Հայաստանը Գորիս-Կապան ճանապարհի Որոտանի հատվածում մաքսակետ տեղադրելու կարիք չի տեսնում։ ԱԺ–ում լրագրողների հետ ճեպազրույցում հայտարարել է ՀՀ պետական եկամուտների կոմիտեի նախագահը։
Ռուստամ Բադասյանը նշել է, որ կառավարությունը ձեռնարկել և ձեռնարկում է գործողություններ, որոնք բխում են ՀՀ տարածքում ստեղծված իրավիճակից․
«Մենք մեր գործառույթներն իրականացնում ենք բավարար ենթակառուցվածքների միջոցով։ Այսինքն, մենք կարիք չունենք որևէ տեղ հավելյալ մաքսակետ տեղադրելու»։
Անդրադառնալով Իրան-Հայաստան բեռնափոխադրումների խոչընդոտներին՝ ՊԵԿ նախագահը նշել է, որ իրենց գործառույթների շրջանակում անում են ամեն ինչ, որպեսզի Հայաստանի տարածքով բեռնափոխադրումներն իրանցի վարորդների կողմից իրականացվեն «հնարավորինս հարմարավետ» և հավելյալ խնդիրներ չառաջանան տնտեսվարողների համար։
«Հարցի վերջնական լուծումն ավելի համալիր գործողություններ է ենթադրում, որի շուրջ կառավարությունն աշխատում է»։
Ռուստամ Բադասյանը հրաժարվել է մեկնաբանել ՀՀ վարչապետի այն հայտարարությունը, թե Գորիս-Կապան ճանապարհի 21 կմ հատվածը «վիճելի» է։
«Նմանատիպ հարցերը շատ ավելի զգայուն են, վերաբերում է ԱԱԾ ոլորտին, և կարծում եմ՝ պետք է ուղղակի հետևել ու սպասել կառավարության դիրքորոշումներին նշված հարցերի հետ կապված», — նշել է Բադասյանը։
Հիշեցնենք, որ սեպտեմբերի 11-ից Գորիս-Կապան ճանապարհի որոշ հատվածներում Ադրբեջանը ոստիկանական և մաքսային անցակետեր է տեղակայել։ Ադրբեջանցի ոստիկանները կանգնեցնում են իրանական բեռնատարների վարորդներին և գումար պահանջում «Ադրբեջանի տարածք մուտք գործելու համար»՝ որպես «մաքսատուրք»։ Հայտնի է նաև, որ այս ընթացքում նշված հատվածում ձերբակալվել է իրանցի 2 վարորդ։
