Ռուսաստան. լրագրողների և ակտիվիստների ձերբակալություններ, բազմամարդ բողոքի ակցիա մարզպետի ձերբակալության դեմ
Ռուսական Խաբարովսկ քաղաքում աննախադեպ զանգվածային բողոքներ են ընտրված մարզպետի ձերբակալության դեմ: Այդ ձերբակալությունը ողջ երկրում ձերբակալությունների և բռնաճնշումների քարոզարշավի մի մասն էր սահմանադրական փոփոխությունների քվեարկությունից հետո, որը նախագահ Վլադիմիր Պուտինին թույլ է տալիս երկարաձգել իր պաշտոնավարումը:
35 հազար մարդ է մասնակցել չարտոնված բողոքի ցույցին ռուսական Խաբարովսկ քաղաքում (բնակչությունը 200 հազար մարդ), որը գտնվում է Չինաստանի հետ սահմանին:
Բողոքի ակցիայի պատճառը Խաբարովսկի երկրամասի ընտրված նահանգապետ Սերգեյ Ֆուրգալի ձերբակալությունն էր: Նա կասկածվում է պատվիրված սպանությունների մեջ, որոնք տեղի են ունեցել 2004-2005 թվականներին:
Ֆուրգալը տեղափոխվել է Մոսկվա և կալանավորվել երկու ամսով: Նա մեղքը չի ընդունում:
Դրանից երկու օր անց բազմահազարանոց ամբոխը դուրս եկավ Խաբարովսկի կենտրոնական հրապարակ և շրջափակեց մարզի ադմինիստրացիան: Այնուհետև ցուցարարները քայլերթով շարժվել են կենտրոնական փողոցներով:
- Ռուսաստան․ լրագրողը մեղավոր է ճանաչվել ահաբեկչության արդարացման համար
- Աբխազիան, Հարավային Օսիան, Մերձդնեստրն ու Դոնբասը պատրաստում են Ռուսաստանի բռնակցմա՞նը
- Այժմ Պուտինը Ռուսաստանում հավերժ է, իսկ ռուսները՝ դաշնության գլխավոր ժողովուրդը։ Սահմանադրությունը փոփոխված է
Ակցիայի մասնակիցները վանկարկել են՝ «Ֆուրգալը մեր ընտրությունն է», «Պուտինը գող է», «Ազատություն», «Կայրենք Մոսկվան, կփրկենք Ռուսաստանը»:
35 հազարանոց ցույցը Խաբարովսկում խոշորագույն չարտոնված բողոքի ակցիա է Ռուսաստանի Դաշնության պառտմության մեջ:
Ավելի շատ լուսանկարներ և տեսանյութ՝ տեղական կայքից:
Լրագրողների, ակտիվիստների և պատգամավորների խուզարկություններ և ձերբակալություններ
Սահմանադրական փոփոխությունների քվեարկությանը հաջորդող շաբաթվա ընթացքում իշխանություններն անցան գրոհի հասարակության դեմ։
Ամեաաղմկոտ իրադարձությունը լրագրող Իվան Սաֆրոնովի ձերբակալությունն էր: Նրան մեղադրում են պետական դավաճանության մեջ: Այդ հոդվածով պատժի առավելագույն ժամկետը 15 տարի է:
Իվան Սաֆրոնովը տասը տարի աշխատել է ռուսական մեդիայում՝ «Կոմերսանտ» և «Վեդոմոստի» թերթերում: Գրել է բանակի և ռազմարդյունաբերական համակարգի խնդիրների մասին:
Երկու ամիս առաջ Իվան Սաֆրոնովը դարձավ պետական «Ռոսկոսմոս» կորպորացիայի աշխատակից:
Ինչում են նրան մեղադրում՝ անհայտ է, այդ տեղեկությունները գաղտնի են պահվում: Սաֆրոնովը «Ռոսկոսմոսում» պետական գաղտնիքներին հասանելիություն չի ունեցել:
Իվան Սաֆրոնովի ձերբակալության կապակցությամբ լրատվամիջոցները հիշեցրին նրա ընտանիքի պատմությունը: Նրա հայրը՝ Իվան Սաֆրոնով ավագը, նույնպես լրագրող էր և նույնպես գրում էր բանակի թեմաներով: Նա մահացել է խորհրդավոր և դեռևս չպարզված հանգամանքներում՝ ռուսական բանակում կոռուպցիայի վերաբերյալ հոդվածի հրապարակումից մեկ օր առաջ: Հոդվածն այդպես էլ չի հրապարակվել:
Մոսկվայում խուզարկել են ՄԲԽ-Մեդիա անկախ հրատարակչություն գլխավոր խմբագրին և խմբագրության տարածքները:
Գլխավոր խմբագիր Սերգեյ Պրոստակովը հարցաքննվել է որպես վկա այսպես կոչված «Յուկոս»-ի գործով:
«Յուկոսը» ընկերություն է, որը պատկանում էր ռուսաստանցի գործարար Միխայիլ Խոդորկովսկուն: Վլադիմիր Պուտինի նկատմամբ իր քննադատական դիրքորոշման պատճառով նա 10 տարի անցկացրեց բանտում, նրա ընկերությունը առգրավվեց:
Վերջերս Հաագայի դատարանը «Յուկոս»-ի բաժնետերերին 50 միլիարդ դոլար փոխհատուցում էր շնորհել:
Միխայիլ Խոդորկովսկին, որը հիմա ապրում է Լոնդոնում, ՄԲԽ-Մեդիա-ի հիմնադիրն ու սեփականատերն է:
Մոսկվայում խուզարկություններ են անցկացվել նաև քաղաքային պատգամավորներ Յուլյա Գալյամինայի և Կոնստանտին Յանկաուսկասի բնակարաններում:
Նրանք երկուսն էլ դիմում են ներկայացրել Մոսկվայում հուլիսի 15-ին սահմանադրական փոփոխությունների դեմ հավաք անցկացնելու համար:
Գալյամինայից և Յանկաուսկասից սարքավորումներ ու հեռախոսներ են առգրավել:
Վեց ժամ շարունակ խուզարկել են «Մեդիազոնա» անկախ լրատվամիջոցի հրատարակիչ Պյոտր Վերզիլովին:
Ըստ չհաստատված տեղեկությունների՝ Վերզիլովի նկատմամբ հակակրանք ունի անձամբ նախագահ Պուտինը: Պատճառը «Ոստիկանը մտնում է խաղի մեջ» ակցիան է. Մոսկվայում ֆուտբոլի Աշխարհի առաջնության եզրափակիչ խաղի ժամանակ Վերզիլովը և ոստիկանի տեսքով մեկ այլ տղամարդ վազեցին դաշտ և ընդհատեցին խաղը: Սա դժգոհություն է առաջացրել հանդիպմանը ներկա Պուտինի մոտ:
Գրոհի պատճառները և հասարակության արձագանքը
Անկախ ռուս լրագրողներն ու փորձագետները Ռուսաստանում բռնաճնշումների նոր ալիքի հիմնական պատճառը միաձայն համարում են երկրի սահմանադրության փոփոխությունների վերաբերյալ քվեարկության արդյունքները:
Չնայած այն բանին, որ քվեարկությունն անցկացվել է բոլոր նորմերի խախտումներով՝ 200-ից ավելի փոփոխությունների փաթեթի համար, առանց դիտորդների, այնպիսի վայրերում, ինչպիսիք են շենքերի մուտքերն ու ավտոբուսները, այն, ըստ էության, ձախողվել է:
Պուտինի մամլո խոսնակ Դմիտրի Պեսկովը քվեարկության արդյունքները անվանել է «փառահեղ հաղթանակ»:
Այնուամենայնիվ, ընտրական իրավունքի հայտնի մասնագետ Գրիգորի Շպիլկինը մաթեմատիկական մեթոդներով ապացուցել է, որ այս քվեարկությանը քսանյոթ միլիոն կեղծ քվեաթերթիկ են ավելացրել:
Մոսկվայում Իվան Սաֆրոնովի ձերբակալությունից հետո Անվտանգության դաշնային ծառայության շենքի մոտ սկսվեցին միայնակ պիկետներ: Դրա մասնակիցներին ձերբակալում են, բայց ցուցարարների թիվը չի նվազում:
Իշխանությունները արգելել են բողոքի ցույց անցկացնել Մոսկվայում հուլիսի 15-ին, բայց դրա կազմակերպիչները չեն պատրաստվում հրաժարվել իրենց մտադրությունից:
Մեկնաբանություններ. ինչ է ուզում իշխանությունը
Republic անկախ լրատվականը այսպես է բնութագրել Ռուսաստանում տեղի ունեցող իրադարձությունները.
«Մի շարք աղմկոտ ձերբակալություններ և մեղադրանքներ են սկսվել երկրում սահմանադրական փոփոխությունների քվեարկությունից բառացիորեն անմիջապես հետո: Մենք ենթադրում էինք, որ այդպես կլինի, բայց չգիտեինք, որ այդքան արագ դա տեղի կունենա:
Պետությունը մարդկանց երեսին է շպրտում՝ տեսեք, թե դուք ինչի եք բերել երկիրը: Ձեր ընդդիմադիրները երկքաղաքացիություն ունեցող դավաճաններ են: Ձեր անկախ լրագրողները, իրենց ամբողջ հեղինակությամբ, ՆԱՏՕ-ի լրտեսներ են: Ձեր մարզպետները, նրանք, ում դուք ինքներդ եք խորհրդանիշ ընտրել, ղեկավարության կամքին հակառակ գնացող ավազակներ են:
Մթությունը վրա է հասել, և այս ամենից հետո դուք դեռ կվիճե՞ք, թե Ռուսաստանին ինքնակալություն է պետք: Կպնդե՞ք, թե մեզ պետք են ազատ ընտրություններ և անկախ լրագրություն»:
