5000 հայտ․ Հայաստանի ուսուցիչները դիմում են կամավոր ատեստավորման
Ուսուցիչների կամավոր ատեստավորում Հայաստանում
Հայաստանի շուրջ 5000 ուսուցիչներ են այս տարի հայտ ներկայացրել կամավոր ատեստավորում անցնելու համար։ Չնայած ակտիվ մասնակցությանը՝ ոլորտի մասնագետները ցուցանիշները գոհացուցիչ չեն համարում:
«Հանրապետությունում առկա է 37 հազար ուսուցիչ, որից դեռ 13 տոկոսն է մասնակցել կամավոր ատեստավորմանը»,- նշում են երկրի կրթական գերատեսչությունից և հիշեցնում, որ մինչև հուլիսի 15-ը դեռևս հնարավոր է դիմել ատեստավորում անցնելու համար։ Բուն գործընթացը կկազմակերպվի սեպտեմբերին։
Ելնելով կրթության որակը բարձրացնելու նպատակից՝ Հայաստանի վարչապետը պարբերաբար հայտարարում է, որ «գալու է ժամանակը, երբ դպրոցներում ատեստավորում չանցած մանկավարժներ չեն լինելու»։ Փաշինյանը, սակայն, կոնկրետ ժամկետներ չի մատնանշում։
Չաշխատող անձինք ևս կարող են դիմել ատեստավորման
Կրթության, գիտության, մշակույթի և սպորտի փոխնախարար Արաքսիա Սվաջյանը մամուլի ասուլիսի ժամանակ հիշեցրել է՝ այս տարի կամավոր ատեստավորմանը մասնակցելու հնարավորություն է տրված բոլոր առարկաները դասավանդող ուսուցիչներին, այդ թվում՝ դասվարներին։
«Կարող են մասնակցել նաև որևէ տեղ չաշխատող, սակայն մանկավարժի կրթություն ունեցող անձինք։ Ատեստավորմամբ բարձր միավորներ ունենալու դեպքում կարող են բարձր աշխատավարձով աշխատանքի անցնել դպրոցներում»,- նկատել է նա։
5000 հայտատուներից շուրջ 320-ը ներկա պահին որպես ուսուցիչ չաշխատող անձինք են։
Հայաստանում առաջին անգամ ուսուցիչների կամավոր ատեստավորում է իրականացվել 2021 թ.-ին: Ատեստավորման փորձնական փուլում մասնակցելու հնարավորություն է տրվել 7-12-րդ դասարաններում դասավանդող ուսուցիչներին՝ միայն յոթ առարկաների գծով, այնուհետև շրջանակն ընդլայնվել է։ Ատեստավորմանը մասնակցած ուսուցիչների աշխատավարձը բարձրացվում է 30-50%-ով՝ կախված գրանցած արդյունքներից:
Ծրագրի նպատակն է խրախուսել ուսուցիչների մասնագիտական զարգացումը, նպաստել դասավանդման որակի և արդյունավետության բարձրացմանը, ինչպես նաև խթանել արական սեռի մանկավարժների մուտքը հանրակրթական ուսումնական հաստատություններ։
Երկրորդ շանս 1300-ից ավելի ուսուցիչների համար
Կառավարության որոշմամբ՝ միջին մասնագիտական կրթություն ունեցող ուսուցիչները կկարողանան դպրոցում աշխատել մինչև 2023 թ․-ի օգոստոս։ Խոսքը շուրջ 1300 անձի մասին է։ Սակայն այս ուսուցիչները չեն զրկվի աշխատանքից, եթե մասնակցեն կամավոր ատեստավորման։
«Անհրաժեշտ շեմն ապահովելու դեպքում կարող են շարունակել իրենց գործունեությունը դպրոցներում»,- նշել է Սվաջյանը։
Նախարարի տեղակալի փոխանցմամբ՝ նախորդ տարի բավարար արդյունքներ չգրանցած ուսուցիչները ևս կարող են հայտ ներկայացնել։ Ասում է՝ նրանց աջակցելու նպատակով հանրապետության 4 բուհեր իրականացնում են վերապատրաստման դասընթացներ։
Արաքսիա Սվաջյանը նաև թվային տվյալներ է ներկայացրել՝ նշելով, որ նախորդ տարի ատեստավորման փուլը չհաղթահարած 760-ից ավելի ուսուցիչներից 700-ն այս տարի հայտագրվել են, նորից են մասնակցելու, և արդեն իսկ վերապատրաստվում են։
«Ողջունելի գործընթաց է, բայց լավարկելու տեղ կա»․ ուսուցիչների կարծիքը
Կամավոր ատեստավորում է անցել նաև թիվ 29 ավագ դպրոցի մաթեմատիկայի ուսուցչուհի Նաիրա Կոսյանը։
Ուսուցչի գնահատմամբ՝ վերջապես աշխատավարձերի «քարացած ստանդարտներն ինչ-որ չափով փոխվեցին»։
Ընդհանուր առմամբ, գործընթացը դրական է գնահատում, բայց նաև նկատում է՝ «լավարկելու տեղ կա»․
«Մասնավորապես, ատեստավորման համար նախատեսված 60 առաջադրանքը շատ է, և երեք ժամվա ընթացքում դժվար է ուսուցիչը հասցնում։ Լավ կազմված 20 առաջադրանքը բավարար է ուսուցչի գիտելիքները ստուգելու համար։ Ավելին, ուսուցիչը ժամանակ կունենա իր գրած աշխատանքը ևս մեկ անգամ ստուգել»,- նշել է Նաիրա Կոսյանը։
Ասում է՝ ատեստավորման գործընթացը համակարգն ու առկա կարծրատիպերը տեղից շարժել է․ շատ ուսուցիչներ են հասկացել՝ «հիմա պահանջներն այլ են»։ Կոսյանի կարծիքով՝ ուսուցիչը չպետք է կանգ առնի իր տեղում, պետք է սերնդի հետ զարգանա։ Ըստ նրա՝ եթե նույնիսկ նման պահանջ պետությունը չդներ, դա խիստ անհրաժեշտ է հետաքրքրությունների լայն շրջանակ ունեցող աշակերտների համար։
ԵՊՀ-ին առընթեր Ա. Շահինյանի անվան ֆիզիկամաթեմատիկական հատուկ դպրոցի ուսուցիչ Տիգրան Սարդարյանը նույնպես կարծում է, որ ծրագիրը կատարելագործման կարիք ունի։ Հարցնում է՝ արդյո՞ք աշխատավարձերի բարձրացմանը զուգահեռ այն ապահովո՞ւմ է նոր ուսուցիչների մուտքը դպրոց, բարձրացնո՞ւմ է կրթության որակը։
«Արդեն երկու տարի է, ինչ ծրագիրն իրականացվում է, սակայն մեր երկրում դեռ ուսուցչի պակասը կա։ Դեռ ուսուցչի աշխատավարձը, աշխատանքը գրավիչ չէ երիտասարդների համար»,- շեշտել է Սարդարյանը։
Անդրադառնալով ուսուցիչների ընդամենը 13 տոկոս մասնակցությանը՝ նկատել է՝ դա մի քանի բան կարող է նշանակել․
«Որոշ ուսուցիչներ վստահ չեն իրենց գիտելիքների վրա, որոշները ուղղակի չեն հավատում այս ամենին, իսկ մյուսները մտածում են՝ ինձ մնացել է 1-2 տարի թոշակի անցնելու, դա էլ անցկացնեմ, գնամ»։
Հետևեք մեզ — Facebook | Youtube | Telegram
Ուսուցիչների կամավոր ատեստավորում Հայաստանում
