Հայաստանում նշում են Առաջին Հանրապետության 101-ամյակը
Հայաստանը նշում է Առաջին հանրապետության հռչակման 101-ամյակը։
1918թ-ի մայիսի 28-ին Թբիլիսիում (այն ժամանակ՝ Թիֆլիս) Հայոց ազգային խորհուրդը հռչակեց Հայաստանի անկախությունն ու Հայաստանի Առաջին հանրապետության կազմավորումը, որը երկուսուկես տարվա կյանք ունեցավ։ Հայաստանի մայրաքաղաքն, ինչպես և հիմա, Երևանն էր։
Առաջին հանրապետությունը կազմավորվեց Անդրկովկասյան դեմոկրատական ֆեդերատիվ հանրապետության լուծարումից հետո։
• Հայաստանի երեք հանրապետություն՝ մեկ դարում․ մայիսի 28-ին այստեղ նշվում է Հանրապետության օրը
Մայիսի 28-ը պաշտոնապես որպես տոն նշվում է 1992 թվականից։ Այս օրը Սարդարապատի հուշահամալիրում ավանդական հանդիսավոր արողություններ են տեղի ունենում։
Վարչապետ Նիկոլ Փաշինյանն իր շնորհավորական ելույթում ասել է․
«Ղարաքիլիսայի, Բաշ-Ապարանի, Սարդարապատի հերոսամարտերից հետո հռչակվեց Հայաստանի անկախ առաջին Հանրապետությունը, դա տեղի ունեցավ մի ժամանակաշրջանում, երբ թվում էր, թե հայ ժողովրդի պատմությունը հասել է իր ավարտական փուլին: Բայց տեղի ունեցավ հակառակը, անսպասելին, և հայ ժողովուրդը ձեռք բերեց այն, ինչ թվում էր, թե կորցրել է անդառնալիորեն, ձեռք բերեց պետականություն: Այստեղ հեղված սուրբ արյան վրա է կառուցվել մեր պատմության առաջին Հանրապետությունը: Ահա սա է ամենակարևոր պատճառը, որ ամեն տարի մայիսի 28-ին մենք հավաքվում ենք այստեղ, մենք գալիս ենք ասելու, որ գիտակցում ենք մեր պատմական պատասխանատվությունը Սարդարապատի, Բաշ-Ապարանի, Ղարաքիլիսայի հերոսների առաջ, մենք գալիս են բարձրաձայնելու երեք ճակատամարտի հերոսներին, որ նրանց արյունը իզուր չի հեղվել»։
Այս տարի հուշահամալիրի տարածքում կանգնեցվել է նաև Առաջին Հանրապետության հիմնադիրներից մեկի, ներքին գործերի նախարար Արամ Մանուկյանի 140-ամյակին նվիրված հուշարձանը։
Հայաստանի վարչապետը հերոսների հիշատակը կապել է այն խնդիրների հետ, որոնք այժմ լուծում է իր կառավարությունը, մասնավորապես, կոռուպցիայի դեմ պայքարի․
«Հայաստանի Հանրապետության յուրաքանչյուր պաշտոնյա, կառավարության անդամ, թե Ազգային ժողովի պատգամավոր, համայնքի ղեկավար, թե դատավոր պետք է հասկանա, որ ասկետի կյանքով ապրած Արամ Մանուկյանի կերտած հայրենիքում տեղ չունի կոռումպացված ու ծախու պաշտոնյան: Յուրաքանչյուր այսպիսի պաշտոնյա դավաճանում է Սարդարապատի, Բաշ-Ապարանի, Ղարաքիլիսայի հերոսներին»։
Հայաստանի նախագահ Արմեն Սարգսյանն իր շնորհավորական ուղերձը հղել է հատկապես հայ երիտասարդությանը․
«Այսօր ես առանձնահատուկ դիմում եմ Հայաստանում, Արցախում, աշխարհի տարբեր անկյուններում ապրող մեր երիտասարդ սերնդին անկախ պետականությամբ հայրենի հողի վրա համախմբվելու կոչով: Այսօր լավագույն հնարավորություններն ունենք ապրել ու զարգանալ սեփական հողում, երազել ու մտածել վաղվա մասին, ամբողջացնել Հայրենիքը որպես միասնական գաղափար և որպես զորեղ ու կենսունակ պետական միավոր»:
