Քաղաքական հաշվեհարդա՞ր․ Երևանի ավագանին մանդատից զրկեց նախկին քաղաքապետին
Հայկ Մարությանը զրկվեց մանդատից
Երևանի ավագանին մանդատից զրկել է ավագանու երեք անդամների, այդ թվում՝ նախկին քաղաքապետ Հայկ Մարությանին։ Պաշտոնական հիմնավորումը նրանց անհարգելի բացակայություններն են։ Մարությանը, սակայն, այս որոշումը քաղաքական հաշվեհարդար է որակել։
Քաղաքապետ Տիգրան Ավինյանը նկատել է, որ որևէ մեկին մանդատից չեն զրկում այն պատճառով, որ իշխանությանը շատ է քննադատում։ Ասել է՝ «բոյկոտի անձրևանոցի» տակ տեղի է ունենում անգործություն, որը չի կարող անդադար արդարացվել։ Շեշտել է՝ իր պարտականությունն է, որ ավագանու ինստիտուտն աշխատի։
«Սա չունի վենդետայի տրամաբանություն, որ դուք եք փորձում առաջ քաշել»,- արձագանքելով ընդդիմությանը՝ ասել է Ավինյանը։
Ավագանու կայացրած որոշումը, իշխող թիմի և ընդդիմության կարծիքները
Պատճառն անհարգելի բացակայություններն են
Իշխող թիմն առաջարկել էր ավագանու 5 անդամների զրկել մանդատներից՝ հաշվի առնելով ավագանու և հանձնաժողովների նիստերից, քվեարկություններից նրանց բացակայությունները։ Օրինակ՝ նախկին քաղաքապետ Հայկ Մարությանը 2023 թ․-ին կազմակերպված 4 նիստերից միայն մեկի ավարտին է ներկա եղել, չի մասնակցել 42 քվեարկություններից ոչ մեկին, ինչպես նաև հանձնաժողովի նիստերին։
Գործընթացը նախաձեռնել են համագործակցության հուշագիր կնքած «Քաղաքացիական պայմանագիր» և «Հանրապետություն» խմբակցությունները։ Սակայն ավագանու ընդդիմադիր անդամների լիազորությունները վաղաժամկետ դադարեցնելու համար նրանց ձայները (32) բավարար չէին։
Ընդդիմադիր «Հանրային ձայն» խմբակցությունից երկու անդամ ևս կողմ քվեարկեցին, սակայն ոչ թե հինգ, այլ երեք ընդդիմադիրների մանդատից զրկմանը։
Պնդեցին՝ Գևորգ Ստեփանյանի աշխատանքը տեսել են, իսկ Զարուհի Փոստանջյանը խմբակցության ներսում խնդիր ունի, «չեն թողնում, որ ներկայանա» նիստերին։ Այսպիսով, դադարեցվեցին միայն Հայկ Մարությանի, Սոնա Աղեկյանի և Նարինե Հայրապետյանի լիազորությունները։
Ի՞նչ է նախատեսում օրենքը
«Տեղական ինքնակառավարման մասին» ՀՀ օրենքն է սահմանում, թե որ դեպքերում կարող են վաղաժամկետ դադարեցվել ավագանու անդամի լիազորությունները։ Օրենքի 22-րդ հոդվածում նշվում է, որ լիազորությունները կարող են դադարեցվել, եթե նա «մեկ տարվա ընթացքում անհարգելի պատճառով բացակայել է ավագանու նիստերի կամ քվեարկությունների կամ մշտական հանձնաժողովի նիստերի ավելի քան կեսից»։
Իշխող թիմը հղում է անում նաև ավագանու որոշումներից մեկին, ըստ որի՝ հարգելի բացակայություն են համարվում միայն պաշտոնական գործուղման և առողջական խնդիր ունենալու դեպքերը՝ համապատասխան փաստաթղթեր ներկայացնելու պարագայում։
Ընդդիմությանը լռեցնելու փո՞րձ
Ավագանու ընդդիմադիր խմբակցությունների անդամները կարծում են՝ այս որոշումներով իշխող թիմը փորձում է լռեցնել ընդդիմությանը։ Ասում են՝ թիրախավորել են այն անձանց, որոնք աչքի են ընկնում քաղաքային իշխանության կոշտ քննադատությամբ և խնդիրները վերհանելու հետևողականությամբ։
«Քաղաքացիական պայմանագիր» խմբակցությունը հերքում է այս մեղադրանքները։ Խմբակցության ղեկավար Արմեն Գալջյանը հայտարարել է, որ ընդդամադիրներին ձայնից զրկելու մասին խոսք գնալ չի կարող, քանի որ մանդատները փոխանցվելու են նույն քաղաքական ուժի ընտրական ցուցակի հաջորդ համարներին։
«Լռեցնում են այն մարդուն, ով խոսում է։ Եթե նիստի չեք գալիս, ելույթ չեք ունենում, ինչի՞ համար ձեզ պետք է լռեցնենք»,- նման արձանագրում է արել փոխքաղաքապետ Սուրեն Գրիգորյանը։
«Անամոթ որոշում է»
Ավագանու որոշումն այսպես է բնորոշել «Ազգային առաջընթաց» խմբակցության ղեկավար, նախկին քաղաքապետ Հայկ Մարությանը։ Նրա փոխանցմամբ՝ ՏԻՄ օրենքը նախատեսում է նման հնարավորություն, սակայն եթե նշված է՝ կարող է հեռացվել, ստացվում է՝ հայեցողական է։ Հարցնում է՝ այդ դեպքում ինչո՞ւ նախկինում մանդատից չէին զրկվում ավագանու անդամները, որոնք «տարիներով նիստերին չէին մասնակցում»։
«Մեզ եք հանում, որովհետև ձեր դեմ ենք դուրս եկել, [քաղաքապետի] հրաժարական ենք պահանջում»,- հայտարարել է Մարությանը։
Նախկին քաղաքապետի խոսքով՝ երևանցիներն են իրեն ընտրել, մանդատ տվել, ուստի իր «գործատուն ընտրողներն են»։ Կարծում է՝ այս որոշմամբ քաղաքային իշխանությունն «արհամարհում է ժողովրդի կամքը, երևանցիների տված քվեն»։
Հայկ Մարությանն ասել է, որ նիստերին ներկայանալը ավագանու անդամի աշխատանքի 10 տոկոսն է միայն։ Թվարկել է՝ նախագծեր են մշակում, քաղաքացիների հետ հանդիպում, հանրային քննարկումներ անցկացնում։ Նաև շեշտել է՝ այդ ամենի համար «ոչ մի լումա չեն ստանում»։ Ավագանին ներկայացուցչական մարմին է, և ավագանու անդամներն աշխատավարձ չեն ստանում։
Նախկին քաղաքապետի գնահատմամբ՝ քաղաքական պայքարի միակ մեթոդը բոյկոտն է մնացել․
«Միայն նիստին չգալով և քվորում չապահովելով է հնարավոր այնպես անել, որ ՔՊ-ն իր տհաս ու վնասակար որոշումները չկայացնի»։
Մանդատներից զրկելու որոշումն, ըստ նրա, նպատակ ունի ընդդիմությանը զրկել պայքարի ևս մեկ հարթակից։
Հայկ Մարությանը լրագրողների հետ զրույցում նշել է նաև, որ պատրաստվում է ստեղծել նոր կուսակցություն և 2026 թ.-ին կայանալիք խորհրդարանական ընտրությունների ժանանակ առաջադրվել որպես վարչապետի թեկնածու:
«Թույլ և վախկոտ իշխանության քայլ է»
«Մայր Հայաստան» խմբակցության ավագանու անդամ Սոնա Աղեկյանի կարծիքն է։ Աղեկյանը նույնպես զրկվեց մանդատից՝ ոչ մի քվեարկության չմասնակցելու պատճառով։
Ելույթում հիշեցրել է՝ ինքը կոշտ և արմատական ընդդիմություն է եղել նաև այլ քաղաքական ուժերի օրոք։
«Մենք ընդհարումներ, փոխադարձ քննադատություններ, դատական գործընթացներ ունեցել ենք, բայց նրանցից որևէ մեկի մտքով չի անցել ինձ, իմ ընկերներին զրկել մադանտից՝ ինչ է թե, իրենց ուզածով չենք շարժվել»,- ասել է նա՝ կայացված որոշումը բնորոշելով որպես «աննախադեպ երևույթ»։
Հետևեք մեզ — Facebook | Youtube | Telegram
Հայկ Մարությանը զրկվեց մանդատից
