Ջրհեղեղ Հայաստանի հյուսիսում՝ կա երկու զոհ, 190 մարդ տարհանվել է
Ջրհեղեղ Լոռու և Տավուշի մարզերում
Առաջին ահազանգերն այն մասին, որ Դեբեդ գետի վարարման հետևանքով արտակարգ իրավիճակ է ստեղծել Լոռու և Տավուշի բնակավայրերում, ՀՀ ՆԳՆ Ճգնաժամային կառավարման ազգային կենտրոնը ստացել է մայիսի 26-ի գիշերը՝ ժամը 00:40-ին։
Մ6 ավտոճանապարհի Վանաձոր-Ալավերդի հատվածի 31-րդ կմ-ը հեղեղվել է և մոտ 50 մ երկարությամբ հատվածը փլուզվել։ Սա Հայաստանը Վրաստանին կապող մայրուղու մի մասն է։
Այրում կայարանում ջրալցվել են մի շարք տներ։ Շնող գյուղից դեպի Թեղուտ հատվածում ավտոմեքենան է ընկել է գետը։ Նախնական տվյալներով կա երկու զոհ։
Այրում-Ալավերդի ավտոճանապարհին արգելափակվել է մեկ բեռնատար։ Այն ամբողջությամբ ջրի մեջ է, խցիկի վրա երկու քաղաքացի է պատսպարվել։ Ալավերդի քաղաքում կան ջրալցված տներ և անասնագոմեր:
Նախնական տվյալներով մեկ տարեց քաղաքացի ընկել է գետը, նրան շարունակում են որոնել։
Հայաստանի ջրհեղեղից տուժած երկու մարզերում էլ՝ Լոռիում և Տավուշում, իրականացվում են փրկարարական աշխատանքներ։
Հաղորդվում է, որ ափերից դուրս եկած Դեբեդ գետը հեղեղել է նաև Վրաստանի Քվեմո Քարթլի շրջանի մի շարք բնակավայրեր։
Ինչ է հայտնի Լոռիում և Տավուշում իրավիճակի մասին
Ալավերդի համայնքի Քարկոփ բնակավայրի ճանապարհին՝ Դեբեդ գետի վրա գտնվող կամուրջը քանդվել է։ Բնակավայրը ջրածածկված է։ Ջրի տակ է անցել Ախթալա գյուղ տանող ճանապարհի կամուրջը։
Այս բնակավայրերում մարդիկ նաև կապի խնդիր ունեն։ Հեռախոսային կապն անջատված է, ինչպես և ինտերնետը։
![Ջրհեղեղ Հայաստանի հյուսիսում՝ Լոռու և Տավուշի մարզերում Փրկարարները բնակիչներին տարհանում են ռետինե նավակներով
26.05.2024](https://jam-news.net/app/uploads/2024/05/Aleaverdi-1024x575.jpg)
Շատերը պարզապես չեն կարողանում լքել իրենց տները։ Սանահին կայարանում որոշ տներ ջրի տակ են մինչև երկրորդ հարկ։
![Մարդկանց դուրս են բերում հեղեղված տներից
26.05.2024](https://jam-news.net/app/uploads/2024/05/Alaverdi_help_people-1024x577.jpg)
Որոշ բնակավայրերում ջրի տակից երևում են միայն առանձնատների տանիքները։ Ալավերդի քաղաքի Թումանյան գլխավոր փողոցի մի մասը ջրի տակ է, տների շուրջ պատնեշները չեն երևում։
Ալավերդիում ջուրը հեղեղել է նաև տեղի արվեստի պատկերասրահը, ոսկերչական խանութը, Էկոնոմբանկի տեղական մասնաճյուղը, լվացվել է «Կատա» սուպերմարկետում եղած ամեն ինչ։
![Ջրի մակարդակը Դեբեդում
26.05.2024](https://jam-news.net/app/uploads/2024/05/Alaverdi_bridge-1024x577.jpg)
Ըստ ՆԳՆ-ի՝ ժամը 15:30-ի դրությամբ Լոռու և Տավուշի մարզերի տարբեր բնակավայրերից տարհանվել է 190 մարդ, փրկարարները գետից դուրս են բերել 73 բնակչի։
Առավոտյան դեպքի վայր է մեկնել նաև ՀՀ վարչապետ Նիկոլ Փաշինյանը։
![Վարչապետը քննարկել է իրավիճակը և զրուցել բնակիչների հետ
26.05.2024](https://jam-news.net/app/uploads/2024/05/Alaverdi_Pashinyan-1024x683.jpg)
Ինչպես հայտնում են տեղի լրագրողներւ՝ նման մի աղետ եղել է 1970 թվականի օգոստոսի 14- գիշերը։ Այն ևս դարձել է մարդկանց մահվան պատճառ: Ըստ ալավերդցիների՝ մեկ տասնյակից ավելի, ըստ պաշտոնական տեղեկատվության՝ երեք մարդու։
Գետը հեղեղել է նաև հարևան վրացական գյուղերը
Հայկական լրատվամիջոցները հայտնում են, որ ափերից դուրս եկած Դեբեդ գետը հեղեղել է նաև հարևանությամբ գտնվող վրացական բնակավայրերը։ Խոսքը Քվեմո Քարթլի շրջանի մասին է։
Ջրհեղեղի հետևանքով ավելի քան 15 գյուղ կտրվել է արտաքին աշխարհից։ Շրջանի ղեկավարը լրագրողներին հայտնել է, որ գիշերը կանխարգելիչ նպատակով որոշ բնակավայրերի բնակչություն տարհանվել է։ Մասնավորապես՝ տուժել են Մառնեուլին, Տետրիսկարոն, Բոլնիսին և Դմանիսին, կամուրջներ են քանդվել։ Տեղում աշխատում են փրկարար ծառայությունները։
![Իրավիճակը Վրաստանի Քվեմո Քարթլիի շրջանում
26.05.2024](https://jam-news.net/app/uploads/2024/05/Marneuli-1024x575.jpg)
Հետևեք մեզ — Facebook | Youtube | Telegram
Ջրհեղեղ Լոռու և Տավուշի մարզերում