«Զվարթնոց»-ից հեռացած ռուս սահմանապահները չեն լքել Հայաստանը
Ռուս սահմանապահները չեն լքել Հայաստանը
Երևանի «Զվարթնոց» օդանավակայանից հեռանալուց հետո ռուս սահմանապահներն իրենց ծառայությունը շարունակում են Հայաստան—Թուրքիա և Հայաստան-Իրան սահմաններին։ Այդ մասին «Ազատություն» ռադիոկայանին հայտնել են Ազգային անվտանգության ծառայությունից (ԱԱԾ)։
Նշել են, որ Ռուսաստանի Անվտանգության դաշնային ծառայության սահմանապահ վարչության զինածառայողները հայ-թուրքական և հայ-իրանական սահմանի տեղամասերում ծառայություն են իրականացնում համաձայն 1992 թ․-ին երկու երկրների միջև կնքված պայմանագրի («ՀՀ տարածքում գտնվող ՌԴ սահմանապահ զորքերի կարգավիճակի ու նրանց գործունեության պայմանների մասին» պայմանագիր):
ԱԱԾ-ն, սակայն, չի պատասխանել այն հարցին, թե քանի ռուս սահմանապահ է դուրս եկել օդանավակայանից։ Կառույցից հայտնել են, որ պահանջվող տեղեկատվությունը հանդիսանում է պետական գաղտնիք։ Օրեր առաջ ԱՄՆ պետքարտուղարի Եվրոպայի ու Եվրասիայի հարցերով օգնական Ջեյմս Օ՛Բրայենը հայտարարել էր, թե մի քանի հազար ռուս զինվորական է հեռանում։
Ռուսները «Զվարթնոց»-ից դուրս բերվեցին Փաշինյան-Պուտին հանդիպման արդյունքում
Օդանավակայանից ռուս սահմանապահների դուրսբերումն այս տարվա մայիսին կայացած երկկողմ հանդիպման ընթացքում համաձայնեցրել էին Հայաստանի վարչապետ Նիկոլ Փաշինյանն ու Ռուսաստանի նախագահ Վլադիմիր Պուտինը։
Հանդիպումից հետո Կրեմլի խոսնակ Դմիտրի Պեսկովը հայտնել էր, որ ռուս սահմանապահները դուրս կգան ինչպես «Զվարթնոց»-ից, այնպես էլ Հայաստանի Տավուշի, Սյունիքի, Վայոց ձորի, Գեղարքունիքի և Արարատի մարզերից, որտեղ տեղակայվել էին դեռևս 2020 թվականի 44-օրյա պատերազմից հետո հայկական կողմի խնդրանքով։
«Փաշինյանն ասել է, որ իրավիճակի փոփոխության հետևանքով նման անհրաժեշտություն այլևս չկա, այդ իսկ պատճառով նախագահ Պուտինը համաձայնել է։ Եվ մեր զինվորականների ու սահմանապահների դուրսբերումը համաձայնեցվել է։ Ու կրկին Հայաստանի իշխանությունների խնդրանքով՝ ռուս սահմանապահները կմնան հայ-թուրքական և հայ-իրանական սահմանին»,- հայտարարել էր Պեսկովը։
Օգոստոսի 1-ից «Զվարթնոց»-ում հայ սահմանապահներ են
Ծառայություն են իրականացնում ԱԱԾ սահմանապահ զորքերի զինծառայողները։ Ավելի վաղ Հայաստանի վարչապետ Նիկոլ Փաշինյանը համոզմունք էր հայտնել, որ Հայաստանի սահմանապահ ծառայությունն ունի «բավարար փորձ և հմտություն» սահմանի հսկողությունն ինքնուրույն իրականացնելու համար։
Հուլիսի 31-ին Ռուսաստանի Անվտանգության դաշնային ծառայության ներկայացուցիչները հայկական կողմին էին փոխանցել պետական սահմանի պաշտպանության գործառույթները։ Հայաստանի ԱԱԾ սահմանապահ զորքերի հրամանատար Էդգար Հունանյանը և Հայաստանում ՌԴ ԱԴԾ Սահմանապահ վարչության պետ, գեներալ-լեյտենանտ Ռոման Գոլուբիցկինն այդ մասին արձանագրություն էին ստորագրել։
Քաղաքագետները կարծում էին՝ ռուս սահմանապահները կլքեն ՀՀ տարածքը
Նախքան ԱԱԾ կողմից տեղեկության հրապարակումը քաղաքագետ Արեգ Քոչինյանն անդրադարձել էր այն հարցին, թե արդյոք ռուսները կլքեն Հայաստանի տարածքը։ Չէր բացառել, որ Ռուսաստանն այդ անձնակազմը կտեղափոխի ուկրաինական ճակատ։
«ՌԴ-ն այս պահի դրությամբ իրականում կարիք ունի այդ անձնակազմն այլ տեղ հասցնելու և այլ տեղ օգտագործելու։ Նկատի ունեմ՝ Ուկրաինան»,- նշել էր նա։
Քաղաքագետը դրական էր գնահատել «Զվարթնոց» օդանավակայանից ռուս սահմանապահների դուրսբերումը՝ այն համարելով ՀՀ ինքնիշխանությունն ամրապնդող քայլ․
«Նախկինում ՀՀ գլխավոր անցակետում՝ «Զվարթնոց»-ում, տեղի էր ունենում համատեղ ծառայություն, ռուսական կողմն ուներ հասանելիություն Հայաստանի ելումուտին։ Դա խնդրահարույց էր ինչպես ՀՀ ինքնիշխան պետականության ձևավորման, այնպես էլ արևմտյան գործընկերների հետ հարաբերությունների խորացման ճանապարհին»,- ասել էր նա։
Քոչինյանը նաև շեշտել էր՝ գործընթացը պետք է լինի շարունակական, հաջորդ քայլով ռուսները պետք է դուրս բերվեն հայ-իրանական անցակետից։
Հետևեք մեզ — Facebook | Youtube | Telegram
Ռուս սահմանապահները չեն լքել Հայաստանը
