«Հիմքը ժողովրդավարությունն է»․ Փաշինյանը՝ ԵՄ հետ գործակցության մասին
Փաշինյանը՝ Հայաստան-ԵՄ գործընկերության մասին
Հնարավոր է՝ առաջիկայում ստորագրվի Հայաստանում Եվրամիության քաղաքացիական առաքելության ներկայությունը կարգավորող պայմանագիր: Նախօրեին Գերմանիայի կանցլերի հետ համատեղ ասուլիսի ժամանակ հայտարարել է Հայաստանի վարչապետը։
«Այժմ ԵՄ դիտորդական առաքելության ներկայությունը կարգավորվում է փոխադարձ պաշտոնական նամակներով: Բայց մենք ունենք նաև պայմանավորվածություն, որ այդ ներկայությունը, առաքելությունը կարգավորող պայմանագիր պետք է քննարկվի, բանակցվի և ստորագրվի»,- նշել է Փաշինյանը։
Փետրվարի 20-ից Հայաստանում մեկնարկել է ԵՄ քաղաքացիական նոր առաքելության գործունեությունը։ Ինչպես նախորդ՝ երկամսյա առաքելությունը, այնպես էլ այս մեկը տեղակայվել է Հայաստան-Ադրբեջան սահմանի հայկական կողմում։ Նշվում է, որ 100 անզեն դիտորդներ են ներգրավված։ ԵՄ փոխանցմամբ՝ առաքելության նպատակն է «նպաստել Հայաստանի սահմանամերձ շրջաններում կայունությանը, կառուցել վստահության և անվտանգություն, ապահովել միջավայր, որը կնպաստի Հայաստանի և Ադրբեջանի միջև կարգավորման ջանքերին»։
Մարտի 1-ին առաքելությունը գործարկել է իր կենտրոնակայանը Վայոց Ձորի մարզկենտրոնում՝ Եղեգնաձորում։
Աշխատանքային այցով Գերմանիա մեկնած Հայաստանի վարչապետը կանցլեր Օլաֆ Շոլցի հետ հանդիպումից հետո այցելել է նաև Արտաքին քաղաքականության գերմանական խորհուրդ, մասնակցել «Անվտանգությունը և կայունությունը Հարավային Կովկասում. Հայաստանի հեռանկարը» թեմայով քննարկմանը: Գերմանիայի կանցլերի հետ համատեղ ասուլիսի և քննարկման ժամանակ Փաշինյանն անդրադարձել է Հայաստանում ԵՄ առաքելության տեղակայմանը և Եվրամիության հետ երկկողմ հարաբերություններին։
JAMnews-ն առանձնացրել է Փաշինյանի ելույթների կարևոր դրվագները
«Վճռորոշ դեր կխաղա տեղում անվտանգության ապահովման գործում»
Սա Հայաստանի վարչապետի կարծիքն է Եվրամիության առաքելության մասին։ Նրա խոսքով՝ դիտորդները կնպաստեն նաև տարածաշրջանի կայունությանն ու իրավիճակի մասին «ժամանակին և հուսալի կերպով» կզեկուցեն» ԵՄ գործընկերներին և կառույցի անդամ երկրներին։
Խոսելով դիտորդական առաջին առաքելության մասին, որը Հայաստան եկավ 2022 թ․-ի հոկտեմբերին Պրահայում կայացած քառակողմ հանդիպումից հետո, նա նշել է, որ դա կարևոր քայլ էր «իրավիճակի դեէսկալացիայի ուղղությամբ»։ ԵՄ անդամ բոլոր երկրներին, այդ թվում՝ Գերմանիային Փաշինյանը շնորհակալություն է հայտնել Հայաստանի խնդրանքին արձագանքելու և նոր՝ երկարաժամկետ առաքելության տեղակայման մասին որոշում կայացնելու համար։ Ընդգծել է նաև, որ որոշման կայացման գործում շատ մեծ է եղել Գերմանիայի կանցլերի «անձնական ներդրումը»։
«Շատ հպարտ եմ ընդհանրապես ամբողջ այս առաքելությամբ, առաջին հերթին, մեծ ներդրում է, կզարգացնենք այս առաքելությունը և կտեսնենք»,- համատեղ ասուլիսի ժամանակ նշել է Գերմանիայի կանցլերը՝ պատասխանելով լրագրողների հարցին, թե՝ «առաջիկայում կարո՞ղ ենք ակնկալել դիտորդների թվաքանակի ավելացում»։
Օլաֆ Շոլցը նշել է՝ Գերմանիան աջակցում է Եվրոպական խորհրդի նախագահ Շառլ Միշելի միջնորդական ջանքերին, այդ թվում՝ դիտորդական առաքելության կազմում անձնակազմ ուղարկելով: Ընդգծել է՝ Հայաստանում ԵՄ նոր առաքելությունը ղեկավարելու է գերմանացի դաշնային ոստիկան։
Մատնանշելով տեղի ունեցող աշխարհաքաղաքական «տեկտոնական տեղաշարժերը»՝ վարչապետն ասել է, որ Հայաստանն այսօրվա մարտահրավերների «առաջին ծիլերին» և «տարածաշրջանում եվրոպական անվտանգության ճարտարապետության փլուզմանն» ականատես է եղել դեռևս 2020 թվականին՝ 44-օրյա պատերազմի ժամանակ։ Անդրադարձել է նաև 2022 թ․-ի սեպտեմբերին Հայաստանի ինքնիշխան տարածքի վրա ադրբեջանական հարձակմանն ու հայտարարել, որ «օկուպացվել է ավելի քան 150 քառակուսի կիլոմետր» տարածք։
«Խորացող աշխարհաքաղաքական անկայունությունը, աճող լարվածությունն ու անկանխատեսելիությունը թուլացնում են աշխարհակարգն ու միջազգային անվտանգային համակարգը՝ էլ ավելի մեծ մարտահրավերներ ստեղծելով հատկապես Հայաստանի համար՝ բարդ տարածաշրջանում ժողովրդավարություն հանդիսացող երկիրն ավելի խոցելի դարձնելով»,- շեշտել է նա։
«ԵՄ-ն Հայաստանի հիմնական գործընկերներից է»
Արտաքին քաղաքականության գերմանական խորհրդի քննարկման ժամանակ Հայաստանի ղեկավարը հայտարարել է՝ ժողովրդավարական բարեփոխումների ճանապարհին Եվրամիությունը Հայաստանի հիմնական գործընկերներից մեկն է։
Փաշինյանը հիշեցրել է գործընկերության օրակարգի նոր ձևաչափի ՝ Քաղաքական և անվտանգության երկխոսության մասին։ Ընդգծել է, որ այդ ձևաչափով առաջին քննարկումը կազմակերպվել էր նախորդ տարվա հունվարին Երևանում․
«Հարցերի լայն շրջանակի, այդ թվում՝ ընդհանուր տարածաշրջանային իրավիճակի և որոշակի ոլորտներում մեր համագործակցության խորացման հեռանկարների շուրջ քննարկումը ոչ միայն ժամանակին էր, այլև զգալիորեն հարստացրեց ԵՄ-ի հետ մեր տարաբնույթ գործընկերության օրակարգը»։
Վարչապետը շեշտել է՝ «Արևելյան գործընկերության անդամ երկրների ընդհանուր գնահատման ինդեքս»-ի վերջին ցուցանիշների համաձայն՝ Հայաստանն է գլխավորել «Ժողովրդավարություն և լավ կառավարում» վարկանիշային աղյուսակը։
Հերթական անգամ խոսել է 2018 թ․-ին Հայաստանում տեղի ունեցած «թավշյա հեղափոխության» և 2021 թ․-ին կազմակերպված արտահերթ խորհրդարանական ընտրությունների մասին։ Շեշտել է՝ դրանք ապացուցել են, որ «Հայաստանի ժողովրդավարական զարգացման ուղին անշրջելի է»։ Փաշինյանը կարժում է՝ Հայաստանը հիմա միջազգայնորեն ճանաչված ժողովրդավարական երկիր է, սակայն կան անվտանգային մարտահրավերներ, որոնք լուրջ հարցադրումներ են առաջացնում․
«Արդյո՞ք հայկական ժողովրդավարությունը ունակ է ապահովել անվտանգություն, սա հարց է, որն իրավացիորեն հուզում է այսօր հայ հասարակությանը, և խնդիր, որը պետք է հասցեագրվի մեր կառավարության կողմից»։
Վարչապետը վստահեցրել է՝ չնայած բոլոր մարտահրավերներին, Հայաստանը հավատում է, որ երկրի անվտանգային ճարտարապետությունը չի կարող համապարփակ լինել առանց մարդու իրավունքների նկատմամբ հարգանքի, օրենքի գերակայության և ժողովրդավարության։ Հայաստանի վարչապետի խոսքով՝ պաշտոնական Երևանի համար «ժողովրդավարությունը ռազմավարություն է»։
Հետևեք մեզ — Facebook | Youtube | Telegram
Փաշինյանը՝ Հայաստան-ԵՄ գործընկերության մասին
