Ֆրանսիայի հրապարակից՝ ԱԺ ամբիոն․ թեժ կրքեր Արցախի դրոշի շուրջ
Թեժ կրքեր Արցախի դրոշի շուրջ
Հայաստանի պաշտպանության նախկին նախարար, ԱԺ պատգամավոր Սեյրան Օհանյանը խորհրդարանի ամբիոնին է փակցրել Արցախի դրոշը, այնուհետև հայտարարել՝ «պահպանենք այս դրոշը, քանզի պաշտպանելով Արցախը՝ պաշտպանում ենք Հայաստանը»:
Օհանյանը, որը ղեկավարում է խորհրդարանի ընդդիմադիր «Հայաստան» խմբակցությունը, մինչ այդ ԱԺ գործընկերներին տեղեկացրել է, որ ընդդիմությունը բոյկոտում է քառօրյա նստաշրջանը՝ մեկնելով Արցախ ու ՀՀ սահմանամերձ մարզեր։
Արցախի դրոշի շուրջ կրքերը թեժացել էին դեռևս օրեր առաջ։ «Ազգային ժողովրդավարական բևեռ» քաղաքական շարժման ներկայացուցիչները ներկել էին դրոշի սպիտակ հատվածը, որով այն տարբերվում է ՀՀ դրոշից։ Ակցիայի մասնակիցների խոսքով, ուզում էին ասել, որ «Արցախը Հայաստան է, և վերջ»։
Արցախի դրոշի ներկման և ԱԺ ամբիոնում տեղադրման մասին, նաև ընդդիմադիր և իշխանական պատգամավորների կարծիքներ։
«Արցախի դրոշը ներկողները»
Հայաստանում գործող «Ազգային ժողովրդավարական բևեռ» քաղաքական շարժումն օրերս հանրահավաք էր անցկացնում «Ազատության» հրապարակում»՝ պնդելով, որ «գործող իշխանությունը ծառայում է ռուս-թուրքական, ադրբեջանական շահերին»:
Ըստ կազմակերպության՝ Հայաստանի արտաքին քաղաքականությունը պետք է լինի արևմտամետ:
Հանրահավաքի նախօրեին «Ազգային ժողովրդավարական բևեռը» ներկայացնող անձինք ներկել էին Արցախի դրոշը, որը Երևանի Ֆրանսիայի հրապարակում տեղադրել էին խորհրդարանի ընդդիմադիր ուժերը։
«Մենք ներկեցինք այդ սպիտակ ժապավենը՝ ասելու, որ Արցախը Հայաստանն է, և վերջ»,- իրենց քայլն այսպես էին պարզաբանել Բևեռի ներկայացուցիչները։
Արցախի դրոշի ներկման փաստը մեծ աղմուկ բարձրացրեց հանրության շրջանում։ Տեսանյութը դատախազության կողմից ուղարկվել է ոստիկանություն։ Դեպքի հանգամանքները պարզվում են։
Արցախի դրոշը Երևանի Ֆրանսիայի հրապարակում տեղադրվել էր ապրիլի 5-ին խորհրդարանական ընդդիմության կազմակերպած հանրահավաքից հետո: Այդ կերպ ԱԺ «Հայաստան» և «Պատիվ ունեմ» խմբակցություններն ուշադրություն էին հրավիրել Արցախի կարգավիճակի խնդրի վրա:
«Ազգային ժողովրդավարական բևեռի» մի խումբ ակտիվիստներ ներկել էին այն «Մեկ պետություն՝ մեկ դրոշ» խորագրով ակցիայի շրջանակներում։ Ակցիայի մասնակիցների պնդմամբ՝ Արցախի դրոշը տեղադրելով՝ «Արցախն անջատում են Հայաստանից և նվիրում Ռուսաստանին, Արցախը Հայաստանի մաս է, ինչպես Սյունիքն ու Շիրակը»։
Դրոշը ներկելուց ժամեր անց Դաշնակցության ներկայացուցիչները Ֆրանսիայի հրապարակում Արցախի նոր դրոշ էին տեղադրել։
Դրոշի ներկումը դատապարտել էր Հայաստանում Արցախի մշտական ներկայացուցչությունը․ «Կոչ ենք անում բոլոր ուժերին և քաղաքացիներին քաղաքական դիրքորոշում արտահայտելիս զերծ մնալ պետական խորհրդանիշներն ապականելու հակաօրինական արարքներից»։
Արցախի դրոշը՝ ՀՀ խորհրդարանի ամբիոնին
ՀՀ պաշտպանության նախկին նախարար, ԱԺ ընդդիմադիր «Հայաստան» խմբակցության ղեկավար Սեյրան Օհանյանը ապրիլի 12-ին ԱԺ ամբիոնից տեղեկացրեց, որ խորհրդարանական ընդդիմությունը բոյկոտում է քառօրյա նստաշրջանը։ Օհանյանը հայտարարեց, որ մեկնելու են Արցախ և Հայաստանի սահմանամերձ մարզեր՝ «այնտեղ, որտեղ այսօր մեր երկրի առաջնահերթ օրակարգն է»։
Պաշտպանության նախկին նախարարի գնահատմամբ՝ ՀՀ օրվա իշխանություններն անկարող են լուծել Հայաստանի և Արցախի առջև ծառացած խնդիրները, «ամեն ինչ ընթանում է ադրբեջանաթուրքական օրակարգով»․
«Իրավիճակին ոչ համարժեք է իրեն դրսևորում խորհրդարանական մեծամասնությունը, որը մեր իրական օրակարգերն ԱԺ-ում առաջնահերթորեն քննարկելու, լուծումներ գտնելու փոխարեն բացարձակ ձեռնպահ կեցվածք է ընդունում, մանավանդ, երբ հարցը վերաբերում է Արցախին, և կցված լինելով գործադիր իշխանությանը՝ ապաքաղաքական է դարձնում երկրի թիվ մեկ քաղաքական ինստիտուտը՝ խորհրդարանը»։
Ավարտելով խոսքը՝ պաշտպանության նախկին նախարարը խորհրդարանի ամբիոնին փակցրեց Արցախի դրոշը ու հայտարարեց՝ «պահպանենք այս դրոշը, քանզի պաշտպանելով Արցախը՝ պաշտպանում ենք Հայաստանը»:
Իշխանականների և ընդդիմադիրների արձագանքը
Խորհրդարանական ընդդիմությունը Օհանյանի այս քայլը բուռն ծափահարությունների արժանացրեց։ ԱԺ փոխնախագահ, ընդդիմադիր պատգամավոր Իշխան Սաղաթելյանն էլ Արցախի դրոշն ամրացրեց ԱԺ նախագահության սեղանին: Ընդդիմադիր «Հայաստան» և «Պատիվ ունեմ» խմբակցությունների պատգամավորները հեռացան ԱԺ նիստերի դահլիճից՝ իրենց սեղաններին թողնելով Արցախի դրոշներ։
Ընդդիմադիր «Հայաստան» խմբակցության պատգամավոր, ԱԺ փոխնախագահ Իշխան Սաղաթելյանի խոսքով՝ բոյկոտը պայմանավորված է խորհրդարանի օրակարգում «ՀՀ-ի ու Արցախի համար կենսական հարցերի չընդգրկմամբ»։
Ընդդիմադիր պատգամավորի դիտարկմամբ՝ գործող իշխանությունը վտանգում է Արցախը՝ շարունակելով վարել «Արցախից ձեռքերը լվանալու և հրաժարվելու» քաղաքականություն։
«Ասում են՝ Արցախ չենք գնում, որ Ալիևը չջղայնանա, Հայաստանի տարածքային ամբողջականությունը չենք պաշտպանում, որ ավելի շատ տարածքներ չկորցնենք։ Արցախից չենք խոսում, որովհետև դա վտանգավոր է։ Այսինքն` ակնհայտ է, որ օրվա իշխանությունը երկիրը փորձում է տանել նոր կապիտուլյացիայի, իրենց այս վարքագիծը հիմնավորելու համար փորձում են նման գռեհիկ, անմիտ ելույթներ ունենալ՝ հերթական անգամ մեր ժողովրդին խաբելով, մոլորեցնելով և Ալիևով վախեցնելով»,- լրագրողների հետ զրույցում ասաց Սաղաթելյանը։
Իշխանական պատգամավորներն ընդդիմադիրների վարքագիծը որակեցին որպես «դատարկ պոպուլիզմ»։
ՔՊ-ական պատգամավոր Վահագն Ալեքսանյանը ամբիոնից հեռացրեց դրոշը.
«Երբ անփառունակությունը դառնում է ճակատագիր, երբ տխմարաբանությունը դառնում է ամենօրյա հանապազօրյա աշխատանք, պաշտպանության նախկին նախարարները ստիպված են լինելու Արցախի դրոշով գալ ու այս դրոշը դնել Ազգային ժողովի ամբիոնում, դնել այն ժամանակ, երբ 30 տարի շարունակ այս դրոշը ճիշտ տեղերում դնելու փոխարեն ու այս դրոշի, Հայաստանի դրոշի ամրությունն ապահովելու փոխարեն՝ զբաղված են եղել միայն մի բանով` թալանով»:
ԱԺ իշխող խմբակցության ղեկավար Հայկ Կոնջորյանի գնահատմամբ՝ խորհրդարանական ընդդիմությունն իր այս քայլով չի պաշտպանում Արցախը․
«Խորհրդարանական ընդդիմությունն իր այս քայլով ոչ թե պաշտպանում է Արցախը, այլ սադրում է, ավելի է սրում Արցախի և հայության անվտանգային խնդիրները։ Խորհրդարանական ընդդիմությունը նորից օգտագործում է Արցախի հարցը և մեր անվտանգային խնդիրները Հայաստանում իշխանությունը բռնազավթելու և հեղաշրջում իրականացնելու համար, և սա դրա վառ ապացույցն է»։
Թեժ կրքեր Արցախի դրոշի շուրջ
