Բուհ ընդունվելու երկու հնարավորություն․ ի՞նչ է նախատեսում Հայաստանը
Հայաստանում քննություն կհանձնեն երկու անգամ
Հայաստանում շրջանավարտներին հնարավորություն կտրվի քննություն հանձնել երկու անգամ։ Վերջնական կհամարվի ամենաբարձր արդյունքը։ Կրթական գերատեսչության հեղինակած այս նախագիծը դեռևս շրջանառվում է։ Ընդունման պարագայում երիտասարդները կունենան բուհ ընդունվելու երկու հնարավորություն՝ ներկայիս մեկի փոխարեն։
Կրթական ոլորտի փորձագետ Սերոբ Խաչատրյանը նախաձեռնությունը դրական է գնահատում։ Ասում է՝ նման պրակտիկա կա ողջ աշխարհում։ Նախարարության որոշումը փորձագետը չի կապում հայաստանյան բուհերում առկա ավելի քան 14 հազար թափուր տեղերի հետ։ Նրա փոխանցմամբ՝ նախաձեռնությունը վաղուց կար, պարզապես 2023 թ․-ին է ուժի մեջ մտնելու։
Շրջանառվող նախագծով Հայաստանի կրթության, գիտության, մշակույթի և սպորտի նախարարությունը մտադիր է փոփոխություն իրականացնել «Պետական ավարտական քննությունների ժամանակացույցը և աշխատակարգը սահմանելու մասին» նախարարի հրամանում։
Նախագծի հիմնավորման համաձայն՝ 2022 թվականին միասնական և ավարտական քննությունների տրամաբանությունը փոփոխվում է «գործընթացն ավելի արդյունավետ կազմակերպելու նպատակով»։
Գործող կարգավորումների համաձայն՝ քննությունները կազմակերպվում են 12-րդ դասարանում՝ ուսումնական տարվա ավարտին։ Բուհ ընդունվելու համար շրջանավարտներին տրվում է մեկ հնարավորություն։
Եթե նախագիծը հավանության արժանանա, շրջանավարտները ավարտական և միասնական քննություններ կհանձնեն հունվար և հունիս ամիսներին։ Նրանք կկարողանան հունվարին հանձնել ավարտական քննություններ այն առարականերից, որոնք ուսումնական տարվա երկրորդ կիսամյակում այլևս չեն ուսումնասիրելու և որոնք միասնական քննությունների համակարգով չեն հանձնելու։
«Ե՛վ հունվարին, և՛ հունիսին միասնական քննություններ հանձնած սովորողի ավարտական փաստաթղթում լրացվում է միասնական քննության ավարտական մասի ավելի բարձր դրական գնահատականը»,- ասված է նախագծում։
Միևնույն առարկայից և՛ միասնական, և՛ ավարտական քննություն հանձնելու դեպքում միջնակարգ կրթության ատեստատում կլրացվի միասնական քննության միավորը:
Փորձագիտական կարծիք
Կրթության ոլորտի փորձագետ Սերոբ Խաչատրյանը սպասվող փոփոխությունը դրական է գնահատում։ Ասում է՝ դիմորդների համար լրացուցիչ շանս է։
«Դիմորդներին հնարավորություն է տալիս երկու անգամ փորձել, ինչը վերացնում է այն լարվածությունը, որ եթե քննության օրը սայթաքես, վերջ, մի տարի կկորցնես»,- JAMnews-ի հետ զրույցում ասել է Խաչատրյանն ու հավելել, որ երբեմն լինում են դեպքեր, երբ երեխաները ինչ-ինչ պատճառներով չեն կարողանում ներկայանալ քննության, արդյունքում ձախողում են։
Փորձագետի խոսքով՝ նորից քննություն հանձնելու և միավորներից բարձրն ընտրելու հնարավորություն ապագա ուսանողներն ունեն աշխարհի տարբեր երկրներում, ընդ որում՝ հանձնում են ոչ թե երկու, այլ բազմաթիվ անգամներ։
«Կարծում եմ՝ դիմորդին լրացուցիչ շանս տալով Հայաստանում ներդրվում է միջազգային պրակտիկան»,- ընդգծել է նա։
Հետևեք մեզ — Facebook | Youtube | Telegram
Հայաստանում քննություն կհանձնեն երկու անգամ
