«Այսօր ավելի անկախ ու ինքնիշխան ենք, քան երբևէ». Փաշինյան
Փաշինյանի ելույթը Սարդարապատի հուշահամալիրում
«29 հազար 743 քառակուսի կմ միջազգայնորեն ճանաչված տարածքով Հայաստանի Հանրապետությունը մեր ժողովրդի ոչ թե կորուստների, այլ ձեռքբերումների արտահայտությունն է»,- Հանրապետության տոնի (Առաջին հանրապետության անկախության օրվա) առիթով ունեցած ելույթում արձանագրել է ՀՀ վարչապետ Նիկոլ Փաշինյանը:
Փաշինյանը հայտարարել է՝ հայ ժողովուրդն այլևս հայրենիք փնտրելու, հայրենիքի մասին երազելու կարիք չունի, որովհետև նրա երազանքներն իրագործված են, հայրենիքը՝ ի դեմս Հայաստանի Հանրապետության, գտնված է: Կարծում է՝ ՀՀ-ն իր ինքնիշխանությունը զարգացնելու, պետականությունը գիտակցելու ու հարատև դարձնելու պատմական հնարավորություն է ստացել 2020 թվականից (նկատի ունի 44-օրյա պատերազմից հետո) ի վեր՝ նահատակների կյանքի գնով և անցնելով դաժան փորձությունների միջով:
«Այսօր մենք ավելի պետություն ենք, քան երբևէ, ավելի ինքնիշխան ենք, քան երբևէ, ավելի անկախ ենք, քան երբևէ»,- վստահեցրել է կառավարության ղեկավարը:
Վարչապետի հետ Սարդարապատի հերոսամարտի հուշահամալիրում են եղել նաև նախագահ Վահագն Խաչատուրյանը, Ազգային ժողովի նախագահ Ալեն Սիմոնյանն ու բարձրաստիճան այլ պաշտոնյաներ: Վարչապետի ելույթից հետո հնչել է ՀՀ պետական օրհներգը, տեղի է ունեցել տոնական քայլերթ:
Փաշինյանի ելույթի կարևոր դրվագները՝ ստորև
- Հայ միգրանտների «ամերիկյան երազանքը» և ԱՄՆ միգրացիոն քաղաքականությունը․ կա արտաքսման վտանգ
- «ՌԴ-ից Հայաստանի ունեցած կախվածությունները դարձել են սպառնալիք»․ հետազոտություն
- «Բաքվին անհանգստացնում են ՀՀ դատական հայցերը, սլաքներն ուղղվում են Ալիևի վրա»․ կարծիք
«Պետք է հաղթահարենք պետականության նկատմամբ քամահրանքը»
Հայաստանի ղեկավարն ընդգծել է՝ առաջին հանրապետության հիմնադրումը հայ ժողովրդի հազարամյա պատմության մի շրջադարձային իրադարձություն էր, որը մեզ 4․5 դար պետականազուրկ եղած ազգից կրկին վերածեց պետականակերտ ժողովրդի: Փաշինյանի խոսքով՝ այդ պետությունը, սակայն, ԽՍՀՄ գոյության գրեթե ողջ ընթացքում թիրախավորվեց որպես չարիք, ծաղրի ու արհամարհանքի առարկա դարձավ.
«Կայսրությունը դրանով նպատակ էր հետապնդում ոչնչացնել անկախ պետության այն ծիլերը, որ մեր գիտակցության մեջ կարող էր վերընձյուղած լինել Առաջին Հանրապետությունը»։
ՀՀ վարչապետի գնահատմամբ՝ անկախ և ինքնուրույն լինելու վախերը չհաղթահարվեցին նաև Հայաստանի անկախացումից հետո, քանի որ ԽՍՀՄ 70–ամյա պրոպագանդան խորը հետք էր թողել:
«Հետահայաց վերլուծությունն ակնհայտ է դարձնում, որ պետականության նկատմամբ քամահրանքը, ինքնիշխանությունից ու ինքնուրույնությունից մեր վախերը լիարժեք հաղթահարված չեն, պատմությունն ու աշխարհը մենք շարունակում ենք հաճախ ընկալել այն բանաձևերով, որ ԽՍՀՄ կայսերական քարոզչությունը հետևողականորեն սերմանել է մեզանում»,- մանրամասնել է նա:
«Արտաքին ուժերի երաշխավորած անվտանգությունը խաբուսիկ է»
Նիկոլ Փաշինյանն առաջարկում է պետության ու մեր ինքնության հարատևությունն ապահովելու համար, առաջին հերթին, լիարժեք հաղթահարել ինքնիշխանությունից ունեցած վախերն ու արձանագրել մի քանի առանցքային իրողություններ:
Հայրենիք փնտրելու կարիք չունենալուց բացի վարչապետը նաև նշել է՝
- «Մեր ինքնությունը մեր պետությունն է, մեր պետությունն է մեր ինքնությունը, որովհետև բոլոր այն հատկանիշները, որոնք պայմանավորում են մեր ինքնությունը, ձեռք են բերվել, ձևավորվել ու հաստատվել են պետականության շնորհիվ:
- Վերջին 4.5 դարվա մեր պատմությունը, Պատմական Հայաստանը մեզ մեկական հիմնական ուղերձ են հղում․ «Մի՛ կրկնեք այդ պատմությունը», «Մի՛ գնացեք իմ ճանապարհով», «Մի՛ կրկնեք ինձ»։ Եվ Հայաստանի Հանրապետության, ժողովրդի ընտրությամբ ձևավորված կառավարությունն ըմբռնել և իրագործում է պատմական այս ուղերձը։
- Արտաքին ուժերի կողմից երաշխավորված անվտանգությունը խաբուսիկ է։ Մենք ինքներս ենք մեր անվտանգության երաշխավորը, և այդ անվտանգության երաշխավորման գործուն միջոցներն են, առաջին հերթին, քաղաքական դիվանագիտական գործիքները, անմիջական հարևանների հետ հարաբերությունների կարգավորումը, հարևանների և ոչ թե հեռավորների հետ խաղաղություն հաստատելը։
- Ազատության և պետության նկատմամբ ունեցած պատասխանատվության շրջանցումը թե՛ ազատության և թե՛ պետականության կորստի ճանապարհ են։ Այդ պատասխանատվության կատարման որակն ու այդ պատասխանատվության նկատմամբ ունեցած հարազատությունը յուրաքանչյուր քաղաքացու ազատության և բարեկեցության երաշխիքն են»։
«Թևակոխել ենք ձեռքբերումների պատմության խոստումնալից դարաշրջան»
Փաշինյանի համոզմամբ՝ դեպի ՀՀ-ի հարատևություն, պետական անկախություն, ինքնիշխանություն, բարեկեցություն ու ազատություն տանող ընթացքը մտնում է «պատմականորեն վճռական» փուլ։ Վարչապետը թվարկել է մի շարք հաջողություններ, որոնք նրա բնորոշմամբ՝ անուրանալի են, մասնավորապես՝
- «Հայաստանի և Ադրբեջանի միջև խաղաղության և միջպետական հարաբերությունների հաստատման մասին» համաձայնագրի նախագծի համաձայնեցումը,
- Հայաստանի և Թուրքիայի միջև ակտիվ երկխոսություն հաստատումը,
- Հայաստանի և Իրանի միջև հարաբերությունների աննախադեպ բարձր մակարդակը,
- Հայաստանի և Վրաստանի միջև ռազմավարական գործընկերության հաստատումը,
- ՀՀ-ի բոլոր սահմանային կետերում բացառապես հայ սահմանապահների կողմից սահմանային հսկողության իրականացումը,
- սերտ հարաբերությունների զարգացումը Ռուսաստանի Դաշնության և Չինաստանի հետ,
- Միացյալ Նահանգների հետ ռազմավարական գործընկերության հաստատումը,
- Հնդկաստանի հետ գործակցության խորացումը,
- Ֆրանսիայի և Եվրամիության հետ մեր հարաբերությունների՝ աննախադեպ բարձր մակարդակի վրա լինելը:
«Մենք հաղթահարել ենք կորուստների պատմության շրջափուլը և թևակոխել ենք ձեռքբերումների պատմության մի խոստումնալից դարաշրջան»,- հայտարարել է նա:
Վարչապետը շեշտել է՝ հոռետեսությունն ու հուսահատությունն այլևս Հայաստանի ուղեկիցը չեն։
«ՀՀ ուղեկիցը պետականակենտրոն ինքնագիտակցությունն է, աշխարհի գիտելիքահենք իմացությունը, զարգացումն ու ժողովրդավարությունը։ Խաղաղությունն ու անվտանգությունը դառնալու են ՀՀ-ի երկարաժամկետ ուղեկիցները։ Պատերազմ չի՛ լինելու, լինելո՛ւ է խաղաղություն»,- ամփոփել է Նիկոլ Փաշինյանը:
Հետևեք մեզ — Facebook | Youtube | Telegram
Փաշինյանի ելույթը Սարդարապատի հուշահամալիրում
