Տասը հոգուց ավելի չհավաքվել։ Վրաստանի կառավարությունն ուզում է երկարաձգել սահմանափակումներն՝ արտակարգ դրություն չհայտարարելով

Վրաստանում կարող են օրենք ընդունել, որը թույլ կտա կառավարությանը սահմանափակել հանրային կյանքն առանց արտակարգ դրություն հայտարարելու։ Օրինագիծը հակասում է սահմանադրությանն ու շատ շահեկան է իշխանություններին 2020 թ–ի աշնանը կայանալիք խորհրդարանական ընտրությունների նախաշեմին, կարծում է ընդդիմությունը։

Վրաստանի խորհրդարանում օրինագիծ է գրանցվել, որի ընդունման դեպքում կառավարությունն իրավունք է ստանալու որոշակի սահամանփակումեր մտցնել, անգամ եթե երկրում արտակարգ դրություն հայտարարված չէ։

Օրինակ՝ կառավարությունը կարող է արգելել տասը հոգուց ավելի հավաքները կամ տեղաշարժը փողոցներում որոշակի ժամերի։

Այդպիսի միջոցներ կիրառելու համար պետք չի լինի ոչ արտակարգ դրության հայտարարել, ոչ էլ խորհրդարանի համաձայնությունը ստանալ։

Վրաստանի կառավարությունը սահմանափակումներ կիրառելու իրավունք ունի նաև հիմա․ կորոնավիրուսի համավարակի առնչությամբ հայտարարված արտակարգ դրությունը չեղարկվել է մայիսի 22–ին, սակայն հատուկ օրենքով կառավարությունը լիազորվել է սահմանափակումներ կիրառել մինչև հուլիսի 15–ը։

Վրաստանի կառավարությունը պահանջում է երկարաձգել այդ նորմը, որպեսզի հնարավորություն ունենա քաղաքացիների սահմանադրական իավունքները սահմանափակելու մինչև 2021 թ–ի հունվարի 1–ն առանց խորհրդարանի թույլտվության։

• Վրաստանի Պետանվտանգության խորհուրդը հետաքրքրվում է կորոնավիրուսի մասին ֆեյսբուքյան գրառումներով։ Ուշադրության դաշտում են հայտնվել քաղաքական գործիչներ և լրագրողներ

Երկրում, որտեղ նախընտրական արշավ է ընթանում, և հոկտեմբերին կարևոր խորհրդարանական ընտրություններ են անցկացվելու, այդպիսի սահմանափակումների կիրառումը վտանգավոր լծակ է կառավարության ձեռքում, կարծում են քաղաքական գործիչներն ու փորձագետները։

Ընդդիմությունը վստահ է, որ, եթե օրինագիծն ընդունվի, կառավարությունը դրանից օգտվելու է, որպեսզի թույլ չտա ընդդիմությանը նախընտրական արշավ և բողոքի ցույցեր իրականացնել կորոնավիրուսի տարածման սպառնալիքի առիթով։

Ըստ օրինագծի՝ այդ փոփոխության նպատակը գործող իրավական մեխանիզմի պահպանումն է 2020 թ–ի հուլիսի 15–ից հետո, ինչը կառավարությանը կօգնի անհապաղ և արդյունավետ միջոցներ ձեռնարկել համավարակի դեմ պայքարում։

«Մենք պետք է նախանշված ժամկետում ընտրություններ անցկացնենք և ոչ մի դեպքում չպետք է արտակարգ դրություն հայտարարենք սեպտեմբերին կամ հոկտեմբերին ոչ մեծ խնդրի պատճառով։ Հետևաբար, պետք է լինեն նորմատիվ ակտեր, որոնք մեզ թույլ կտան վերահսկել իրավիճակն, ինչպես հաջողվել է անել մինչև հիմա», — պարզաբանել է խորհրդարանական մեծամասնության առաջնորդ Մամուկա Մդինարաձեն։

Ընդդիմությունն ու հասարակական կազմակերպություններն օրինագիծը հակասահմանադրական են համարում։ Նրանց խոսքով՝ դրա ընդունման դեպքում կառավարությունն իրավիճակի լիակատար վերահսկողության է ձգտելու մինչև ընտրություններ։ Խորհրդարանական ընտրությունները Վրաստանում նախանշված են հոկտեմբերին, իսկ նոյեմբերին կարող է երկրորդ փուլ կայանալ միամանդատ ընտրատարածքներում։

«Իշխող «Վրացական երազանք» կուսակցությունը հակասահմանադրական օրենք է ընդունել, որն անտեսում է խորհրդարանի դերն ու կառավարությանը թույլ տալիս սահմանափակել քաղաքացիների իրավունքներն ու ազատությունները։ Այժմ այն պատրաստվում է երկարաձգել այդ ռեժիմը մինչև հունվարի 1–ն, ինչը մեզ համար անընդունելի է», — հայտարարել է «Եվրոպական Վրաստան» խմբակցության անդամ Օթար Կախիձեն։

Խորհրդարանական ընդդիմությունը դեմ է լինելու օրինագծին։

Վրաստանում կայուն համաճարակային իրավիճակ է, ինչի հետևանքով էլ այն ներառվել է 14 երկրների ցանկում, որոնց համար Եվրամիությունը բացել է իր սահմանները։