք չենք կարող կուսակցություններ ստեղծել, ընդհանրապես երկարաժամկետ ինքնակազմակերպումը դժվարացել է, բայց ժամանակ առ ժամանակ ինքնաբուխ բողոքի ակցիաները կարող են օգնել: Պետք է անենք այն ամենը, ինչ կարող ենք:
Ժողովրդի այն մասը, որը կարելի է անվանել «հասարակություն», կողմ է փոփոխություններին և հասկանում է, որ առանց արմատական քայլերի ոչինչ չի ստացվի:
Ես չգիտեմ, թե ինչպես կզարգանան իրադարձությունները, բայց ստեղծվել է իրական հնարավորություն է, և այն չպետք է բաց թողնել»:
Հիշեցնենք, որ նոյեմբերի 28-ին Վրաստանի վարչապետ Իրակլի Կոբախիձեն հայտարարել էր, որ կառավարությունը որոշում է կայացրել մինչև 2028 թվականի ավարտը կասեցնել Եվրամիությանն անդամակցելու հարցը: Կոբախիձեի խոսքով՝ այսօր Եվրամիության հետ բանակցություններն օգտագործվում են Վրաստանի հասարակությանը շանտաժի ենթարկելու և ճնշելու համար:
