Հայաստանի վարչապետ․ հենց Ադրբեջանն է հարձակվել Հայաստանի վրա

Հայ–ադրբեջանական սահմանին հուլիսյան սրացումը Հայաստանի վարչապետը բացատրել է նրանով, որ «հենց Ադրբեջանն է հարձակվել Հայաստանի վրա»։ Այս մասին Նիկոլ Փաշինյանը հայտարարել է BBC–ին տված հարցազրույցում։

Նա խոսել է նաև Ռուսաստանի և Արևմուտքի հետ Հայաստանի հարաբերությունների, իր պաշտոնավարման երկու տարիների արդյունքների, կորոնավիրուսի դեմ կառավարության պայքարի արդյունավետության մասին։

• Հայաստանը չի հավակնում Ռուսաստանի ներգրավմանն Ադրբեջանի հետ կոնֆլիկտին

• Կարծիք․ ո՞վ է սրացում սադրել Հայաստանի և Ադրբեջանի սահմանին։ Արդյո՞ք դա կարող էր Ռուսաստանը լինել

Հարցազրույցի հիմնական թեզերը

Ի պատասխան «HARDtalk» ծրագրի հաղորդավար Սթիվեն Սակուրայի հարցերին Հայաստանի վարչապետը խոսել է

հայ–ադրբեջանական սահմանին հուլիսյան ռազմական սրացման մասին։ Նիկոլ Փաշինյանը հերքել է պաշտոնական Բաքվի հայտարարությունն այն մասին, թե Հայաստանն է մարտական գործողություններւը սադրել։ Նա կրկին ընդգծել է «շփման գծում մշտադիտարկման համակարգ ներդնելու» անհրաժեշտությունը, որպեսզի յուրաքանչյուր սրացումից հետո միջազգային հանրությունն իրադարձությունների երկու հակադիր վարկածներ չլսի։

ղարաբաղյան հակամարտության կարգավորման մասին։ Հայաստանի վարչապետը կարծում է, որ հնարավոր չէ խաղաղության հասնել Հայաստանի միակողմանի գործողությունների շնորհիվ։ Նա Ադրբեջանի նախագահ Իլհամ Ալիևին մեղադրել է ռազմական հռետորաբանության և հակամարտությունն ուժով լուծելու փորձի համար։

«Արցախը Հայաստան է, և վերջ» հայտարարության մասին․

«Ինչո՞ւ եմ ես ասել, որ Լեռնային Ղարաբաղը՝ Արցախը, Հայաստան է։ Առաջին հերթին, Լեռնային Ղարաբաղը հազարամյակներով բնակեցված է բնիկ հայ ժողովրդով, և, ի դեպ, Արցախ անվանումը նույնպես մի քանի հազար տարի գոյություն ունեցող տեղանուն է»։

Հայաստանի աշխարհաքաղաքական կողմնորոշման մասին․

«Ռուսաստանը Հայաստանի ռազմավարական գործընկերն է բոլոր ոլորտներում, մասնավորապես, տնտեսության և անվտանգության հարցերում, իսկ Եվրամիության հետ Հայաստանը Համապարփակ և ընդլայնված գործընկերության մասին համաձայնագիր է ստորագրել։ Ներքաղաքական բարեփոխումների անցկացման հարցում գլխավոր աջակցությունը Երևանը ստանում է ԵՄ–ից։ Մենք մասնակցում ենք Աֆղանստանում, Լիբանանում, Կոսովոյում և Մալիում ՆԱՏՕ–ի խաղաղապահ առաքելություններին։ Բացի այդ, մենք արդյունավետ համագործակցում ենք ԱՄՆ հետ ռազմական ոլորտում»։

ԱՄՆ և Իրանի հետ Հայաստանի հարաբերությունների մասին․

«Մենք ԱՄՆ և Իրանի հետ հարաբերություններում խնդիր չունենք։ Եվ մենք անում ենք մեր ուժերի ներածի սահմաններում ամեն ինչ՝ ԱՄՆ և Իրանի հետ ներկայիս լավ հարաբերությունները պահպանելու համար»։

2018 թ–ի «թավշյա» հեղափոխությունից հետո վարչապետի պաշտոնում անցկացրած երկու տարվա աշխատանքի արդյունքների մասին։ Կառավարության ղեկավարը նշել է, որ անցյալ տարի Հայաստանը Եվրոպայի երկրների շարքում ռեկորդային տնտեսական աճ է գրանցել․ ՀՆԱ–ն աճել է 7,6%–ով․

«Համավարակային իրավիճակը կասեցրեց մեր թռիչքը, սակայն մենք այն շարունակելու ենք»։

ընդդիմադիրների քննադատության մասին իր հասցեին․

«Հայաստանը ժողովրդավարական երկիր է, ընդդիմությունն ազատ է իր կարծիքն արտահայտել։ Ես երջանիկ եմ, որ Հայաստանում ընդդիմությունն այժմ շատ ավելի ազատ է գործում, քան հեղափոխությունից առաջ»։

կորոնավիրուսի դեմ կառավարության պայքարի անարդյունավետ լինելու մասին գնահատականին․

«Ցավոք, համաճարակը զարգանում է ամբողջ աշխարհում։ Մեր երկրում հակահամաճարակային ռազմավարություն է ընդունվել։ Եվ այդ ռազմավարությունը համապատասխանում է մեր երկրի պայմաններին։ Եկեք չշտապենք և եզրակացություններ անենք համաճարակը հաղթահարելուց հետո»։

համաճարակի պայմաններում Լեռնային Ղարաբաղում առանց դիմակի խնջույքի մասնակցելու մասին․

«Այդ օրը մենք գործել ենք՝ Լեռնային Ղարաբաղում հաստատված կանոնների համաձայն»։

Ի՞նչ են գրում սոցցանցերում

Նիկոլ Փաշինյանի՝ Բի–Բի–Սիին տված հարցազրույցը սոցցանցերի հայկական տիրույթում քննարկումների գլխավոր թեման է դարձել։

Ահա մի քանի մեկնաբանություն․

«Շատ թույլ հարցազրույց է՝ սկսած թույլ անգլերենից, ավարտած ոչ այնքան ուժեղ դիմակայությամբ։ Հավանաբար, Փաշինյանը կարծում էր, որ փոքրիկ հարցիկներ են լինելու, որոնք վերջերս տալիս են «Ազատություն» ռադիոկայանի լրագրողները։ Բայց սխալվել է»։

«Ըստ Փաշինյանի՝ կորոնավիրուսի դեմ պայքարում նա ու իր կառավարությունն ամեն ինչ ճիշտ են արել։ Եվ դա ասում է մի մարդ, որի երկիրն առաջատարն է տարածաշրջանում մահացության և վարակման ցուցանիշներով»։

«Այն հանգամանքը ծաղրելու փորձը, որ կառավարությունը ձախողել է կորոնավիրուսի դեմ պայքարը, լկտի էր»։

«Մի տեսակ միակողմանի հարցազրույց էր։ Այնպիսի տպավորություն էր, որ հաղորդավարը նպատակ էր դրել Հայաստանին մեղավոր ճանաչել բոլոր կետերով, այլ ոչ թե Փաշինյանին լսել»։