«Պուտինը Փաշինյանին ոչինչ չի առաջարկի, կհամոզի չմերձենալ Արևմուտքի հետ»․ կարծիքներ
Փաշինյան-Պուտին սպասվելիք հանդիպումը
Հայաստանի վարչապետ Նիկոլ Փաշինյանն աշխատանքային այցով մեկնել է Մոսկվա։ Նախօրեին նա չէր մասնակցել նախագահ Պուտինի երդմնակալության արարողությանը։ Մամուլի ասուլիսում էլ հայտարարել էր՝ «ոնց որ թե» հրավեր չի ստացել։ Այսօր Նիկոլ Փաշինյանի նախագահությամբ տեղի է ունենալու Եվրասիական տնտեսական բարձրագույն խորհրդի նիստը: Երեկոյան նախատեսվում է նաև ՀՀ և Ռուսաստանի ղեկավարների երկկողմ հանդիպում։
Մինչ այդ հայաստանյան փորձագետները քննարկում են՝ ի՞նչ կարելի է ակնկալել Փաշինյան-Պուտին երկկողմ հանդիպումից, արդյո՞ք կքննարկվի նաև ՀԱՊԿ-ից Հայաստանի դուրս գալու թեման, ի՞նչ նոր պահանջներ կարող է ներկայացնել Երևանին Մոսկվան։
Ի՞նչ է հայտնի սպասվելիք հանդիպման մասին, մեկնաբանություններ
«Բազմաթիվ խնդրահարույց հարցեր են կուտակվել»
Նիկոլ Փաշինյանն ու Վլադիմիր Պուտինը վերջին անգամ հանդիպել էին նախորդ տարեվերջին Սանկտ Պետերբուրգում՝ Եվրասիական բարձրագույն տնտեսական խորհրդի նիստի շրջանակում։
Խոսլեով սպասվող հանդիպման մասին՝ ՌԴ նախագահի օգնական Յուրի Ուշակովն ասել է՝ վերջին ժամանակներում Ռուսաստանի և Հայաստանի հարաբերություններում խնդրահարույց հարցեր են կուտակվել, երկրների միջև տարբեր մակարդակի շփումներն էլ նկատելիորեն նվազել են։ Ուշակովը հիշեցրել է, որ Երևանից քննադատություններ են հնչում ՌԴ և ՀԱՊԿ ռազմական դաշինքի հասցեին։ Բացի այդ՝ ՀՀ-ն հարաբերություններ է զարգացնում Արևմուտքի հետ՝ դիտարկելով Եվրամիությանը միանալու տարբերակներ, ակտիվացնելով կապերը ՆԱՏՕ-ի հետ։
Նախօրեին ասուլիսի ժամանակ ՌԴ նախագահի հետ հանդիպմանն անդրադարձել է նաև Հայաստանի վարչապետը՝ հաստատելով, որ իսկապես կան բազմաթիվ կուտակված խնդիրներ, որոնց մի մասը հայկական կողմը բարձրաձայնել է։
«Մենք երբեք այն կարծիքին չենք եղել, որ այդ հարցերը բարձրաձայնվում են բարձրաձայնվելու համար։ Դրանք բարձրաձայնվում են ՀՀ-ՌԴ բարեկամանական հարաբերությունների համատեքստից նեգատիվ նյուանսները հանելու նպատակադրումով»,- հայտարարել է Փաշինյանը։
Հայաստանի իշխանությունները հայտարարում են, որ դե ֆակտո սառեցրել են անդամակցությունը ՀԱՊԿ-ին։ Բացատրում են, որ այն մի քանի անգամ հրաժարվել է արձանագրել, թե որն է իր պատասխանատվության գոտին ՀՀ-ում և չի կատարել իր պարտավորությունները։ Երևանը չի մասնակցում կառույցի աշխատանքներին, համատեղ զորավարժություններին։
Նիկոլ Փաշինյանը խորհրդարանի ամբիոնից հայտարարել է, որ եթե այս պրոցեսը շարունակվի, Հայաստանը «դե յուրե էլ պիտի սառեցնի» իր մասնակցությունը։
Մեկնաբանություններ
Քաղաքագետ Տիգրան Գրիգորյանի խոսքով՝ Հայաստանի ու Ռուսաստանի ղեկավարները կքննարկեն երկրների միջև հարաբերություններում առկա խնդիրները, սակայն այդ հանդիպումից առանցքային փոփոխություններ սպասել պետք չէ։
«Ամենայն հավանականությամբ հիմնական շեշտը լինելու է տնտեսական հարցերի վրա։ Տեսնում ենք, որ ՀՀ իշխանությունները հայ-ռուսական հարաբերություններում քաղաքական ճգնաժամի ֆոնին տնտեսական հարցերը տարանջատում են քաղաքական օրակարգից»,- Factor TV-ի հետ զրույցում նկատել է նա։
Գրիգորյանի համոզմամբ՝ այս փուլում Մոսկվայի համար գլխավոր առաջնահերթությունը Ուկրաինան է։
«Չեմ կարծում, թե Հարավային Կովկասում, մասնավորապես՝ ՀՀ հետ հարաբերություններում ինչ-որ վերջնագրերի լեզվով են խոսելու այս փուլում»,- նկատել է նա։
Քաղաքագետն անդրադարձել է նաև ՌԴ հովանու ներքո գործող ՀԱՊԿ ռազմական դաշինքը լքելու հավանականությանն ու շեշտել՝ կարծես թե Երևանը բավարարվում է մասնակցությունը դե ֆակտո սառեցնելու քաղաքականությամբ․
«Ֆորմալ առումով ՀԱՊԿ-ից դուրս գալու օրակարգ միգուցե գոյություն ունի, բայց ես չեմ տեսնում գործոններ, որոնք կարող են արագացնել այդ գործընթացը։ Չկա նմանատիպ պահանջ նաև Արևմուտքից»։
Քաղաքագետ Ստեփան Գրիգորյանի գնահատմամբ՝ Պուտինը Փաշինյանին կառաջարկի հետ կանգնել Արևմուտքի հետ մերձենալու մտադրությունից՝ փոխարենը ոչինչ չառաջարկելով։
Կարծում է՝ Փաշինյան-Պուտին հանդիպման ընթացքում անպայման կքննարկվի նաև ՀԱՊԿ-ից Հայաստանի դուրս գալու հարցը․
«Կարող եմ ասել՝ ինչ պատասխան կստանա Փաշինյանը։ Կասեն, որ ՀԱՊԿ-ը շատ էֆեկտիվ, շատ հստակ աշխատող կազմակերպություն է, իզուր է Հայաստանը փորձում վարկաբեկել ՀԱՊԿ-ը։ Կասեն, որ կառույցը շատ հստակ դիրքորոշում ունի նաև ՀՀ սահմանների հետ կապված, ՀԱՊԿ-ը ասում է ՝ արեք դելիմիտացիա-դեմարկացիա, հետո մեզանից բան պահանջեք։ Այդ դա Պուտինը կկրկնի»։
Քաղաքագետի խոսքով՝ ողջունելի կլինի, եթե Փաշինյանը Երևանի դժգոհությունների մասին ուղիղ խոսի ՌԴ նախագահի հետ։ Մյուս կողմից նկատում է՝ կողմերը մնալու են իրենց կարծիքին, ոչինչ էլ տեղից չի շարժվելու։ Կարծում է՝ դժվար թե Մոսկվայից վերադառնալուց հետո ՀՀ իշխանությունները համաձարկվեն ՀԱՊԿ-ից դուրս գալու որոշում կայացնել։
Հետևեք մեզ — Facebook | Youtube | Telegram
Փաշինյան-Պուտին սպասվելիք հանդիպումը
