Վրաստանում ամուսինը սպանել է կնոջը։ Վերջին վեց տարում սպանվել է 160 կին

Սպանությունը տեղի է ունեղել արևելյան Վրաստանի Սուրամի քաղաքում։ Ամուսինը կրակել է կնոջ վրա, երբ նա քնած է եղել։

Սպանվածը երեք երեխաների մայր էր։

Ըստ ներքին գործերի նախարարության տվյալների՝ հետաքննություն է սկսվել 109 հոդվածով, այն է՝ միտումնավոր սպանություն ծանրացուցիչ հանգամանքներով։

Վիճակագրություն․ 160 սպանված կին

Ֆեմիցիդը կնոջ սպանությունն է՝ գենդերային հատկանիշով։ Ըստ ժողովրդական պաշտպանի տվյալների՝ Վրաստանում վերջին վեց տարում 160 կին է սպանվել։

• «Լինում է, որ ամուսինը ծեծում է»։ Չեչնիայի ղեկավարը պաշտպանել է 23-ամյա կնոջ մահվան համար ենթադրյալ մեղավորներին

2020 թ–ին սպանվել է 9 կին, 16–ը՝ 2019–ին և 135–ը՝ 2014-2018 թթ–ին։

Օմբուդսմենի կողմից ֆեմիցիդի մասին նախապատրաստած վերջին հաշվետվությունը հրապարակվել է 2020 թ–ի հունիսի 30–ին։ Ըստ 2014-2018 թթ–ին կանանց սպանության մշտադիտարկման մասին հաշվետվության՝ Վրաստանում կանանց հաճախ սպանում են սեփական ամուսինները, զուգընկերները, նախկին ամուսինները/զուգընկերներն՝ անկախ այն բանից, թե արդյոք նրանք երբևէ միասին ապրել են, թե՝ ոչ։

Ըստ պաշտոնական տվյալների՝ առավել շատ կին՝ 35–ը, սպանվել է 2014 թ–ին։ Հետագա տարիներին այդ թիվը նվազել է, սակայն աճել է ֆեմիցիդի փորձերի քանակը։ 2014–2015 թթ–ին կանանց նկատմամբ 12 մահափորձ է իրականացվել, իսկ 2017 և 2018 թթ–ին՝ 18–ական։

Կնոջ նկատմամբ մահափորձի առիթ հաճախ դառնում է նրա կողմից գենդերային դերերի ոչ պատշաճ կատարումն ու դրա հետ կապված գործողությունները։ Օրինակ՝ մի դեպքում ամուսինը փորձել է իր կնոջը սպանել նրա համար, որ հաց թխելիս նա այրել է այն։

Մեկ այլ դեպքում պատճառը եղել է ամուսնու՝ որպես «ընտանիքի ղեկավարի» հրահանգներին չենթարկվելը։ Մասնավորապես, ամուսինը փորձել է այրել կնոջը՝ վրան բենզին լցնելով, քանի որ նա իրեն չի լսել և տուն է բերել օգտագործած հագուստ՝ վաճառելու նպատակով։

Ըստ վիճակագրության՝ սպանության առավել տարածված շարժառիթ է «վրեժը» կամ «խանդը»։

Վերլուծվող քրեական գործերի նյութերից պարզ է դառնում, որ հանցանքի վայրը հիմնականում տունն է լինում, իսկ զենքը՝ դանակը։

Հանցագործների մեծ մասը սթափ է եղել հանցագործությունը կատարելիս։ Նրանց մեծ մասը միջնակարգ կրթություն ունի և հանցագործության կատարման պահին գործազուրկ է եղել։

Ինչ վերաբերում է դատական որոշումներին՝ ապա կնոջ սպանության համար ամենախիստ պատիժը ցմահ ազատազրկումն է եղել, սակայն այն չեղարկվել է 2018 թ–ին։

Մցխեթայի շրջանային դատարանը 2017 թ–ին կնոջ սպանության համար ամենամեղմ պատիժն է սահմանել՝ մեկ տարվա ազատազրկում։

Ըստ հաղորդագրության՝ գենդերային հողի վրա կատարված հանցագործությունների շարժառիթը սովորաբար բացահայտվում է մեղադրյալների ցուցմունքներից։ Նրանցից ոմանք հանցանքը բացատրում են նրանով, որ կինը հրաժարվել է իրենց հետ ամուսնանալ, կամ նախկին կինը հրաժարվել է հաշտվել։

«Այդ սպանությունները տղամարդկանց կողմից կնոջ ազատ ընտրության համար յուրօրինակ պատիժ է։ Դեպքեր էլ կան, երբ նախկին ամուսինները «պատժել են» իրենց կանանց ուրիշ տղամարդու հետ հարաբերությունների համար», – ասված է հաշվետվությունում։