Հետազոտական ռեսուրսների կովկասյան կենտրոնը (CRRC-Վրաստան) հրապարակել է «Կովկասյան բարոմետր-2024» հետազոտությունը, որի համաձայն՝ հարցվածների 69 տոկոսը Ռուսաստանին համարում է Վրաստանի գլխավոր թշնամին։
Հետազոտության շրջանակներում հարցման է մասնակցել 1509 անձ: Դաշտային աշխատանքներն իրականացվել են 2024 թվականի ապրիլի 16-մայիսի 13-ը Վրաստանի ողջ տարածքում՝ բացառությամբ օկուպացված տարածքների։
«Կովկասյան բարոմետրն» ամենամյա հետազոտություն է, իրականացվում է դեռևս 2008 թվականից: Ընդգրկվում են սոցիալական, մշակութային, տնտեսական և քաղաքական բնույթի հարցեր։
Հարցվածների միայն չորս տոկոսն է որպես գլխավոր թշնամի նշել Ամերիկայի Միացյալ Նահանգները, երկու տոկոսը՝ Թուրքիան և մեկ տոկոսը՝ Հայաստանը:
CRRC
Ինչ վերաբերում է երկրի բարեկամին, ապա հարցվածների 24 տոկոսը Վրաստանի գլխավոր բարեկամ է համարում ԱՄՆ-ին։ Ադրբեջանն է մատնանշել բնակչության ութ տոկոսը, Ուկրաինան՝ յոթ տոկոսը, Թուրքիան և Գերմանիան՝ չորսական տոկոսը, Ռուսաստանը, Հայաստանը և Ֆրանսիան՝ երկուական տոկոսը, իսկ Չինաստանն ու Իսրայելը՝ մեկական տոկոսը։
Հարցվածների մեծ մասը՝ 26 տոկոսը, կարծում է, որ Վրաստանը չունի ոչ մի բարեկամ երկիր։