Փաշինյանի վարկանիշն անկում է ապրել. CRRC-ի կողմից հարցվածների 15%-ն է վստահում նրան
Փաշինյանի վարկանիշն անկում է ապրել
Հայաստանի վարչապետ Նիկոլ Փաշինյանին ու նրա գլխավորած «Քաղաքացիական պայմանագիր» կուսակցությանը վստահում է հարցման մասնակցածների 15 տոկոսը։ Կովկասի հետազոտական ռեսուրսների կենտրոնի՝ CRRC-ի հետազոտության արդյունքներն են:
Հարցումն անց է կացվել 2024 թվականի հուլիսի 27-հոկտեմբերի 10-ն ընկած ժամանակահատվածում, մասնակցել է 1561 քաղաքացի: Հարցվածների 55 տոկոսը շեշտել է՝ չի վստահում որևէ քաղաքական ուժի:
Երրորդ նախագահ Սերժ Սարգսյանին վստահություն է հայտնել 2 տոկոսը, երկրորդ նախագահ Ռոբերտ Քոչարյանին՝ 4 տոկոսը: Երկրի խորհրդարանում Քոչարյանի ղեկավարած «Հայաստան» դաշինքի մաս է կազմում նաև Հայ հեղափոխական դաշնակցությունը: Հետազոտության համաձայն՝ ՀՅԴ-ին վստահողների շրջանակը չի գերազանցում երկու տոկոսը։
- Բաքուն կրակ է բացել Սյունիքում, «հետագա սադրանքների» մեջ էլ Երևանին է մեղադրում
- «Տանգոն մենակ չեն պարում». ինչու՞ Ադրբեջանը չի ստորագրում խաղաղության պայմանագիրը
- «Պատերազմ չի լինելու, լինելու է խաղաղություն»․ Փաշինյան
«Աղբյուրի լրջությունը միանշանակ չէ»
Իշխանական պատգամավոր Էդուարդ Աղաջանյանը դժվարանում է մեկնաբանել հետազոտության արդյունքները: Factor TV-ի հետ զրույցում նշել է, թե ուսումնասիրությունն իրականացրած կառույցին ծանոթ չէ, ուստի աղբյուրի լրջությունն իր համար միանշանակ չէ:
Պատգամավորի խոսքով՝ իր քաղաքական թիմն ունի աշխատելու տեղ, պետք է առավել մեծ ջանքեր ներդնի ավելի արդյունավետ կառավարելու համար.
«Ես չասացի, որ մարդիկ հիասթափվել են իշխանությունից կամ Փաշինյանից: Կարծում եմ՝ ՔՊ-ն պետք է ավելին անի և ավելի ինտենսիվ աշխատի, որպեսզի հանրության ակնկալիքներն արդարացնի»:
Աղաջանյանը, սակայն, շեշտել է՝ թիմի առաջնորդի վարկանիշը կցանկանար ստուգել իր պատկերացրած օբյեկտիվ հարցումներով: Չի հստակեցրել՝ որ կառույցի կողմից արվող հարցումները նկատի ունի:
ԱԺ նախագահը վստահ է՝ ընտրություններում ՔՊ-ն կհաղթի առնվազն 50+1 տոկոսով
Մայիսի սկզբին լրագրողների հետ զրույցում խորհրդարանի խոսնակ Ալեն Սիմոնյանն ասել էր՝ ՀՀ-ն ունի օրինական ընտրված իշխանություն, իսկ 2021 թվականին կայացած արտահերթ խորհրդարանական ընտրությունների արդյունքները որևէ մեկի մոտ կասկած չեն հարուցել:
«Վստահ եմ՝ եթե ընտրությունները նույնիսկ այս ուրբաթ լինեն, «Քաղաքացիական պայմանագիրը» հաղթելու է այդ ընտրություններում: Վստահ եմ, որ հաղթելու է 50+1 տոկոսով, իսկ 2026 թ.-ին մոտ, հնարավոր է, նույնիսկ ավելի շատ ձայներով»,- հայտարարել էր Սիմոնյանը:
Թվերն այդքան էլ լավատեսական չեն
Նիկոլ Փաշինյանի ղեկավարած «Քաղաքացիական պայմանագիր» կուսակցության վարկանիշի նվազում էր արձանագրել նաև Միջազգային հանրապետական ինստիտուտը (IRI): Ամերիկյան կազմակերպության իրականացրած հարցման համաձայն՝ գործող վարչապետին վստահում է քաղաքացիների միայն 16 տոկոսը:
«Ո՞ր կուսակցությանը կամ դաշինքին կտայիք Ձեր ձայնը, եթե խորհրդարանական ընտրություններն անցկացվեին հաջորդ կիրակի» հարցին ի պատասխան իշխող «Քաղաքացիական պայմանագիր» կուսակցությանը քվեարկելու պատրաստակամություն էր հայտնել 20%-ը: 2%-ը նշել էր, որ կքվեարկեր Հանրապետական կուսակցության օգտին (առաջնորդում է երրորդ նախագահ Սերժ Սարգսյանը)։ Եվս 2%-ն ասել էր, որ ձայն կտար ընդդիմադիր «Հայաստան» դաշինքին (առաջնորդն է երկրորդ նախագահ Ռոբերտ Քոչարյանը)։
Իշխող ուժի վարկանիշի անկման մասին են վկայում նաև վերջին խորհրդարանական ընտրությունների արդյունքները: 2018 թվականի ընտրություններում Փաշինյանի գլխավորած ուժին ձայն էր տվել շուրջ 885 հազար քաղաքացի: Իսկ 2021 թ.-ի արտահերթ ընտրությունների ժամանակ այդ թիվը կրճատվել էր 197.450-ով։
Հետևեք մեզ — Facebook | Youtube | Telegram
Փաշինյանի վարկանիշն անկում է ապրել
