Հայաստանի վարչապետը քննադատել է ռուսական զենքը, Մոսկվայում հայտարարել են, թե ստում է
Հայաստանի վարչապետը 2021 թ-ի իր առաջին մեծ հարցազրույցն է տվել։ Արևմտամետ ուղղվածության տեղական լրատվական կայքերից մեկի եթերում Նիկոլ Փաշինյանը կասկած է հայտնել ռուսական «Իսկանդեր» հրթիռային համալիրների արդյունավետության վերաբերյալ։ Նա հայտարարել է, որ «դրանք չեն պայթել կամ պայթել են ընդամենը տասը տոկոսվ»։
Նրա խոսքերին արդեն արձագանքել է Ռուսաստանի Պետդումայի պաշտպանության հարցերի կոմիտեի փոխնախագահ Վիկտոր Զավարզինը՝ Հայաստանի վարչապետին մեղադրելով սուտ տեղեկություն տարածելու մեջ։
Բոլոր մանրամասները չպայթած «Իսկանդերների» և վարչապետի հայտարարություններին Ռուսաստանի ու հայկական ընդդիմության արձագանքի, ներքաղաքական ճգնաժամի և կառավարության պլանների մասին։
- Հայաստանն ամրապնդում է Ռուսաստանի հետ համագործակցությունը, հնարավոր է ռուսական ռազմաբազայի ընդլայնում
- Կարծիք․ «Սարգսյանի Հայաստան» VS «Փաշինյանի Հայաստան»․ ո՞րն է ավելի լավ
- «Առանց Նիկոլ Հայաստան»․ տեսանյութ Երևանից, որտեղ վերսկսվել են ընդդիմության բողոքի ակցիաները
Ինչո՞ւ է «Իսկանդեր» հրթիռը գործել միայն 10%-ով
Հարցազրույցի ժամանակ Նիկոլ Փաշինյանը մեկնաբանել է նախկին նախագահ Սերժ Սարգսյանի որոշ հայտարարություններ, որոնք նա արել է փետրվարի 16-ին, ArmNews ընդդիմադիր հեռուստաալիքի եթերում։ Նախկին նախագահը, մասնավորապես, Հայաստանի իշխանություններին մեղադրել է այն բանի համար, որ 2020 թ-ի աշնանն՝ Արցախյան երկրորդ պատերազմի 4-5-րդ օրը, չեն կիրառել ռուսական «Իսկանդեր» հրթիռային համալիրները։
Ի պատասխան՝ Փաշինյանը հայտարարել է, որ նախկին նախագահը լավ գիտի իր հարցերի պատասխանները․
«Թող հարցնի, ինչո՞ւ «Իսկանդեր» հրթիռը չի պայթել կամ պայթել է, օրինակ, 10%-ով»։
Այս հայտարարությունից հետո լրագրողը կրկին վարչապետին հարցրել է, թե արդյո՞ք այդպես էլ է լինում, Փաշինյանը պատասխանել է․
«Չգիտեմ։ 80-ականների զենք էր գուցե»։
Մոսկվայի կոշտ արձագանքը
Ռուսաստանի Պետդումայի պաշտպանության հարցերի կոմիտեի փոխնախագահ Վիկտոր Զավարզինը քննադատել է Նիկոլ Փաշինյանի հայտարարությունները։
Նրա կարծիքով՝ Փաշինյանն այդ կերպ փորձում է արդարանալ, Արցախյան պատերազմում կրած պարտության մեղքն իր վրայից գցել․
«Երբ մարդն ուզում է այնպես անել, որ ինքը մեղավոր չլինի, ապա «Իսկանդերներն» էլ կհիշատակի, հայ ժողովրդին մեղավոր կհանի, զինվորականներն էլ են մեղավոր։ Դա, իհարկե, իրականությանը չի համապատասխանում։ Մեր «Իսկանդերները» շատ գերճշգրիտ զենք են, դա երևացել է բազմիցս, տարբեր զորավարժությունների ժամանակ։ Դա պարզապես բացարձակ սուտ է [Փաշինյանի խոսքերը], դա ընդհանրապես կասկածի տակ չի դրվում»։
Ընդդիմության արձագանքը
Վարչապետի հարցազրույցը մեկնաբանել է նաև «Լուսավոր Հայաստան» ընդդիմադիր խորհրդարանական խմբակցության առաջնորդ Էդմոն Մարուքյանը։
Facebook-ի իր էջում նա հարց է բարձրացրել, թե ինչու են Հայաստանի իշխանությունները դեմ Արցախյան 44-օրյա պատերազմի վերաբերյալ փաստահավաք հանձնաժողովի ստեղծմանը, եթե հենց իրենք են կասկածի տակ դնում բազմաթիվ կարևոր հարցեր, որոնք, այդ թվում, վերաբերում են նաև սպառազինությանը․
«Գործող և նախկին իշխանության ներկայացուցիչները, պաշտպանության և անվտանգության ոլորտի գործող և նախկին ներկայացուցիչները, դաշտային հրամանատարները և մյուսները շարունակելու են հարցազրույցնե՞ր տալ պատերազմի վերաբերյալ, թե՞ ի վերջո հասկանալու են պարիտետային փաստահավաք հանձնաժողովի կարևորությունն ու քաղաքական կամք են դրսևորելու այն ստեղծելու և բոլորին հուզող հարցերի պատասխանները տալու համար»։
«Պետք է բարեփոխումներ սկսենք բանակում»
«Ինչ վերաբերում է ընդհանուր առմամբ անվտանգության մեր տարածաշրջանային համակարգին, ապա մենք, իհարկե, պետք է բանակում բարեփոխումներ իրականացնենք, կառուցողական, բովանդակալից բարեփոխումներ, մասնավորապես, սպառազինության և ռազմավարական բովանդակության ուղղությամբ», — ասել է Փաշինյանը։
Վարչապետն ընդգծել է, որ Հայաստանը բախվել է ներքին և արտաքին մարտահրավերների, այդ պատճառով էլ պատերազմի ավարտից անմիջապես հետո որպես առաջնահերթ խնդիր նա ձևակերպել է Հայաստանում և դրա շուրջ անվտանգության և կայունության ապահովման օրակարգը․
«Չենք կարող ասել, որ այդ խնդիրը 100%-ով լուծված է, սակայն մենք վստահ քայլերով շարժվում ենք այդ ուղղությամբ»։
Բանակում բարեփոխումների մասին վերջերս խոսել է նաև Հայաստանի պաշտպանության նախարարը։ Ընդ որում, Վաղարշակ Հարությունյանի խոսքով՝ դրանք արդեն մեկնարկել են, և «այդ գործընթացին անմիջականորեն ներգրավված են ռուս գործընկերները»։
Արտահերթ ընտրություններ չի ցանկացել ընդդիմությունը
Նիկոլ Փաշինյանը մեկնաբանել է Հայաստանում արտահերթ խորհրդարանական ընտրությունների անցկացումը։ Նա ինքն էր առաջարկել խորհրդակցություններ սկսել դրանց անցկացման վերաբերյալ՝ պատերազմից հետո երկրում առաջացած քաղաքական ճգնաժամի հաղթահարման համար։ Սակայն շուտով իշխող քաղաքական ուժը հայտարարեց մոտ ժամանակներս ընտրությունների անցկացման աննպատակահարմարության մասին։
Վարչապետը պարզաբանել է, որ ընտրություններից, նախևառաջ, հրաժարվել է ընդդիմությունը, այդ պատճառով էլ որոշվել է հարցը հետաձգել մինչև հունիս․
«Որոշ ուժեր մտադիր են օգտագործել խորհրդարանական ընտրությունները որպես արմատական գործողությունների հարթակ, ինչը կարող է սպառնալ ներքին կայունությանը, ինչպես նաև ուժեղացնել արտաքին մարտահրավերները։ Այդ պատճառով էլ, ընդդիմությունից մերժում ստանալով, մենք որոշեցինք վերադառնալ մեր «ճանապարհային քարտեզին»։
Խոսքը կառավարության բարեփոխման և Արցախում ռազմական գործողությունների ավարտից հետո Հայաստանում առաջացած խնդիրների հաղթահարման համար քայլեր ձեռնարկելու մասին է։ Վարչապետի «ճանապարհային քարտեզում» նախանշված են կառավարության գործողությունները մինչև 2021 թ-ի հունիսը։
