Բողոքի ակցիա՝ նվիրված Աբխազիայի Ազգային պատկերասրահում բռնկված հրդեհին
Հրդեհ Աբխազիայի պատկերասրահում
Սուխումում տեղի է ունեցել բողոքի ակցիա՝ նվիրված Ազգային պատկերասրահում վերջերս բռնկված հրդեհին։
Աբխազիայում հունվարի 21-ի գիշերը այրվել է Ազգային պատկերասրահը։ Նշվում է, որ հրդեհի պատճառը էլեկտրականության կարճ միացումն է: Հրդեհը ոչնչացրել է աբխազ հայտնի նկարիչների՝ Ալեքսանդր Շերվաշիձե-Չաչբայի, Վարվառա Բուբնովայի, Մարինա Էշբանի, Վալերի Գամգիայի և այլոց ավելի քան չորս հազար գործեր, փրկվել է ընդամենը 200 նկար։ Հանրապետությունում սա ընկալվեց որպես ազգային ողբերգություն։
Հանրահավաքը տեղի է ունեցել աբխազ առաջին պրոֆեսիոնալ նկարիչ Ալեքսանդր Շերվաշիձե-Չաչբայի հուշարձանի մոտ։ Դրան մասնակցում էին հիմնականում նրանք, ովքեր դեռ չեն կարողանում հաղթահարել կորստի դառնությունը՝ Աբխազիայի մշակույթի, հասարակական գործիչներ, ստեղծագործական և գիտական մտավորականության ներկայացուցիչներ։ Շատերն ասում էին, որ Ալեքսանդր Շերվաշիձե-Չաչբայի հուշարձանի մոտ եկել են այնպես, ասես թաղման են գնում։
Բարձրաստիճան պաշտոնյաներից ակցիային ներկա էր միայն նախագահի աշխատակազմի ղեկավարը։
Ազգային պատկերասրահի տնօրեն Սուրամ Սաքանիան, հազիվ զսպելով արցունքները, ներողություն խնդրեց բոլորից կատարվածի համար՝ իրեն անվանելով հունվարի 21-ի ողբերգության մեղավորներից մեկը։
«Մեղքի մեծ բաժինն ինձ վրա է։ Ինչո՞ւ չկարողացա ավելի վաղ ակցիաներ կազմակերպել։ Ինչո՞ւ ես չբղավեցի դրա մասին, որպեսզի վերջապես լսելի լինեի: [Այժմ] Չաչբա-Շերվաշիձեի կտավները վերադարձնելու հնարավորություն չունենք; Մենք այդպես էլ չկարողացանք ստեղծել նրա անունը կրող որևէ թանգարան, որտեղ կպահվեին նրա աշխատանքները»,— ասել է Սաքանիան։
- Աբխազիայում արգելվել է ԱՄՆ ՄԶԳ գործունեությունը
- Վրաստանի ամբողջականությանն աջակցելու մասին Փաշինյանի խոսքերը վրդովմունք են առաջացրել Աբխազիայում
- «Աբխազիայի ինքնիշխանության զիջման գիշեր». կարծիք Պիցունդայի ամառանոցը ՌԴ-ին հանձնելու մասին
Նկարիչ Նոդար Ցվիժբայի խոսքով՝ աբխազ երիտասարդ արվեստագետները դաստիարակվել են Շերվաշիձե-Չաչբայի ստեղծագործություններով, իսկ այժմ նրանք դաստիարակվելու են մոխիրներով։
Մշակույթի վաստակավոր գործիչ Նուրի Կվարչիան արդար հետաքննության հույս ունի։ Նա կոչ է արել չսպասել, այլ գործել՝ փրկել այն ամենը, ինչ հնարավոր է, փնտրել ու գնել աշխատանքներ ամբողջ աշխարհից։ Այդ նպատակով Կվարչիան առաջարկել է ստեղծել հիմնադրամ, որին պատրաստ է փոխանցել իր տարեկան աշխատավարձը։
Իրավապաշտպան Ասիդա Շաքրիլը հունվարի 21-ի գիշերը տեղի ունեցածը ամոթալի փաստ է անվանել.
«Ամոթ է, որ ներկայիս ժամանակներում նման բան պատահեց մեզ հետ։ Տեղի ունեցածը մեր անպատասխանատվության ու անտարբերության, մեր մշակույթի, պատմության ու հիշողության նկատմամբ մեր վերաբերմունքի արդյունքն է։
Ես եկել եմ այստեղ ներողություն խնդրելու այն բանի համար, որ մենք չպահպանեցինք մեծ արվեստագետից մեզ հասած ժառանգությունը։ Ուզում եմ ասել ապագա սերնդին` ներեք մեզ, որ անտարբեր և անպատասխանատու մարդիկ ենք։ Սա առաջին հերթին մեր իշխանության և ոչ միայն ներկայիս իշխանության անպատասխանատվությունն է»։
Բողոքի ակցիայի ավարտին ելույթ է ունեցել Abaza-TV հեռուստաալիքի գլխավոր տնօրեն Ռուսլան Խաշիգը։ Նշելով, որ հեռուստաընկերությունն իր եթերում ցուցադրել է Ազգային պատկերասրահի հետ կապված ամբողջ արխիվը, նա ներողություն է խնդրել և ծնկի է եկել Ալեքսանդր Շերվաշիձե-Չաչբայի հուշարձանի առաջ։
Հետևեք մեզ — Facebook | Youtube | Telegram
Հրդեհ Աբխազիայի պատկերասրահում
