Հայաստանում կկառուցվի «Ակադեմիական քաղաք». ի՞նչ է դա փոխելու համակարգում
«Ակադեմիական քաղաք» Հայաստանում
Հայաստանում մինչև 2030 թվականը կկառուցվի «Ակադեմիական քաղաք», որտեղ տեղակայված կլինեն 16 բուհեր։ Այստեղ սովորելու և աշխատելու հնարավորություն կունենա 44 հազար անձ։
Այսօր գործադիրը հաստատել է ծրագրի հայեցակարգը, որի համաձայն՝ մինչև 2025 թվականի սեպտեմբեր կիրականացվի քաղաքի նախագծումը, այնուհետև կմեկնարկեն շինարարական աշխատանքները։ Նախնական գնահատմամբ՝ դրանք կամփոփվեն 2029 թ․-ի վերջին։
Կրթական ոլորտի պատասխանատուները վստահ են՝ նման քաղաքի ստեղծումն անհրաժեշտություն է։ Կարծում են՝ այն թույլ կտա ունենալ «լավագույն ստանդարտներին համահունչ և միջազգայնորեն մրցունակ բարձագույն կրթություն և գիտություն», ինչպես նաև արդյունավետ ինտեգրել այդ երկու ոլորտները։
Վարչապետ Փաշինյանի բնորոշմամբ՝ ռազմավարական ծրագիր է, որը «կանխորոշելու է Հայաստանի ապագան»։ Փորձագիտական շրջանակները նույնպես դրական են գնահատում այն, սակայն նկատում են՝ ծախսատար ծրագիր է, որը բովանդակային փոփոխություն չի բերելու։
«Արդիական միջավայր որակյալ կրթության համար»
Կրթության, գիտության, մշակույթի և սպորտի նախարար Ժաննա Անդրեասյանի խոսքով՝ «Ակադեմիական քաղաքը» երաշխավորելու է նաև ձեռք բերված գիտելիքի լավագույն կիրառությունը։ Ասում է՝ ապահովված կլինեն հետազոտության գերազանցության, կիրառական արդյունքների հայտնաբերման, զարգացման և փոխանցման, ինչպես նաև նորարական գործունեության խթանման և մտավոր սեփականության պաշտպանության սկզբունքները։
«Միաժամանակ ապահովվելու է հանրային և մասնավոր կազմակերպությունների հետ համագործակցությամբ ստեղծվող գիտելիքի, տեխնոլոգիաների և նորարարությունների ներդրումը»,- նկատել է նա։
Անդրեասյանը հիշեցրել է՝ որակյալ բարձագույն կրթության և հետազոտության համար արդիական միջավայրի՝ «Ակադեմիական քաղաքի» ստեղծումը նախատեսված է համակարգի մինչև 2030 թվականի զարգացման ծրագրի շրջանակներում։ Դրա իրականացման համար ձևավորվել է նաև հիմնադրամ։
Կգործի 4 կլաստեր
Հայեցակարգում մանրամասն նկարագրված են քաղաքի չորս կլաստերները՝ տեխնոլոգիական, արվեստների, կրթական և սպայական։ Այդ կլաստերներում պլանավորվում է նաև ավագ դպրոցների առկայություն։
ԿԳՄՍ նախարարը կարևորում է բովանդակային բարեփոխումները և նկատում՝ յուրաքանչյուր կլաստերի համար միջազգային փորձառու գործընկեր է ընտրվել։ Դրանց շարքում են Մասաչուսեթսի տեխնոլոգիական ինստիտուտը, Լոնդոնի արվեստների համալսարանը։
«Նոյեմբերի սկզբին արվեստների ուղղությամբ աշխատանքային խումբը կայցելի Լոնդոնի արվեստների համալսարան՝ «Ակադեմիական քաղաքի» կոնցեպտի մշակման վերջնականացման համար»,- հայտնել է Ժաննա Անդրեասյանը։
«Ակադեմիական քաղաքը» կունենա երկու տեղամաս
Առաջինը և հիմնականը Երևան քաղաքի 17-րդ թաղամասին հարող տարածքն է, որի գերակշռող մասը պետական կամ համայնքային սեփականություն է հանդիսանում։ Երկրորդը Համո Բեկնազարյանի անվան «Հայֆիլմ» կինոստուդիայի տարածքն է, որին անդրադարձ է լինելու այն պարագայում, եթե «գխավոր հատակագծով դրա կարիքը լինի»։ Այս երկու տեղամասերն ընտրվել են իրենց ֆիզիկական տեղադիրքի համար, դրանց գումարային մակերեսը կազմում է շուրջ 700 հեկտար։
«Ակադեմիական քաղաքի տարածքները նախատեսվելու են այն տրամաբանությամբ, որ հնարավորություն ունենան ֆիզիկապես տեղակայելու մինչև 16 բուհ՝ մինչև 8 պետական խոշորացված բուհեր և մինչև 8 մասնավոր կամ միջազգային բուհեր»,- պարզաբանել է նախարարը։
Երկու տեղամասերը հարում են միջպետական մեկ մայրուղու։ Բացի այդ, կառավարությունը նախատեսում է, որ «Ակադեմիական քաղաքը» մայրաքաղաքի հետ կկապվի երկաթգծով։ Ըստ նախարարի՝ դրա մի մասն արդեն իսկ անցնում է հիմնական տեղամասով։
Ի սկզբանե գործադիրը որպես «Ակադեմիական քաղաքի» կառուցման վայր էր դիտարկում Աշտարակը։ Թե ինչու են կանգ առել Երևանի վրա՝ չի պարզաբանվում։
Ամբողջությամբ նոր ենթակառուցվածքներ են ստեղծվելու
Խոսքը միայն բնակելի թաղամասի, ուսումնական հաստատությունների, հետազոտական ու արտադրական կենտրոնների շենքային պայմանների մասին չէ։ Տարածքում լինելու են նաև գյուղատնտեսական նշանակության փորձարարական վարելահողեր։ Ըստ հայեցակարգի՝ «Ակադեմիական քաղաքում» գործելու է բազմաֆունկցիոնալ համերգասրահ և մարզադահլիճ։
«Նախատեսվում է ունենալ ազգային ստադիոն մինչև 35 հազար հանդիսատեսի հնարավորությամբ, ջրային ավազաններ»,- հայտնել է նախարարը։
Նոր ենթակառուցվածքների ստեղծման հետ կապված կրթական գերատեսչությունը համագործակցության պայմանավորվածություններ է ձեռք բերել միջազգային հեղինակավոր ճարտարապետական «GNP» կազմակերպության և կառուցապատող ընկերությունների հետ։
Մեկնաբանություն
Կրթության փորձագետ Սերոբ Խաչատրյանը գաղափարին դրական է վերաբերվում, սակայն ասում է՝ բավական շատ ծախսեր ու ներդրումներ է պահանջելու, իսկ ոլորտի վրա «մեծ ազդեցություն չի ունենալու», որակական փոփոխություն չի բերելու․
«Կրթական համակարգը նույնն է մնալու։ Մի տեղից մյուսը տանելն ի՞նչ է փոխելու։ Ֆուտբոլի օրինակով դիտարկենք, եթե մեր թիմերից մեկի համար շքեղ մարզադաշտ կառուցենք, դրանից հետո ավելի լավ ֆուտբոլ կխաղա՞ն»։
Փորձագետը կարևորել է այս գործընթացին զուգահեռ դասախոսների վերապատրաստման ծրագրերի որակի բարելավումը, կառավարման համակարգում հեղափոխական փոփոխությունների իրագործումը։
Հետևեք մեզ — Facebook | Youtube | Telegram
«Ակադեմիական քաղաք» Հայաստանում
