Մայա Սանդուն Մոլդովայի նոր նախագահն է․ ի՞նչ է լինելու
Ընտրությունների երկրորդ փուլից հետո Մոլդովայի նոր նախագահ է դարձել Մայա Սանդուն։ Նրա մրցակիցը՝ գործող նախագահ Իգոր Դոդոնն, արդեն շնորհավորել է նրան հաղթանակի կապակցությամբ, սակայն նախազգուշացրել է, որ «պաշտպանելու է իր ընտրողների ձայները»։ Ի՞նչ է սա նշանակում երկրի համար։
Ո՞վ է Մայա Սանդուն
Մոլդովայի նոր նախագահը 46 տարեկան է։ Նա առաջին կինն է երկրում, որն այս պաշտոնն է զբաղեցրել։
Սանդուն Ռիսիպեն գյուղում է ծնվել։ Երկու բարձրագույն կրթություն է ստացել Մոլդովայում, ինչպես նաև ավարտել է Հարվարդի համալսարանը։
Նա կրթության նախարարն ու վարչապետի պաշտոնակատարն է եղել։ 2016 թ-ին նախագահական ընտրություններում պարտվել է Իգոր Դոդոնին։
Մայա Սանդուն «Գործողության և համերաշխության կուսակցության» առաջնորդն է, որը Եվրոպային Մոլդովայի ինտեգրման կողմնակից է։ Նրա հիմնական ընտրազանգվածը երիտասարդությունն է, բարձրագույն կրթությամբ մարդիկ, քաղաքների բնակիչները։
Ո՞վ է Իգոր Դոդոնը
Մոլդովայի այժմ արդեն նախկին նախագահ Իգոր Դոդոնն այդ պաշտոնը զբաղեցնում էր 2016 թ-ից։ Նրա գլխավոր գաղափարը Ռուսաստանի հետ ռազմավարական գործընկերության խորացումն է։
Դոդոնի և նրա Սոցիալիստական կուսակցության օգտին հիմնականում քվեարկում են գյուղերում, ինչպես նաև Մերձդնեստրում և Գագաուզիայում, որտեղ բնակչությունը դեմ է տրամադրված միասնական մոլդովական պետությանն ու եվրաինտեգրմանը։
Դոդոնն ամեն հարմար առիթով ընդգծում է Ռուսաստանի նախագահ Վլադիմիր Պուտինի նկատմամբ իր համակրանքը։ Նա վերջին տարիներին Մոսկվայում մայիսի 9-ին ներկա արտասահմանյան սակավաթիվ հյուրերից մեկն է, երբ Ռուսաստանը տոնում է Հաղթանակի օրը։
Ի՞նչ է սպասվում Մոլդովային․ խորհդարանական պայքա՞ր, թե՞ «թափթփուկների իրարանցում»
Մոլդովան խորհրդարանական հանրապետություն է, որտեղ նախագահը զգալի լիազորություններ չունի։
Խորհրդարանում մեծամասնությունը պատկանում է Սոցիալիստական կուսակցությանը, որը գլխավորում է Իգոր Դոդոնը։ Հենց այնտեղ է նա դիմադրելու Մայա Սանդուի բարեփոխումներին։
Այդ պատճառով էլ նոր նախագահի առաջին և գլխավոր խնդիրն արտահերթ խորհրդարանական ընտրությունների անցկացումն է։
Արտահերթ խորհրդարանական ընտրությունների անցկացման սցենարը լիովին իրատեսական է, կարծում է մոլդովացի քաղաքագետ Ստելա Ժանտուանը․
«Ինչ կոալիցիա էլ Դոդոնը խորհրդարանում հավաքած լինի, նա կախված է լինելու նրանցից։ Այնտեղ լինելու է թափթփուկների կոալիցիա, ընդ որում, կուսակցություններն ինչ-որ տրամաբանության են հետևում, իսկ թափթփուկները՝ ոչ։ Նրանք չեն կարող մեծամասնություն ձևավորել, որն ընդհանուր նպատակի կծառայի։ Նման խորհրդարանում ոչ մի իրավիճակ երկարաժամկետ չէ։ Անգամ եթե մեծամասնության պատգամավորներին համախմբի արտահերթ խորհրդարանական ընտրությունների առջև վախն, այդ ընտրությունները, միևնույն է, կայանալու են»։
