«Բաքվի սադրանքները միտված են Արցախի ժողովրդի մեկուսացմանը»․ գնահատականներ
Սադրանք Հակարիի կամրջի ուղղությամբ
«Քարոզչական նպատակներով Ադրբեջանը որոշ անցանելիություն էր ապահովում Լաչինի միջանցքով՝ Կարմիր խաչի ու ռուս խաղաղապահների միջոցով, երեկվանից այն զրոյացվել է»,- կառավարության նիստում հայտարարել է Հայաստանի վարչապետը։
Նախօրեին հայտնի դարձավ, որ Ադրբեջանն արգելել է Լաչինի միջանցքով դեպի Լեռնային Ղարաբաղ մարդկանց տեղաշարժը, ինչպես նաև հումանիտար բեռների մուտքը։ Այս որոշումը հաջորդել էր Հակարիի կամրջի մոտ տեղի ունեցած սադրանքին, որի հետևանքով հայ սահմանապահ էր վիրավորվել։
Հայաստանի ազգային անվտանգության ծառայությունից հայտնել էին, որ հունիսի 15-ին ադրբեջանցի մի խումբ զինծառայողներ առաջխաղացման փորձ էին կատարել՝ նպատակ ունենալով Հայաստանի տարածքում տեղադրել ադրբեջանական դրոշ։ Փորձը կանխվել է հայ սահմանպահների պատասխան գործողությունների արդյունքում: Սակայն համացանցում տարածվել է տեսանյութ, որում երևում է՝ ինչպես են ադրբեջանցիները ռուս խաղաղապահների հրամանատարի ներկայությամբ մոտենում և տեղադրում իրենց դրոշը։
«Այդ կամուրջը կառուցվել է Ադրբեջանի կողմից՝ կարճ ժամակահատվածում, և պնդումները, թե դրոշը բարձրացվել է Հայաստանի տարածքում, անհիմն են», — այսօր հայտարարել է Ադրբեջանի ԱԳՆ պաշտոնական ներկայացուցիչ Այխան Հաջիզադեն։
Ինչպես են Երևանում և Ստեփանակերտում գնահատում Հաքարիի կամրջի վրա Ադրբեջանի դրոշի տեղադրումը և Լաչինի միջանցքով տեղաշարժի արգելքը
Օրը կապ ունե՞ր․ դրոշի տեղադրման հնարավոր պատճառները
Հայաստանի պաշտպանության նախարար Սուրեն Պապիկյանը Ադրբեջանի հերթական ագրեսիան կապում է տվյալ օրվա հետ․ hունիսի 15-ին ՀՀ-ում նշվում է պետական խորհրդանիշների օրը։
«Իրենք փորձել են այս ձևով ևս մի անգամ ի ցույց դնել իրենց սադրիչ էությունը: Բայց ի պատիվ մեր սահմանապահների գործողությունների՝ նրանց նպատակը չի իրականացել»,- խորհրդարանական ամբիոնից հայտարարել է նա։
Նախկինում պաշտպանության նախարար, այժմ խորհրդարանի ընդդիմադիր «Հայաստան» խմբակցության ղեկավար Սեյրան Օհանյանը նշել է, որ Բաքուն, հերթական անգամ, ցույց տվեց՝ «բանակցություններով որևէ պայմանավորվածության չեն գնալու և շարունակելու են ճնշումները Հայաստանի ու Արցախի վրա»․
«Ադրբեջանը Հակարիի կամրջում իրականացրած գործողությամբ շարունակում է խորացնել Արցախի շրջափակումը՝ փորձելով Հայաստանի բոլոր հատվածներում ինքնուրույն սահմանագծում կամ սահմանազատում իրականացնել»։
«Դատապարտելի է և անընդունելի»
Խորհրդարանական ընդդիմադիր «Հայաստան» խմբակցության պատգամավորներն այսպես են բնորոշել ռուս խաղաղապահների ներկայությամբ ՀՀ տարածքում Ադրբեջանի դրոշի տեղադրումը։ Միաժամանակ, խուսափել են գնահատականներ հնչեցնել խաղաղապահների գործողությունների վերաբերյալ։
«Այս բոլոր հարցերի պատասխանները պետք է փնտրենք այն հիմնական օրակարգի մեջ, որը առաջ է մղում ՀՀ գործող իշխանությունը»,- հայտարարել է Արծվիկ Մինասյանը։
Իշխող խմբակցության քարտուղարը տեղի ունեցածը «մեծ ծավալի խնդիր» է համարել, բայց նաև հավելել՝ ռուս գործընկերների հետ կապի մեջ է արտաքին գերատեսչությունը։
«Բնականաբար, խոսակցություն մեր ռուս գործընկերների հետ տեղի ունենում է, թե ինչ կոնտեքստում, ինչ արդյունքներով, սրա մասին կխոսի ԱԳՆ-ն»,- նկատել է Արթուր Հովհաննիսյանը։
Ադրբեջանն արգելել է բոլոր տեսակի փոխադրումները
Խոսքն ինչպես ուղևորափոխադրումների, այնպես էլ հումանիտար բեռների տեղափոխման արգելքի մասին է։
Արցախի տեղեկատվական շտաբի փոխանցմամբ՝
- չեղարկվել է Ստեփանակերտ-Գորիս-Ստեփանակերտ երթուղով տասնյակ անձանց ուղևորափոխադրումը հումանիտար հրատապ կարիքներից ելնելով, այն պետք է տեղի ունենար ռուս խաղաղապահների կողմից:
- կասեցվել է հումանիտար բեռնափոխադրման նպատակով Գորիս մեկնող ռուս խաղաղապահների բեռնատարների շարժը:
Շեշտվում է, որ Կարմիր խաչի միջազգային կոմիտեի միջնորդությամբ Արցախից Հայաստան տեղափոխվող 25 բուժառուներին և նրանց հարազատներին ադրբեջանական անցակետում ստիպել են վերադառնալ Ստեփանակերտ։
Մարդու իրավունքների պաշտպանի գրասենյակը հիշեցրել է՝ մարդասիրական փոխադրումներն իրականացվում էին բացառապես Կարմիր խաչի և ռուս խաղաղապահների միջոցով․
«Ադրբեջանն այս առանց այն էլ սահմանափակ հնարավորությունների խոչընդոտումն օգտագործում է որպես Արցախի խաղաղ բնակչության ահաբեկման, վախի տարածման, հոգեբանական ճնշման և Արցախում անտանելի կենսապայմաններ ստեղծելու լծակ»։
«Էթնիկ զտման գործողությունների մեկնարկ է»
Նման գնահատական է հնչեցրել Հայաստանի վարչապետ Նիկոլ Փաշինյանը՝ ասելով, որ հայկական կողմի մտավախությունը հիմնավորվում է։
«Էլ ինչպե՞ս է լինում էթնիկ զտումը։ Արգելակվում է Լեռնային Ղարաբաղի հայերի սննդի, գազի, էլեկտրական էներգիայի մատակարարումը, գյուղատնտեսական աշխատանքների իրականացնող քաղաքացիները թիրախավորվում են կրակահերթերով, արգելակված է տեղաշարժի հնարավորությունը նույնիսկ ծայրահեղ ծանր վիճակում գտնվող հիվանդների համար»,- ընդգծել է նա։
Լեռնային Ղարաբաղի հայության իրավունքների և անվտանգության ապահովման համար հերթական անգամ կարևորել է միջազգային մեխանիզմների շրջանակներում Բաքու-Ստեփանակերտ երկխոսությունը։
«Պետք է հուսալ, որ այս ուղղությամբ կոնկրետ քայլեր կձեռնարկվեն»,- նկատել է նա։
«Պետք է տրվի համարժեք քաղաքական գնահատական»․ Արցախի ԱԳՆ
Արցախի ԱԳՆ-ն արձանագրել է՝ Ադրբեջանը կոպտորեն խախտում է իր միջազգային պարտավորությունները, անտեսում միջազգային իրավունքի հիմնարար նորմերը, այդ թվում՝ ՄԱԿ-ի միջազգային դատարանի իրավաբանորեն պարտադիր որոշումը․
«Փաստորեն, Լաչինի միջանցքում ապօրինաբար տեղադրված հսկիչ անցակետն Ադրբեջանի կողմից օգտագործվում է բացառապես որպես Արցախի ժողովրդի դեմ էթնիկ զտման քաղաքականության շարունակման գործիք»։
Գերատեսչության համոզմամբ՝ ադրբեջանական նոր սադրանքները միտված են շրջափակման խստացմանն ու արտաքին աշխարհից Արցախի ժողովրդի մեկուսացմանը։ Ըստ կառույցի՝ ամենաթողության և միջազգային հանրության կողմից վճռական միջոցների բացակայության պայմաններում «Ադրբեջանի գործողություններն առավել սպառնալից բնույթ են ստանում»։
«Արցախի ժողովրդի դեմ նոր վայրագություններից և հանցագործություններից խուսափելու համար Ադրբեջանի նմանօրինակ ապօրինի և ագրեսիվ քայլերը պետք է արժանանան միջազգային հանրության և առաջին հերթին՝ գործընթացում ներգրավված բոլոր կողմերի համարժեք քաղաքական գնահատականին»,- ասված է հաղորդագրությունում։
Հետևեք մեզ — Facebook | Youtube | Telegram
Սադրանք Հակարիի կամրջի ուղղությամբ
