Կոբախիձե․«ՌԴ-ին թշնամի չենք հռչակում, քանի որ դրան պետք է հետևեն կոնկրետ քայլեր»
Վրաստանի վարչապետը Ռուսաստանի մասին
«Վրացական երազանք» կուսակցության ներկայացուցիչ, վարչապետ Իրակլի Կոբախիձեն լրագրողների հետ զրույցում հայտարարել է, որ Վրաստանի կառավարությունը հրապարակայնորեն Ռուսաստանին «թշնամի» չի անվանում, քանի որ դա քաղաքական հայտարարություն է, որին պետք է հաջորդեն համապատասխան քայլեր։
Լրագրողը Կոբախիձեին հարցրել է, թե արդյոք Վրաստանի կառավարությունը Ռուսաստանին թշնամի է համարում։ Վարչապետն արձագանքել է հետևյալ կերպ․
«Ձեր հարցերն ամոթալի են, ծիծաղելի տպավորություն եք թողնում։ Ես պարզ լեզվով կբացատրեմ, թե ինչու է այդ հարցն ամոթալի. դուք ուզում եք վերնագիր (նույնիսկ ռուսական լրատվամիջոցներում) այն մասին, որ ես Ռուսաստանի Դաշնությունը թշնամի եմ հռչակում։ Դա կոնկրետ քաղաքական հայտարարություն է, որին պետք է հաջորդեն կոնկրետ քայլեր՝ մոտավորապես կամ ճիշտ նույնը, ինչ ձեր կուսակցությունը [նկատի ունի Միացյալ ազգային շարժումը,- JAMnews] ձեռնարկել է 2008 թ․-ին և ավելի վաղ»։
Լրագրողը խնդրել է հստակեցնել՝ արդյո՞ք հենց դա է պատճառը, որ կառավարությունը խուսափում է բացահայտ կերպով Ռուսաստանին թշնամի անվանելուց։
«Իհարկե, պե՞տք է նորից կրկնեմ»,— պատասխանել է Կոբախիձեն։
Կոբախիձեն անդրադարձել է նաև Ռուսաստանի կողմից վրացական տարածքների օկուպացիայի թեմային, վերահաստատել, որ Ռուսաստանի Դաշնությունն օկուպացրել է Վրաստանի տարածքի 20%-ը։
«Իհարկե, Վրաստանի տարածքները օկուպացնող միակ պետությունն ու կողմը Ռուսաստանի Դաշնությունն է։ Դա բացարձակապես ակնհայտ փաստ է։ Այդ հարցի վերաբերյալ բազմաթիվ հայտարարություններ են արվել, և այդ փաստը կասկածից վեր է»,— ընդգծել է Կոբախիձեն։
Նրա խոսքով՝ Ռուսաստանի կողմից Վրաստանի տարածքի օկուպացիան «վրացական պետության և վրաց ժողովրդի դեմ ուղղված հանցագործություն է»։
«Դա աղաղակող հանցագործություն է. նախ օկուպացիա, ապա, այսպես կոչված, ճանաչում»,- հայտարարել է նա։
Հետևեք մեզ — Facebook | Youtube
Վրաստանի վարչապետը Ռուսաստանի մասին
