Սեպտեմբերից Երևանում տրանսպորտը կթանկանա
Տրանսպորտի թանկացում Երևանում
Օրերս Երևանի ավագին 32 կողմ, 2 դեմ և 0 ձեռնպահ ձայների հարաբերակցությամբ ընդունեց նախագիծ, ըստ որի՝ սեպտեմբերի 1-ից մայրաքաղաքում տրանսպորտը կթանկանա։ Եթե այսօր մեկ երթն արժե 100 դրամ, ապա աշնանից տոմսի արժեքը լինելու է 280 դրամ, սակայն 90 րոպե երթևեկելու համար։
Քաղաքացիները շեշտում են՝ 90 րոպեում 2-3 անգամ տրանսպորտից օգտվել չեն կարողանա, ժամանակը կսպառվի։ Տրանսպորտի թանկացումից երևանցիները դժգոհ են։ Սոցիալական ցանցերում նրանք իրենց մտահոգություններն են հայտնում՝ նշելով, որ տրանսպորտը թանկանում է գրեթե երեք անգամ, այնինչ իրենց աշխատավարձն անփոփոխ է։
Հանրային տրանսպորտի միասնական տոմսային համակարգի գնային փոփոխության հիմնավորումները, երևանցիների մեկնաբանությունները
Կգործեն նաև ամսական և տարեկան տոմսեր
Քաղաքային իշխանությունը երևանցիներին առաջարկում է մի քանի տարբերակ՝
- 30 օրվա համար վճարել 8․800 դրամ,
- 90 օրվա համար վճարել 23․600 դրամ,
- 1 տարվա համար վճարել 88․000 դրամ։
Այդ բոլոր դեպքերում քաղաքացիները կարող են երթևեկել անսահմանափակ։
Իշխող «Քաղաքացիական պայմանագիր» խմբակցությունը վստահեցնում է՝ նախագիծը կնպաստի ապագայում տրանսպորտային համակարգի արդիականացմանը։ Նկատում են՝ նոր ավտոբուսները հնարավոր չէ սպասարկել 100 դրամով։ Քաղաքային իշխանության փոխանցմամբ՝ ներկա պահին նոր շարժակազմը 878-է։
«Մինչև սեպտեմբեր 8.6 մետր երկարությամբ 170 նոր ավտոբուս և 15 տրոլեյբուս դուրս կգա երթուղի»,- հայտնել է փոխքաղաքապետ Սուրեն Գրիգորյանը։
Նաև նշել է, որ քաղաքապետարանն աշխատելու է արտոնությունների փաթեթների մշակման ուղղությամբ։ Դրանք գործելու են որոշակի խմբերի (ուսանողներ, սոցիալապես անապահով անձինք և այլն) համար։ Հավաստիացրել է՝ այդ հարցում առաջնորդվելու են միջազգային փորձով։
«Ուղեվարձը չպետք է թանկանա»․ նախկին քաղաքապետի առաջարկը
Երևանի նախկին քաղաքապետ Հայկ Մարությանը, որը մեկ ամիս առաջ զրկվել էր ավագանու անդամի մանդատից, թիմակիցների՝ «Ազգային առաջընթացի» անդամների հրավերով քաղաքապետարան էր եկել։ Նրան, սակայն, թույլ չտվեցին վերև բարձրանալ և ներկա լինել նիստին։
Մարությանը պնդում է՝ տրանսպորտի ուղեվարձը չպետք է թանկանա, խնդիրը պետք է լուծել սուբսիդավորման միջոցով։
Արձագանքելով այս առաջարկին՝ քաղաքապետ Տիգրան Ավինյանն ասել է, որ հանրային տրանսպորտի ոլորտը սուբսիդավորվում է, բայց «ավելի նվազ չափով»։
«Կարո՞ղ ենք արդյոք ամբողջ այս գումարներն ուղղել տրանսպորտին, իհարկե։ Կարող ենք ոչ մի ծրագիր չանել, սաղ կյանք նստենք, տրանսպորտ սուբսիդավորենք բոլորով միասին։ Ասենք՝ դե ժողովո՛ւրդ ջան, էս ա, եկեք պահենք 97 թվի մասնավորին տրվող 100 դրամը»,— շեշտել է Ավինյանը։
Նախկին քաղաքապետն ուներ նաև մեկ այլ առաջարկ, այն է՝ «ունենում են քարտ մարդիկ, լիցքավորում են, ինչքան ուզում են՝ 500 դրամ, 1000, 2000 դրամ և ամեն անգամ մտնելիս հպում ես, և քո այդ հաշվից 100 դրամ տարվում է»։
«Մեկ հպումով 100 դրամ գանձվի, էլ փաթեթների իմաստը ո՞րն է»,- առաջարկին այսպես է արձագանքել «Քաղաքացիական պայմանագիր» խմբակցության ղեկավար Արմեն Գալջյանը։
Ընդդիմադիր երկու խմբակցությունները՝ «Մայր Հայաստանը» և «Ազգային առաջընթացը» բոյկոտել էին, լքել նիստերի դահլիճը, որպեսզի քվորում չապահովվի։ Նախքան քվեարկության մեկնարկն էլ ընդդիմադիրները բողոքի ակցիա էին իրականացրել հենց նիստերի դահլիճում։ «Հանրային ձայն» խմբակցության երկու անդամները մասնակցել էին և դեմ քվեարկել։ Իշխող թիմի առաջարկած նախագիծը, սակայն, հավաքել էր անհրաժեշտ թվով ձայներ և ընդունվել։
«Նպատակներից մեկն էլ ստվերի վերացումն է»
Իշխող «Քաղաքացիական պայմանագիր» խմբակցության փոխանցմամբ՝ նախագիծն ունի երկու նպատակ։ Դրանք են՝
- շարունակել հանրային տրանսպորտի սուբսիդավորումը, բայց ի հաշիվ այլ ոլորտների ծախսեր չանել,
- վերացնել ստվերի տեսքով առկա արատավոր երևույթները։
«Նոր նախագծի հաշվարկներով համարվում է, որ տրանսպորտի ոլորտում ամբողջական ստվերը վերացված է։ Ամբողջական գումարները նոր տոմսային համակարգի գներով մտնելու են Երևանի քաղաքապետարան»,- շեշտել է քաղաքապետ Տիգրան Ավինյանը։
Երևանցիների կարծիքները
«Ամոթ է, ամոթ։ Վրաստանից օրինակ վերցրեք։ Գնացեք, տեսեք, թե ինչքան լավ է աշխատում տրանսպորտը, գործում են զեղչեր։ Բարելավեք, նոր թանկացրեք։ Թբիլիսիում մեկ տարվա տոմսը արժե 38 հազար դրամ, իսկ Երևանում՝ 88 հազար»։
«Մարդկանց աշխատավարձը՝ ցածր, տրանսպորտի վարձը՝ բարձր։ Եթե ավելացնենք, որ տրանսպորտից օգտվում են նաև դպրոցականները և ուսանողները, որոնք եկամուտ չունեն, այս նախագիծը ուղղակի թալան է»։
«Չի կարելի մի ծառայությունը միանգամից 3 անգամ թանկացնել, այն դեպքում, երբ մարդկանց եկամուտը գրեթե անփոփոխ է։ Բոլորիդ էլ պարզ է, թե ովքեր են հիմնականում օգտվում տրանսպորտից, չէ՞, թե՞ երկնքից եք իջել»։
«90 րոպեում հազիվ առավոտյան Դավթաշենից հասնենք Էրեբունի, ուր մնաց 3 տրանսպորտ փոխենք։ Կարո՞ղ ա Մարսից եք եկել»։
«Հերթական հիմարությունը։ Դրա հետ միասին էլ աշխատավարձ բարձրացրեք, որ հասարակ բանվորը կարողանա օգտվի տրանսպորտից ու հասնի աշխատանքի»։
«Տեղյա՞կ եք՝ քաղաքացին ինչքան աշխատավարձ է ստանում՝ ուղղակի գրոշներ։ Քաղաքացու օգուտը ո՞րն է։ Աշխատի, չուտի, չկարողանա ընտանիք պահի․․․ Ուղեղով մտածեք»։
Հետևեք մեզ — Facebook | Youtube | Telegram
Տրանսպորտի թանկացում Երևանում
