«Անդառնալիության կետն անցել ենք»․ Փաշինյանի պատասխանը Պուտինին
Փաշինյան-Պուտին հեռակա բանավեճ ՀԱՊԿ թեմայով
Հայաստանի վարչապետ Նիկոլ Փաշինյանն արձագանքել է Ռուսաստանի նախագահ Վլադիմիր Պուտինի պնդմանը, թե ՀԱՊԿ-ը չէր կարող միջամտել 2020 թ․-ի 44-օրյա պատերազմին, քանի որ «Ղարաբաղը Հայաստանի տարածք չէր»։
Փաշինյանը հերթական անգամ ներկայացրել է ռազմական դաշինքի հետ Երևանի ունեցած խնդրի էությունն ու բացատրել, որ այն ամենևին կապ չուներ Ղարաբաղի հետ։ Խոսքն, ըստ վարչապետի, 2021-22 թվականներին ՀՀ ինքնիշխան տարածքի նկատմամբ ագրեսիայի մասին է։
«Ամենայն հարգանքով Ռուսաստանի Դաշնության հարգելի նախագահի նկատմամբ՝ մենք գործընկերներ ենք և աշխատում ենք միասին, բայց այս հայտարարությունը ակնհայտ է դարձնում ընդհանուր [ոչ կառուցողական] իրավիճակը, որ կա ՀԱՊԿ-ում»,- նախօրեին խորհրդարանում հայտարարել է Փաշինյանը։
Իր ելույթում Վլադիմիր Պուտինը կարծիք էր հայտնել, թե կա հնարավորություն, որ Հայաստանն ի վերջո կվերադառնա ՀԱՊԿ-ում ամբողջական ֆորմատով աշխատանքին։ Վարչապետ Փաշինյանը, սակայն, հայտարարել է՝ «անդառնալիության կետն անցել ենք»։
Սոցիալական ցանցերում քաղաքացիներն ակտիվորեն քննարկում են Փաշինյանի արձագանքը Պուտինի հայտարարությանը։ Մի մասը վարչապետին հորդորում է ոչ թե խոսել ՀԱՊԿ-ից դուրս գալու մասին, այլ այդ ուղղությամբ քայլեր ձեռնարկել։ Մյուսները, սակայն, մտահոգված են և զգուշացնում են հնարավոր հետևանքների մասին։
«Մենք մեզ համարում ենք ՀԱՊԿ-ից դուրս»․ Փաշինյան
Փաշինյանի փոխանցմամբ՝ դաշնակիցները ՀՀ-ին վստահեցնում էին՝ Հայաստանի սահմանները իրենց համար կարմիր գիծ են և հայտարարում, որ որևէ մեկը չի կարող ոտնձգություն իրականացնել։ Ասում է՝ երբ կարմիր գիծը հատվեց և ոտնձգություն տեղի ունեցավ, ՀԱՊԿ-ից միայն ասացին, թե «գիտեք, ոնց որ թե սահմանը դելիմիտացված չէ»։
Կառավարության ղեկավարը հերթական անգամ արձանագրել է՝ ռազմական դաշինքի գործընկերները չեն կարողացել պատասխանել հարցին՝ ՀՀ-ում որտեղով է անցնում ՀԱՊԿ պատասխանատվության գոտին․
«Եվ իմ ռեակցիան ես հրապարակային ասել եմ։ Ասել եմ՝ եթե Հայաստանում ՀԱՊԿ-ը չունի պատասխանատվության գոտի, էդ գիծը չի կարող ցույց տալ, ուրեմն փաստացի ՀԱՊԿ-ը որպես կազմակերպություն գոյություն չունի: Այստեղ Ղարաբաղի հետ կապված իրավիճակը ընդհանրապես կապ չունի։ ՀԱՊԿ-ի հետ մեր մասնակցությունը սառեցնելու համատեքստում Ղարաբաղի թեման ընդհանրապես չենք շոշափել»։
Փաշինյանը հայտարարել է՝ «մենք մեզ արդեն իսկ համարում ենք ՀԱՊԿ-ից դուրս, իրենք ինչ ուզում են, թող որոշեն»։
Վարչապետի խոսքով՝ Երևանը չի մասնակցում ո՛չ ՀԱՊԿ փաստաթղթերի մշակմանը, ո՛չ դրանց քննարկմանը, ո՛չ առաջարկներ է տալիս, ոչ էլ եղած առաջարկների վերաբերյալ դիրքորոշում հայտնում։ Պարզապես վետո չի դնում որևէ փաստաթղթի վրա, քանի որ իրեն համարում է կառույցից դուրս։
«Մենք չենք մտնում իրենց գործերի արանքը, դա էլ հարգանքով մեր գործընկերների նկատմամբ։ Բայց էլի եմ ասում, այդ թվում՝ այս իրադարձությունների տարբերությունը և դրա արդեն հրապարակային փոխադարձ արտահայտումն արդեն ավելի ու ավելի դժվար, եթե չասեմ՝ անհնար է դարձնում ՀՀ վերադարձը ՀԱՊԿ։ Կարծում եմ՝ այստեղ անդառնալիության կետն անցել ենք»,- ընդգծել է նա։
«Հնարավորություն կա, որ Հայաստանն ի վերջո կվերադառնա»․ Պուտին
«Հայաստանի հանդեպ ոչ մի արտաքին ագրեսիա տեղի չի ունեցել։ ՀԱՊԿ-ը կոչված է երկրներն արտաքին ագրեսիայից պաշտպանելու։ Սակայն Հայաստանը Ղարաբաղի անկախությունը չէր ճանաչել, առավել ևս՝ Ղարաբաղն իր երկրի տարածքում չէր ներառել։ Ու, հետևաբար, հավակնությունները, որ ՀԱՊԿ-ը պետք է այդ անկլավի տարածքում կռվեր, տարօրինակ են»,- Աստանայում կազմակերպված ՀԱՊԿ գագաթնաժողովի ժամանակ հայտարարել էր ՌԴ նախագահը։
Հայաստանի ինքնիշխան տարածքի վրա հարձակումներին, մասնավորապես՝ 2021 թ․-ի մայիսին և 2022 թ․ի սեպտեմբերին Ադրբեջանի ձեռնարկած գործողություններին Պուտինը չէր անդրադարձել։
Գագաթնաժողովի ժամանակ, որին հայկական կողմը չէր մասնակցում, Վլադիմիր Պուտինը խոսել է նաև ՀԱՊԿ-ում անդամակցությունը սառեցնելու վերաբերյալ ՀՀ որոշման մասին․
«Յուրաքանչյուր անդամ երկիր ինքն իր համար է որոշում՝ ինչն է իր ազգային շահերին համապատասխանում։ Մենք դրան հարգանքով կմոտենանք։ Բայց չէ՞ որ Հայաստանը չի հայտարարել ՀԱՊԿ-ից դուրս գալու մասին։ Համենայն դեպս՝ դեռ չի հայտարարել։ Այլ միայն նշել է, որ ընդմիջում է վերցնում։ Միևնույն ժամանակ, Հայաստանը հավանություն է տալիս բոլոր փաստաթղթերին, որոնք ընդունվում են մեր այսօրվա հանդիպման և բանակցությունների ընթացքում։ Եթե դա այդպես է, ապա հնարավորություն կա, որ Հայաստանն ի վերջո կվերադառնա ՀԱՊԿ-ում ամբողջական ֆորմատով աշխատանքին»։
Մեկնաբանություններ սոցցանցերից
«Ի՞նչ է նշանակում համարում ենք։ Դուրս արի պաշտոնական»։
«Պաշտոնական դիմի, դուրս արի։ Թե՞ սպասում ես իրանք հանեն, որ հետո ասես՝ ես մեղավոր չեմ»։
«Հայաստանը ՀԱՊԿ-ից դուրս նշանակում է ՀՀ-ն դարձնել Սիրիա։ Թուրքերը մեկ օրում գրավեցին չորս միլիոնանոց Հալեպը։ Հայաստանին նույն բախտն է սպասվում»։
«Շուտով չենք ունենա գազ, լույս, հացահատիկ։ Ապրանքը, որը սպառվում է ռուսական շուկայում, կմնա։ Երկիրը կկանգնի աղետի առաջ։ Աստված ոչ անի ռուսական բանակը դուրս գա երկրից, Հայաստանից կմնա ց տառը։ Հուսով եմ ազգը կսթափվի (ընդիմություն չունենք), ոտքի կկանգնի և կկատարի իշխանափոխություն»։
«Արդեն ավելի քան 100 տարի է, ինչ ռազմավարական դաշնակիցներ Ռուսաստանը, Թուրքիան և Ադրբեջանը Հայաստանին նշանակել են իրենց ռազմավարական նշանակություն ունեցող թշնամի՝ համաձայն իրենց համատեղ ազգային անվտանգության հայեցակարգի։ ԱՊՀ, ԵԱՏՄ, ՀԱՊԿ լցնել կոյուղի և ջուրը քաշել»։
Հետևեք մեզ — Facebook | Youtube | Telegram
Փաշինյան-Պուտին հեռակա բանավեճ ՀԱՊԿ թեմայով
