15 կմ երեխաների հետ և խաչերով՝ ընդդեմ կորոնավիրուսի․ երթ Աբխազիայում, տեսանյութ

Շուրջ 100 մարդ է Աբխազիայում մասնակցել կորոնավիրուսի դեմ խաչերթի 2020 թ–ի մարտի 27–ին։

Աբխազիայում դեռևս վարակման ոչ մի դեպք չի գրանցվել, սակայն կառավարությունը սկսել է կանխարգելիչ միջոցներ ձեռնարկել։

Մարտի 27–ին Աբխազիայի խորհրդարանն արտակարգ դրություն է սահմանել, սակայն բավականին մեղմ ձևով։ Նախօրեին Աբխազիայում կասեցվել էր հանրային ողջ տրանսպորտի երթևեկությունը, մարդկանց կոչ են արել առավելագույնս տանը մնալ և նվազեցնել միմյանց հետ շփումները։

Սակայն երթն, այնուամենայնիվ, կայացել է։

Շատերն իրենց հետ վերցրել են երեխաներին, խաչերը ձեռքին շուրջ 15 կմ քայլել Սուխումի մայր տաճարից մինչև Կաման գյուղի եեղեցի, որն Աբխազիայում սրբավայր է համարվում։

Երթի նախաձեռնողը «Սուրբ Գևորգ Զորավար» տեղի մարտական ակումբի մարզիչ Թեյմուրազ Գերգեդավան է։

Աբխազ ուղղափառ եկեղեցու առաջնորդ Վիսարիոն Ապլիան շնորհակալություն է հայտնել խաչերթի համար, սակայն դրան չի մասնակցել։

Այն գաղափարի կողմնակցի կարծիքը, թե եկեղեցական ավանդույթները համաճարակի դեմ պայքարի լավագույն միջոցներից մեկն են․

«Եկեղեցիները պետք չէ փակել։ Անհավատներն ու սակավահավատները, միևնույն է, այնտեղ չեն գնում, իսկ ջերմություն ունեցողները տանն են մնում։ Բացի այդ, ե՞րբ են հավատացյալները վարակվել խաչ, սրբապատկեր կամ մասունքներ համբուրելիս։ Սակայն տգետներին դա չես ապացուցի։ Պետք էլ չէ ոչ ոքի ոչինչ ապացուցել։ Հիմարին՝ հիմարություն։ Խելացիին՝ խելք»։

Սոցցանցերում մեկնաբանությունների մեծ մասում համաշխարհային համավարակի ժամանակահատվածում զանգվածային հավաք կազմակերպելուն քննադատորեն վերաբերվեցին։

Մի քանի բնորոշ մեկնաբանություն․

«Ո՞ւր են նախատեսված կանխարգելիչ միջոցները։ Ինչո՞ւ չեք հետևում դրանց»

«Հավատքը յուրաքանչյուրի սրտում է։ Պետք չէ դրա համար քայլել փողոցներով, երբ կարանտին է։ Եթե ձեզ չեք խնայում, խնայեք ձեր մերձավորներին»։

«Աշխարհում բոլոր տաճարները փակվում են, քանի որ հոգևորականները մտածում են հավատացյալների մասին։ Եթե խաչերթ են ուզում, թող քահանաներն անեն»։

«Մենք բոլորս միասին պետք է աղոթենք։ Թող ընդհանուր աղոթքի համար ժամ հայտարարեն»

«Բժշկության ոլորտում նոբելյան մրցանակը 2020–ին Աբխազիան է ստանալու»։