Սպանություն, դատ, նոր դատ. Աբխազիայում կրկին սկանդալ է աղմկոտ գործի շուրջ
Նոր սկանդալային շրջադարձ Աբխազիայի ամենաաղմկոտ հանցագործություններից մեկի շուրջ:
Ինքը 2012թ-ին կատարված հանցագործությունը բացառիկ ուշադրություն է գրավել. Աբխազիայի խորհրդարանի պատգամավոր Նոդիկ Կվիցինիան կազմակերպել է ռուս գործարար Սերգեյ Կլիմանտովիչի և նրա ընկերուհի Օքսանա Սկարեդնովայի սպանությունը:
2016թ-ի հոկտեմբերի 28-ին այդ գործի 5 մասնակից դատապարտվել է 13-20 տարվա ազատազրկման:
Եվ ահա իրադարձությունների նոր զարգացում. Գերագույն դատարանի վերաքննիչ կոլեգիան դատավորներ Թեմուր Տարբայի, Օքսանա Պիլիայի և Հենրի Գամիսոնիայի նախագահությամբ չեղարկել է այդ որոշումն ու վճռել այդ քրեական գործը նոր դատաքննության ուղարկել:
Հասարակության արձագանքը կայծակնային էր և ցասումնալից:
Այն, որ դատարանը նման որոշում է կայացրել, առաջինը սոցցանցերից մեկի իր էջում հայտնել է նախկին գլխավոր դատախազ Ալեքսեյ Լոմիան: Նրա գրառումն այդ թեմայով ծայրահեղ հուզական էր:
Այդ գործով նոր որոշման ողջ համատեքստը դետեկտիվի է նման: Այն մասին, որ պաշտպանության վերաքննիչ բողոքի դիտարկման վերաբերյալ նիստ է նշանակվել, լրագրողներից և խմբագիրներից ոչ ոք տեղեկացված չէր: Ավելին՝ բոլոր դատական գործընթացներն Աբխազիայում երկարատև և ուժեղ ձյան պատճառով հետաձգվել են:
Կլիմանտովիչի և նրա ընկերուհու սպանության գործով հանկարծակի կանչված վերաքննիչ կոլեգիան իսկական անակնկալ էր: Միայն վերջին պահին էր հրավիրվել պետական հեռուստաընկերության նկարահանող խումբը, որի ներկայությամբ էլ բարձրաձայնվել է արդեն ընդունված որոշումը:
Այն բանից հետո, երբ կհրապարակվի կոլեգիայի որոշման ամբողջական տեքստը, մեղադրող կողմը 10 օր ժամկետում իրավունք կունենա բողոքարկել վճիռը: Այն դեպքում, եթե բողոքարկում տեղի ունենա, այն կքննի Գերագույն դատարանի պրեզիդիումը:
Հասարակությունը զայրացած է
Սոցցանցերում դատական վճռի և այդպիսի որոշում կայացրած դատավորների քննարկումն, ավելի ճիշտ՝ քննադատումը մի քանի օրով ամբողջությամբ մթագնեց ամենատարծված թեմայի՝ մարտին կայանալիք խորհրդարանական ընրությունների քննարկումը:
«Ամոթ» բառը մեկնաբանությունների մեծ մասի տոնը բնութագրող բառը դարձավ:
Նախկին դատախազ Ալեքսեյ Լոմիայի գրառման տակ գրառում է կատարել նաև Կլեմանտովիչի այրին՝ Նատալյան.
Վճիռը չեղարկած դատավոր Թեմուր Տարբան սոցցանցերի ակտիվ օգտատեր է: Նա պարբերաբար կիսվում է իր բանաստեղծություններով, և դրանք բավականին հայտնի են: Դատարանի որոշման հետ կապված բողոքի տարափից հետո Տարբան մեկնաբանություն է թողել այն մասին, որ, չնայած դատավճռի չեղարկմանը, մեղադրյալները շարունակելու են կալանքի տակ մնալ:
Ռուս գործարար Սերգեյ Կլեմանտովիչը գլխավորել է «Էլ Պետրոլեում — Աբխազիա» ընկերությունը, որը զբաղվում է մետաղի թափոնի մթերմամբ և վերամշակմամբ, ինչպես նաև մանրաքարի մթերմամբ: 2012թ-ի սեպտեմբերի սկզբին Կլեմանտովիչն ու նրա ընկերուհի Օքսանա Սկարեդնովան Աբխազիայի տարածք մուտք գործելուց հետո անսպասելիորեն անհետացել են: Գրեթե մեկ տարի անց՝ 2013թ-ի հոկտեմբերին նրանց մարմինները հայտնաբերվել են Օչամչիրի շրջանի Աձյուբվա գյուղի լքված ջրհորում:
Գլխավոր դատախազությունը սպանություն կատարելու մեղադրանք է առաջադրել 5 անձանց՝ խորհրդարանի գործող պատգամավոր Նոդիկ Կվիցինիային և նրա 4 հանցակիցներին՝ Ռամին Խմայիլին, Ախրե Գոպիային, Ջումբերու Բիգվավային և Ասլան Ցվիժբային:
Սպանության կազմակերպիչն այն ժամանակ Կվիցինիան է նշվել: Նա գործնական հարաբերություններ ուներ Կլեմանտովիչի հետ: Մասնավորապես, ռուսաստանցին պատգամավորից մի քանի հեկտար ափամերձ հող էր գնել, որի դիմաց, Կվիցինիայի խոսքով, նա ամբողջությամբ չէր վճարել: Առաջին ատյանի դատարանը եզրակացության էր եկել, որ գործի մյուս 4 մասնակիցներին Կվիցինիան է վարձել: Նրանք առևանգել են գործարարին և նրա ուղեկցին, իսկ մի քանի օր անց՝ սպանել և մարմինները գցել ջրհորը:
Ինքը պատգամավորը, որին առաջին ատյանի դատարանը 16 տարվա ազատազրկման է դատապարտել, տվյալ պահին փախուստի մեջ է: Ըստ որոշ տվյալների՝ Կվիցինիան թաքնվում է Վրաստանի տարածքում: Քննության և դատաքննության ընթացքում նա կալանքի տակ չի առնվել, քանի որ խորհրդարանը, թեև զրկել է նրան անձեռնմխելիությունից, թույլ չի տվել կալանքի տակ առնել:
2016թ-ի հոկտեմբերի 28-ին, երբ այդ գործով վճիռն էր կայացվում, Նոդիկ Կվիցինիան չներկայացավ դատական նիստին: Նրա փաստաբանը տեղեկանք էր ներկայացրել, թե Կվիցինիան հոսպիտալացվել է: Սակայն հետագայում պարզվել էր, որ, իմանալով վճռի բովանդակությունը, նա պարզապես փախուստի էր դիմել:
