Հայաստանի նախկին նախագահը վարչապետին անվանում է «ազգակործան պատուհաս»
Հայաստանի առաջին նախագահ Լևոն Տեր-Պետրոսյանը Հայաստանի վարչապետ Նիկոլ Փաշինյանին անվանել է «ազգակործան պատուհաս»: Այս մասին իր ֆեյսբուքյան էջում գրել է պաշտոնաթող նախագահի առաջնորդած Հայ ազգային կոնգրես կուսակցության մամուլի քարտուղարը:
Տեր-Պետրոսյանը համոզված է, որ Փաշինյանն իրեն արդարացնելու հնարավորություն չունի, և հայ ժողովուրդը նրան երբեք չի ների: Խոսքը վերաբերում է Հայաստանի ղեկավարության կայացրած որոշումներին Ղարաբաղյան երկրորդ պատերազմի ժամանակ, որը դադարեցվեց նոյեմբերի 10-ին Ռուսաստանի և Ադրբեջանի հետ եռակողմ հայտարարության ստորագրմամբ:
Տեր-Պետրոսյանի անունից արված հայտարարությունը Նիկոլ Փաշինյանի ֆեյսբուքյան գրառումների արձագանքն է:
Վարչապետը խոսել է այն փակուղու մասին, որում գտնվում էր Ղարաբաղի հարցը 2018 թվականին, և պատերազմը դադարեցնելու փորձերի մասին: Նա նաև ներկայացրել է պատերազմի ընթացքում Լեռնային Ղարաբաղի նախկին ղեկավարների հետ հանդիպումների մանրամասները և պատմել Հայաստանի նախկին նախագահներ Լևոն Տեր-Պետրոսյանի և Ռոբերտ Քոչարյանի՝ Մոսկվա այդպես էլ չկատարած այցի նախապատրաստման մասին:
Մանրամասներ՝ Նիկոլ Փաշինյանի գրառումների ու դրանց արձագանքի վերաբերյալ:
- Հայաստանի վարչապետի տիկինը՝ հրամանատարական կետում, և ով է մեղավոր պատերազմի ձախողումների համար․ մեկնաբանություն Փաշինյանից
- Վարչապետի 15 կետ․ թե ինչպես է Փաշինյանը տեսնում ճգնաժամի հաղթահարումը Հայաստանում
Հանդիպում նախկին նախագահների հետ
Իր գրառումներից մեկում Նիկոլ Փաշինյանը պատմում է, որ հոկտեմբերի 20-ին Արցախի նախկին նախագահներ Արկադի Ղուկասյանն ու Բակո Սահակյանը առաջարկել են կազմակերպել Հայաստանի և Ղարաբաղի ներկայիս և նախկին ղեկավարների հանդիպում, «որը պատերազմի օրերին կլինի ազգային միասնության արտահայտում»:
Այնուհետև, ըստ Փաշինյանի, այս գաղափարին ավելացվել է մի նրբություն. նրան առաջարկել են միջնորդի դեր կատարել, որպեսզի Վլադիմիր Պուտինն ու ՌԴ արտգործնախարար Լավրովն ընդունեն Հայաստանի նախկին նախագահներ Լևոն Տեր-Պետրոսյանին և Ռոբերտ Քոչարյանին որպես հատուկ բանագնացների, բայց ինքը չի համաձայնել:
Ըստ Փաշինյանի՝ ինքն առաջարկել է շտապ արարողակարգային այց կազմակերպել Մոսկվա պաշտոնաթող նախագահներ Տեր-Պետրոսյանի և Քոչարյանի մասնակցությամբ, որպեսզի նրանք հանդիպեն Ռուսաստանի նախկին նախագահ Դմիտրի Մեդվեդևի հետ, որը նաև Ռուսաստանի անվտանգության խորհրդի նախագահի տեղակալն է:
Սակայն, Փաշինյանի եզրակացությամբ, նրանց համար այդքան էլ հետաքրքիր չի եղել այս առաջարկը.
«Բակո Սահակյանը ինձ համար անսպասելի հայտարարեց, թե Տեր-Պետրոսյանը և Քոչարյանը Սերգեյ Լավրովի հետ հանդիպման պայմանավորվածություն ունեն:
Էդ դեպքում ինձնից ի՞նչ են ուզում. պայմանավորված են՝ թող մեկնեն Մոսկվա, հանդիպեն: Պարզվեց՝ հարցը Ռ. Քոչարյանի անձնագիրն է, որը դատարանում է: Ասացի՝ թող միջնորդություն ներկայացնեն դատարան, ես կխնդրեմ, որ մեղադրանքի կողմը չառարկի անձնագիրը վերադարձնելուն: Այդպես էլ եղավ. դատարանը վերադարձրեց Քոչարյանի անձնագիրը, բայց Տեր-Պետրոսյանն ու Քոչարյանը Մոսկվա այդպես էլ չմեկնեցին»:
Փաշինյանի գրառումը ղարաբաղյան հարցի փակուղու մասին
Մեկ այլ գրառման մեջ Նիկոլ Փաշինյանը խոսում է այն փակուղու մասին, որում գտնվում էր ղարաբաղյան հարցը 2018 թվականին, երբ նա ստանձնեց իր պաշտոնը։ Նրա խոսքով՝ դրանից միայն մեկ ելք կար՝ տարածքների անվերապահ հանձնումը, ընդ որում՝ առանց երաշխիքի, որ Ադրբեջանը նոր պահանջներ չի առաջադրի:
Այդ նոր պահանջների համատեքստում, Փաշինյանի կարծիքով, պատերազմի հավանականությունը կրկին աճում էր:
«Հիմա լավ, բա ի՞նչ պետք է անենք: Պետք է ատամ-ատամի դրած կայունացնենք իրավիճակը ու ավելի չվատացնենք: Հիմա ամենակարևոր խնդիրը գերիների, անհետ կորածների և հնարավոր պատսպարվածների հարցն է, որը պետք է շատ արագ լուծվի», — ասում է կառավարության ղեկավարը:
Պատերազմը դադարեցնելու փորձերի մասին
Փաշինյանը ներկայացրել է նաև ղարաբաղյան պատերազմը դադարեցնելու փորձերի որոշ մանրամասներ: Բանն այն է, որ շատերը նրան մեղադրում են ռազմական գործողությունները դադարեցնելու որոշումն ուշացնելու մեջ:
Ինչպես գրում է Փաշինյանը, հոկտեմբերի 19-ին Արցախի նախագահ Արայիկ Հարությունյանը նրան ասել է, որ պատերազմը պետք է կանգնեցնել.
«Ասաց նաև, որ այս տեսակետը փոխանցում է ոչ միայն իր, այլև ԼՂՀ պաշտոնաթող նախագահներ Արկադի Ղուկասյանի, Բակո Սահակյանի, նաև Ռոբերտ Քոչարյանի, Սերժ Սարգսյանի, Լևոն Տեր-Պետրոսյանի անունից»:
Դրանից հետո Փաշինյանը զանգահարել է Պուտինին:
«Նա ասաց, որ կարծում է դա պետք է փորձել անել ռուսական առաջարկների տրամաբանությամբ: Այսինքն՝ կարգավիճակի հարցի հետաձգում, շրջանների հանձնում, ռուս խաղաղապահների տեղակայում: Ասացի՝ խաղաղապահները պետք է տեղակայվեն նախկին ԼՂԻՄ սահմանի երկայնքով և Լաչինի միջանցքով: Ինքը համաձայնեց և պայմանավորվեցինք, որ քննարկումներից հետո կրկին կզանգեմ», — գրել է Փաշինյանը ֆեյսբուքյան իր էջում:
Նա ԼՂ նախագահին տեղեկացրել է Պուտինի պատասխանի մասին: Արայիկ Հարությունյանը համաձայնություն է հայտնել ՌԴ նախագահի առաջարկի կապակցությամբ: Բայց պարզվել է, որ ԼՂ նախկին նախագահներ Բակո Սահակյանը և Արկադի Ղուկասյանը պատրաստ չեն ընդունել որևէ պայմանավորվածություն՝ առանց Արցախի կարգավիճակի ճշգրտման կամ ճշգրտման մեխանիզմի որևէ համաձայնության գալու:
«Ըստ էության՝ ասացին նաև Ռ. Քոչարյանի, Ս. Սարգսյանի և Լ. Տեր-Պետրոսյանի անունից»:
Արդյունքում, գրեթե մեկ ամիս անց, նոյեմբերի 10-ի գիշերը ստորագրվեց հայտարարություն, որը Հայաստանում շատերը համարեցին «դավաճանական» փաստաթուղթ Արցախը Ադրբեջանին կամավոր հանձնելու մասին:
Նախկին նախագահների արձագանքը
Տեր-Պետրոսյանի կուսակցության մամուլի քարտուղարը հայտարարել է, որ նախկին նախագահն անիմաստ է համարում «անդրադառնալ ազգակործան պատուհասի հոգեկան տվայտանքներին»:
«Ինչ ուզում է՝ թող դուրս տա: Միևնույն է` նա արդարանալու ոչ մի ճար չունի: Հայ ժողովուրդը նրան երբեք չի ներելու», — գրել է Արման Մուսինյանը:
Հայաստանի երկրորդ նախագահ Ռոբերտ Քոչարյանի գրասենյակի ղեկավարը ևս մեկնաբանել է իրավիճակը.
«Փաշինյանի այսօրվա երկու գրառումների մասին՝ կարճ. ինչպես միշտ, նա սուտ է խոսում»:
Վիկտոր Սողոմոնյանը խոստացել է եկող շաբաթվա ընթացքում ավելի մանրամասն անդրադառնալ այս թեմային:
